گه‌ڕان

Shadow Shadow
چیرۆكه‌كانمان

چەند تەوەرێکی تایبەت بە گەرمیان و ئەنفال باسدەکرێت

سبەی ئەنجومەنی پارێزگای سلێمانی لە گەرمیان کۆدەبێتەوە

2019.04.13 - 14:53
سبەی ئەنجومەنی پارێزگای سلێمانی لە گەرمیان کۆدەبێتەوە

ناس کورد- شەهرام عەزیز

بڕیارە سبەی یەکشەممە کۆبوونەوەی ئەنجومەنی پارێزگای سلێمانی ببردرێتە گەرمیان و ئەنجومەنەکە لەوێ کۆببێتەوە، ئەندامێکی ئەنجومەنەکەش دەڵێت، دانیشتنەکە تایبەت دەبێت بە پرسی ئەنفال و داواکارییەکانی کەسوکاری ئەنفالکراوان و خزمەتکردنی گەرمیان.

.

کەریم عەلی ئەندامی ئەنجومەنی پارێزگای سلێمانی تایبەت بە ناس کورد-ی ڕاگەیاند: "سبەی یەکشەممە 14ی نیسانی 2019 بۆ بەرزڕاگرتنی یادی 31 ساڵەی ئەنفال و ڕێزگرتن لە کەسوکاری قوربانیان، ئەنجومەنی پارێزگای سلێمانی کۆبوونەوەی نائاسایی خۆی لە گەرمیان ئەنجام دەدات".

.

ئەندامەکەی ئەنجومەنی پارێزگای سلێمانی سەبارەت بە کارنامەی کۆبوونەوەکە ئاماژەی بەوەشکرد، چەند تەوەرێکی گرنگی تایبەت بە گەرمیان و کەسوکاری قوربانیانی ئەنفال لەو ناوچەیە باس دەکرێت، دەشڵێت: "ئێستا ڕۆژانە 40 هەزار بەرمیل نەوت لە گەرمیان بەرهەم دەهینرێت، بێ ئەوەی یەک دۆلاری بۆ گەرمیانییەکان بێت، بۆیە داوا دەکەین بەشێک لە داهاتی نەوتیان بۆ خەرج بکرێتەوە".

.

بە وتەی کەریم عەلی، لە ساڵی 2012دا 757 پارچە زەوی بەسەر کەسوکاری ئەنفالکراواندا دابەشکراوە، بەڵام تا ئێستا هیچ خزمەتگوزارییەکییان بۆ نەکراوە، ئەوەش بەهۆی ئەوەی قوربانیانی گەرمیان ژمارەیان زۆرە و پێویستیان بە تەرخانکردنی بودجەیەکی زیاترە بە قەرەبووکردنەوە و خزمەتکردنیان.

.

"تێبینیمان کردووە خەڵکی ناوچەکە کەمترین سوودیان لە دامەزراندن و کارکردن لەو کۆمپانیا و دامەزراوانە وەرگرتووە، بۆیە داوادەکەین خەڵکی ناوچەکە لەو دامەزراوانەدا هەلی کاریان بۆ بڕەخسێندرێت"، ئەندامەکەی ئەنجومەنی پارێزگای سلێمانی وای وت.

.

هاوکات یەکێکی دیکە لە تەوەرەکانی کۆبوونەوەکە تایبەت دەبێت بە تەواوکردنی نەخۆشخانەی 100 قەرەوێڵەیی کەلار کە تایبەتە بە منداڵان و تا ئێستا تەواو نەکراوە.

.

.