گه‌ڕان

Shadow Shadow
سیاسه‌تی

چەکدارانى داعش چۆن دزەیانکرد؟

وردەكاری هێرشەكەی شەوی ڕابردووی داعش بۆ سەر پیشمەرگە لە كوڵەجۆ

2020.04.08 - 10:33
وردەكاری هێرشەكەی شەوی ڕابردووی داعش بۆ سەر پیشمەرگە لە كوڵەجۆ
ناس کورد- چەکدارانى داعش لە هێرشەکەى شەوى ڕابروویاندا بۆ سەر پێشمەرگە لە سنورى کوڵەجۆ، سودیان لە چەمێکى دەورەدراو بە دارستانى چڕ بینیوە و لەوێوە دزەیانکردوەتە ناوچەکە، ئەوەش بەوتەى بەڕێوەبەرى ئاسایشى کوڵەجۆ. . درەنگانى شەوى ڕابردوو ژمارەیەک چەکدارى داعش هێرشیان کردە سەر هێزەکانى پێشمەرگە لە ناوچەى کوڵەجۆ سەر بە قەزاى کفرى لە ئیدارەى گەرمیان و بەهۆیەوە دوو پێشمەرگە شەهیدبوون. . عەقید شەماڵ عەبدورەحمان، بەڕێوەبەری ئاسایشی كوڵەجۆ و كۆكس تایبەت بە ناس كوردی ڕاگەیاند، لە سنوری دێی ئوم حونتە لەچەمی ئیسڵاحەوە لە كاتژمێری نزیك 11 ی شەوی ڕابردوو چەند چەكدارێكی  داعش هێرشیان كردە سەر بارەگایەكی سەربە وەزارەتی پێشمەرگە. . بارەگاکە لەنزیك كوڵەجۆیە بەدووری 200 مەتر و هێزەکانى پێشمەرگە پێی دەڵێن بارەگای سەرچەمەكە. . عەقید شەماڵ وتی، "سەرەتا بەقەناسی كە دووربینی شەوانەی لەسەر بەستراوە یەكێك لەپاسەوانە ئێشكگرەكەیان شەهید كردووە و دوای بییستنی دەنگی تەقە و وەڵامدانەوە پاسەوانێكی تری بارەگەكە شەهید كراوە". . دوو پێشمەرگە شەهیدەكە سەر بەفەوجی 3ی لیوای پێنجی شارەزووری وەزارەتی پێشمەرگە بوون كە لەو ناوچەیە جێگیر كراون. وتیشى، "ژمارەی چەكدارانی تیرۆریستانی داعش 10 كەس بوون و دوای ئەوەی پێشمەرگەكەكانی بارەگەكە دەستیان لێ دەكەنەوە هەڵدێن بەرەو چەمەكە و گوندى ئوم حونتە". .  تا ئێستا ژمارەی كوژراو بریندارەكانی داعش نازانرێت و پێشمەرگە سەرقاڵى بەدواداچونە بۆ ئەوەى ژمارەکانیان بزانێت. . عەقید شەماڵ باسی لەوەكرد، گوندى ئوم حونتە بەدەستی هێزەكانی سوپای عێراقەوەیە و چەمەكەش دارستانێكی چڕ و پڕی ناوچەكەیە و سودیان لەوە وەرگرتووە بۆ ئەوەی دزە بكەنە ناوچەكەیانەوە. . ئەمە یەکەمجار نییە داعش هێرشبکاتە سەر کوڵەجۆ، پێشتر چەندین جار هێرشى کردووە کە خوێناویترینیان لە مانگى یانزەى ساڵى ڕابردوودا بوو کە بەهۆیەوە بەرێوەبەرى ئاسایشى ناوچەکە و دوو کارمەندى دیکەى ئاسایش شەهد بوون. . عەقید شەماڵ کە دواى ئەو هێرشە پۆستى بەرێوەبەرى ئاسایشى کوڵەجۆى وەرگرت باسى لەوەکرد، پێشتر هەستیان كردووە جۆرێك لەجموجۆڵ لە دارستانەكەدا بەدیدەكرێت و هەمەرێكیان ناردووە چەند تەقەیەكی ئاڕاستەی ئەو ناوچانە كردووە كە گومانیان لەسەری بووە، بەڵام هیچ وەڵامێك نەبووە و دواتر بەوهۆیەوە گومانیان لەلا دروستبووە كە دزەیان كردبێت و بارەگەكەی پێشمەرگەیان ئاگادار كردووەتەوە.