گه‌ڕان

Shadow Shadow
سیاسه‌تی

13 بڕیارى نوێ لە لیژنەی باڵای ئۆپراسیۆنەكانی پارێزگای سلێمانییەوە

2020.03.29 - 18:44
13 بڕیارى نوێ لە لیژنەی باڵای ئۆپراسیۆنەكانی پارێزگای سلێمانییەوە
ناس کورد-   لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆنا کۆبووەوە و چەند بڕیارێکى دەرکرد، لەوانە رێگەدان بە کردنەوەى بانکەکان و دابەشکردنى بەشە خۆراک و کردنەوەى نۆرینگەکان. . بەپێی ڕاگەیەنراوێکى لیژنەکە، لە رۆژی (٣٠/ ٣/ ٢٠٢٠)ەوە، لە سەعات (٩)ی بەیانی بۆ (١٢)ی نیوەڕۆ بانكە ئەهلییەكان لە سنوری پارێزگای سلێمانی دەكرێنەوە، لەدوای (١/ ٤/ ٢٠٢٠)ەوە بەپێی بەرنامەیەكی گونجاو دەست بە دابەشكردنی خۆراك بەسەر بریكارەكاندا دەكرێت. . هەر بەپێی بڕیارەکان، نۆرینگەكان بەپێی بەرنامەیەكی دیاریكراو لەلایەن بەڕێوەبەرایەتی گشتی تەندروستی سلێمانی‌ و سەندیكای كارمەندانی تەندروستی سلێمانیەوە بەشێوەی (تەناوب)و بەپێی پێویستی گەڕەكەكان كاردەكەن. . دەقى بریارەکان: . ١. لە رۆژی (٣٠/ ٣/ ٢٠٢٠)ەوە، لە سەعات (٩)ی بەیانی بۆ (١٢)ی نیوەڕۆ بانكە ئەهلییەكان لە سنوری پارێزگای سلێمانی بەم مەرجانەی خوارەوە دەكرێنەوە: أ‌- پەیڕەوكردنی تەواوی مەرج و ڕێنماییە تەندروستیەكان. ب‌- لە هەر بانكێكدا نابێت لە (٥) كارمەند زیاتر بە (بەڕێوەبەر و كارمەندەكانیشەوە) دەوام بكات. ت‌- دەبێت بە پێی لیستێك سەردانكەران ڕێكبخرێن ‌و كاتی پێشوەختیان بدرێتێ‌‌ و نابێت لەیەك كاتدا دوو كەس زیاتر بێنە بانكەكەوە. پ‌- پێویستە كارمەندان‌ و سەردانكەرانی بانكەكان پابەندی تەواوی ڕێكار و ڕێنماییە تەندروستی ‌و كارگێڕی‌ و ئارامیەكانیان بن. ج‌- پێویستە بانكەكان پاكژ بكرێنەوە و دەرمانپژ بكرێن. . ٢. هەموو ڕێكخستن‌و مۆڵەتپێدانێكی كەرتی كشتوكاڵی ‌و خانووی پلاستیكی‌ و كێڵگە و نەمامگەو هەنگەوانی‌و...تاد لەلایەن فەرمانگەكانی بەڕێوەبەرایەتی گشتی كشتوكاڵی سلێمانیەوە دەبێت بەهەماهەنگی یەكە كارگێڕییەكان‌و فەرمانگەكانی بەڕێوەبەرایەتی ئاسایشی سلێمانی ‌و ئاسایشی خۆرئاوا لە شوێنە جیاجیاكاندا بەپێی سنوری كارگێڕیی خۆیان. . ٣. كۆمپانیاكانی دابەشكاریی خۆراك ‌و پێداویستیەكان لەناو شاری سلێمانیدا كارەكانیان لە سەعات (٨)ی شەو بۆ (٦)ی بەیانی جێبەجێ‌ دەكەن. . ٤. یەكێتی كۆمپانیاكانی دابەشكاری تا دوای تێپەڕاندنی ئەم دۆخە هیچ ئەندامێكی نوێ‌ وەرناگرن‌ و هیچ بڕە پارەیەك بۆ ڕسوماتی ڕێگەپێدان وەرناگرن ‌و بە هەماهەنگی لەگەڵ قائمقامیەتی قەزای مەڵبەندی سلێمانی ‌و بەڕێوەبەرایەتی چاودێری بازرگانیی سلێمانی كارەكانیان دەكەن. . ٥. دەست بە دابەشكردنی ئارد بەسەر بریكارەكاندا كراوە و لەدوای (١/ ٤/ ٢٠٢٠)ەوە بەپێی بەرنامەیەكی گونجاو دەست بە دابەشكردنی خۆراك بەسەر بریكارەكاندا دەكرێت ‌و پێویستە بریكارەكان‌ و هاووڵاتیانیش لە سنوری گەڕەكەكانیاندا پابەندی تەواوی ڕێنماییە تەندروستی‌ و كارگێڕی ‌و ئارامییەكان بن. . ٦. كاركردن بە كرێكاران ‌و توانستمەندانی بیانی لە كارگە و كۆمپانیاكاندا، ئاساییە بە مەرجێك پابەندی تەواوی ڕێنماییە تەندروستی ‌و كارگێڕی‌ و ئارامییەكان بن ‌و هیچ هاتووچۆیەك لە دەرەوەی دامەزراوەكانیاندا نەكەن. . ٧. پێویستە هەموو فەرمانگەكان لەكاتی وەرگرتنی موچەدا پەیڕەوی ڕێنماییە تەندروستی‌ و كارگێڕی ‌و ئارامییەكان بكەن‌ و بەڕێوەبەران ‌و جێگرانیان بە نووسراوی ئەو فەرمانگەیەی ئەو ڕۆژە مووچە وەردەگرێت‌ و بە ناسنامەكانیان كارئاسانیان بۆ دەكرێت. . ٨. هەر فەرمانگەیەكی خزمەتگوزاری لەڕێی بەڕێوەبەرایەتی گشتی یان بەڕێوەبەرێتی فەرمانگەكەیەوە بەهەماهەنگی یەكە كارگێڕییەكانی سنورەكەی خۆی لەكاتی دەوامكردن ‌و ئەركی فەرمیدا كاری هاتووچۆی كارمەندەكانی خۆی ڕێكدەخات. هەر كارمەندێك لە ئەركدا نەبێت ‌و قەدەغەی هاتووچۆ بشكێنێت و بۆ كاری تایبەتی ئۆتۆمبێلەكەی بەكاربێنێت، سزا دەدرێت. . ٩. نۆرینگەكان بەپێی بەرنامەیەكی دیاریكراو لەلایەن بەڕێوەبەرایەتی گشتی تەندروستی سلێمانی‌ و سەندیكای كارمەندانی تەندروستی سلێمانیەوە بەشێوەی (تەناوب)و بەپێی پێویستی گەڕەكەكان لەسەر بنەمای ئەم مەرجانە كاردەكەن: ١- پێویستە نۆرینگە بە دەرمانی دژە ڤایرۆس ڕەشكرابێت. ٢- كارمەندی نۆرینگە دەبێت بە ماسك ‌و دەستكێش ‌و گاونی پزیشكی كاربكات. ٣- پێویستە جێڵی تەعقیم بۆ هاووڵاتیان لەبەردەست بێت بەبەردەوامی. ٤- نابێت قەرەباڵخی لە نۆرینگەدا هەبێت، واتە ماوەی نێوان دوو كەس لانیكەم لە یەك مەتر كەمتر نەبێت‌ و لە یەك كاتدا یەك كەس زیاتر نەبینرێت ‌و بە ئاگاداری لە ناوەوە و دەرەوەی نۆرینگەكە هەڵبواسرێت. ٥- نابێت چارەسەری ئەو كەسانە بكرێت كە نیشانەی پەتای ڤایرۆسی كۆرۆنای نوێیان هەیە. ٦- لەكاتی بوونی گومان‌ و زانیاری لەسەر هەركەسێك بە تووشبوون یان نیشانەكانی پەتای ڤایرۆسی كۆرۆنای نوێ،‌ پێویستە ڕێنوێنی بكرێت سەردانی ئەو شوێنانە بكات كە دەستنیشانكراون بۆ پشكنین یان چارەسەر. ٧- پێویستە سجلی تۆماری سەردانكەران بۆ نۆرینگە هەبێت كە سەرجەم زانیارییەكانی تێدا تۆماربكرێت. . ١٠. تیمەكانی چاودێریكردنی قەدەغەكردنی هاتووچۆ زیاد دەكرێن‌ و شەو و ڕۆژ بەبەردەوامی لە ئەركدا دەبن. . ١١. بەڕێوەبەرێتی ڤێتێرنەری سلێمانی بە هەماهەنگی یەكە كارگێڕییەكان، كاری پێویست بۆ ڕێكخستن و مۆڵەتپێدانی هاتووچۆی ئەو بوارانە جێبەجێ‌دەكات كە دەكەونە پسپۆڕی‌ و دەسەڵاتی بەڕێوەبەرێتی ڤێتێرنەرییەوە. . ١٢. بەڕێوەبەرایەتی گشتی چاودێری و گەشەپێدانی كۆمەڵایەتی پارێزگای سلێمانی ڕاسپێردرا، بە هەماهەنگیی بەڕێوەبەرایەتی ئاسایشی سلێمانی و موختاری گەڕەكەكان، لیستی ئەو خێزانانە ئامادە بكەن، كە پێویستیان بە بەرنامەی پشتیوانیكردنە. . ١٣. پێویستە هەموو ئەو كەس ‌و دەستە و لایەن‌ و كۆمپانیایانەی كاری خێرخوازیی دەكەن، لیستی تایبەت بەو خێزانە بەڕێزانەی سودمەند دەبن ئامادە بكەن‌و ئەو لیستانە بگەیەننە پارێزگاو یەكە كارگێڕییەكانی كە ئەو كارە مرۆییە نیشتمانیانەی تێدا جێبەجێ‌ دەكەن، بۆئەوەی زۆرترین خێزان بێ‌ دووبارەبوونەوە سودمەند بن‌و بخرێنە بەرنامەی پشتیوانیی حكومەتی هەرێمی كوردستان‌و پارێزگاو ڕێكخراوە نێودەوڵەتییەكانەوە. . د.هەڤاڵ ئەبوبەکر پارێزگاری سلێمانی ٢٩/ ٣/ ٢٠٢٠