گه‌ڕان

Shadow Shadow
سیاسه‌تی

چەند كەسایەتیەكی عێراقیشی تێدایە كاریان بۆ بەرژەوەندیەكانی ئێران كردووە

ئەمریكا سزای نوێى بەسەر ژمارەیەك لەكەسایەتی ئێرانی سەر بەسوپای پاسداران سەپاند

2020.03.27 - 21:59
ئەمریكا سزای نوێى بەسەر ژمارەیەك لەكەسایەتی ئێرانی سەر بەسوپای پاسداران سەپاند
    ناس کورد-    لەچوارچێوەی سنوردانان بۆ چالاكیەكانی ئێران لەعێراق و ناوچەكە، ئەمریكا سزای بەسەر چەند كەسایەتی و گروپێكی عێراقى و ئێرانیدا سەپاند كە پەیوەستدارن بەسوپای پاسدارانەوە یاخود میلیشیا چەكدارەكانی ئەو وڵاتە لەعێراق. . لیستی نوێى سزاكانی ئەمریكا كە 20 كەسایەتی و گروپ دەگرێتەوە كە پاڵپشی گروپە تیرۆریستیەكانی كردووە لەوانەش كەتیبەكانی حزبوڵا و عەسائیبی ئەهلی هەق، كە هاریكاری دارایی و چەك و بازرگانی نەوتیان لەگەڵ گروپە تیرۆریستیەكانی ناوچەكەدا ئەنجامداوە. ئەمانەی خوارەوە بەشێكن لەو كەسایەتیانەی كە ئەمریكا سزای نوێى بەسەردا سەپاندوون: . محەمەد جەلال مەئرەب . بەو پێیەی سەرۆكی ڕێكخراوی نۆژەنكردنەوەی ئارامگە پیرۆزەكانە، لەلایەن قاسم سولەیمانیەوە ساڵی ڕابردوو ئەو پۆستەی پێسپێردراوە.   سوپای پاسداران ئەو ڕێكخراوەی كۆنترۆڵكردووە كە بارەگاكەی لە تارانە و چەند لقێكیشی لە ژمارەیەك شاری عێراق هەیە وەكو نەجەف و كەربەلا و كازمیە و سامەڕا و بەلەد. گەرچی ئەو ڕێكخراوە لەڕووكەشدا، دامەزراوەیەكی ئاینیە بەڵام چەندین ملیۆن دۆلار بۆ كۆمپانیای بەهجەتی بازرگانی كە هی سوپای پاسدارانە حەواڵە دەكات. ساڵی 2003 بۆ 2007 سەرۆكی شارەوانی كرمان بووە و لەقاسم سولەیمانیەوە نزیك بووە، ساڵی 2016 چەند مانگێك ڕاوێژكاری ئیسحاق جیهانگیری، یاریدەدەری حەسەن ڕۆحانی بووە. . شێخ عەدنان حەمیداوی . ناوی تەواوی عەدنان یونس حەمیداویە و بە ئەبو عەمار ناسراوە، فەرماندەی ئۆپەراسیۆنەكانی كەتیبەكانی حزبوڵای عێراقە كە میلیشیایەكی سەر بەئێرانە و ساڵی 2019 پلانی ڕفاندن و تۆقاندنی ئەو سیاسیانەی داڕشت كە پشتیوانی ئەو لایەنانە ناكەن كە داوای دەركردنی هێزەكانی ئەمریكا لەعێراق دەكەن. بۆ ماوەی 4 ساڵ لەلایەن سوپای ئەمریكاوە زیندانی كراوە و پێش كشانەوەی ئەو هێزە لەعێراق ساڵی 2011 ئازاد كراوە. . سەید یاسر مەسافر . لەساڵی 2014ەوە لەعێراقدا وەكو بەرپرسی سوپای پاسدارانی ئێران كاردەكات و لەگەڵ میلیشیا چەكدارە توندڕەوەكاندا هەماهەنگی كردووە و ساڵی 2019، سەرقاڵی فرۆشتنی نەوتی ئێران بووە بەسوریا. ساڵی 2018 هەماهەنگی لەگەڵ میلیشیاكانی عەسائیبی ئەهلی هەقدا كردووە. . محمەد غەریفی كارمەندی سوپای پاسدارانە و لە كۆمپانیای بەهجەت كەوسەر لەشاری نەجەف كار دەكات. هاریكاری ڕەزا فیداكاری فەرماندە لەسوپای پاسداران لەشاری نەجەف كردووە، كارئاسانی بۆ سەردانی بەرپرسانی سوپای پاسداران لەنێوان ئێران و عێراقدا كردووە. . محمەد سەعید عەزافە بەهادلی . بەڕێوەبەری گشتی كۆمپانیایەكی دەریاوانییە كە لەعێراقدا كاردەكات و بارەگاكەی لە دەرەوەی بەندەری ئوم قەسرە و ئەو كۆمپانیایە موڵكی سوپای پاسدارانە. دوای توندكردنەوەی سزا ئابورییەكان بۆ سەر ئێران لەلایەن ئەمریكاوە ئەو كۆمپانیایە لەرێگەی ئەو بەندەرەوە بەرهەمە پترۆڵیەكانی ئێرانی فڕۆشتووە و هێناویەتی بۆ عێراق. كاری سەرەكی بەهادلی ئاسانكاری بووە بۆ هێنانی ئۆتۆمبێلە بارهەڵگرەكانی ئێران بەڕێگەی فیڵ و تەڵەكە. .