گه‌ڕان

Shadow Shadow
سیاسه‌تی

هەڕەشە لە ئەمريكا دەكەن و بەرپرسن لە هێرشە موشەكيەكانى ئەم دواييە

گروپى چەكدارى سائرين كێن و كێ لە پشت پەردەوە بەڕێوەيان دەبات؟

2020.03.19 - 13:59
گروپى چەكدارى سائرين كێن و كێ لە پشت پەردەوە بەڕێوەيان دەبات؟
ناس کورد-   كۆمەڵەى سائرين بەبێ شاردنەوەى ئەوەى كە يەكێكە لە گروپە چەكداريەكانى عێراق كە سەربە كۆمارى ئيسلامى ئێرانە خۆى ڕاگەياند ئەوەش دواى چەند ڕۆژێك لە هێرشە موشەكيەكانى سەر سەربازگەكانى "تاجى" و "بسمايە". . كۆمەڵەى سائرين لەماوەى هەفتەيەكدا دوو گرتە ڤيديۆيى بڵاوكردوەتەوە كە هەڕەشە لە هێزەكانى ئەمريكا دەكەن و بەرپرسارێتى خۆشيان لە هێرشەكانى سەر ئەو دوو سەربازگەيە ڕاگەياندوە، لە گرتە ڤيديۆيەكاندا كەسێك دەردەكەوێت كە دەموچاوى خۆى شاردوەتەوەو چەكێكى پێيە و داوا لە دۆناڵد ترامپ، سەرۆكى ئەمريكا و بەرپرسە سەربازيەكان دەكات كە خاكى عێراق جێبهێڵن.   ڕۆژى يەكشەممە ئەو گروپە يەكەم بەياننامەى خۆى بڵاوكردەوە و بەرپرسارێتى خۆى لە هێرشەكەى سەر سەربازگەى "تاجى" ڕاگەياند كە 11 ى ئەم مانگە ئەنجامدراو بەهۆيەوە دوو سەربازى ئەمريكى و كچە سەربازێكى بەريتانى كوژران و چەند سەربازێكى تريش لەهێزەكانى هاوپەيمانى نێودەوڵەتى برينداركران. . لەبەياننامەكەدا هاتبوو، وەك وەڵامدانەوەى كوشتنى سەركردەكانى حەشدى شەعبى لە ديارترينيان "ئەبو مەهدى موهەنديس" كە لەسەرەتاى ئەمساڵ لە هێرشێكى فڕۆكە بێفڕۆكەوانەكانى ئەمريكا لەشارى بەغدا لەگەڵ قاسم سولەيمانى فەرماندەى پێشوى فەيلەقى قودسى ئێران كوژرا، ئەو هێرشەيان ئەنجامداوە. https://twitter.com/i/status/1240073392331653125   تائێستا هيچ زانياريەكى ئاشكرا تايبەت بەو گروپە نوێيە نييە، بەڵام ڕەمزەكانى لە ڕەمزى ئەو گروپانە دەچێت كە لە ئێرانەوە نزيكن، وەك "حزبوڵڵاى لوبنان"، فاتميون"ى ئەفغانى، "زەينەبيون"ى پاكستانى و "حەشدى شەعبى" عێراقى.   لاى خۆيەوە "موهەنەد غزى" ڕۆژنامەنوس و شارەزا لە گروپە شيعيەكان بە پێگەى "الحرە"ى وتوە، ئەو گروپە پێشتر لە مەيدانى عێراقيش نەناسراوە، لە ڕۆژانى بونى هێزەكانى ئەمريكا و دواى كشانەوەى ئەو هێزانەش، هەروەها لەكاتى شەڕى سوريا و تەنانەت دەركەوتنى ڕێكخراوى داعش بونيان نەبوە. . ئەو ڕۆژنامەنوسە دەشڵێت، لە لۆگۆ و هێماكانيانەوە دەتوانيت ئەوەت بۆ دەركەوێت كە لە لۆگۆ و هێماكانى پاسەوانى شۆڕشى ئێرانەوە وەرگيراوە، گروپەكە وەهمين و لەپشت ناوى يەكێك لە باشترين گروپە سەرەكيەكان لە عێراقدا خۆیان شاردوەتەوە، هەروەها شێوەى ئەو سەكۆيانەى موشەكەكانيان پێهەڵداوە لەو سەكۆيانە دەچێت كە لەلايەن گروپەكانى سەربە تارانەوە بەكار دەهێنرێن.   لەلايەكى ترەوە "ئەحمەد ئەبيەز" شارەزاى ئەمنى عێراقى بەهەمان پێگەى وتوە، گروپى سائرين بزوتنەوەيەكى سەربە عەسائيبى ئەهلى حەقە و "عەلى شەمخانى" ئەميندارى گشتى ئەنجومەنى باڵاى ئاسايشى نيشتمانى ئێرانى دروستى كردوە و ڕاستەوخۆ پەيوەندى بە ناوبراوەوە هەيە و لەلايەن ئێرانەوە پشتگيرى دەكرێن بۆ بەئامانجگرتنى هێزەكانى ئەمريكا. https://twitter.com/i/status/1239214959994843148   لەلايەكى ترەوە ئەمريكا پێى وايە گروپى عەسائبى ئەهلى حەق ناچار بون لە ژێر ناوێكى تر و بە بەركێكى نوێ كاربكەن و ڕەنگى خۆيان بگۆڕن ئەويش "گروپى سائرين"ە، ئەوەش دواى ديارنەمانى سەركردەكەيان لەدواى هێرشەكانى ئەمريكا و كوشتنى سولەيمانى و ئەبومەهدى موهەنديس. . ئەمريكا پێشى وايە، عەئاسبى ئەهلى حەق كۆنترۆڵى بەسەر گروپەكانى ترى حەشدى شەعبى لەدەستداوە، ئەوەش دواى ئەوەى بەهۆى سوتاندنى بارەگاكانى حەشدى شەعبىيەوە كێشە كەوتە نێوانيان، كە خۆپيشاندەران دەيانوت ئەوان سوتاندويانە بەڵام لەڕاستيدا وا نييە.   واشنتۆن هۆكارێكى ترى دروستكردنى ئەو گروپە نوێيە ئاشكرا دەكات و ئەوەى ڕونكردوەتەوە،  ئێران هێزێكى سەربازى هەڵبژاردەو بەتواناى دەوێت لە عێراق بۆ ئەوەى ڕاستەوخۆ پەيوەنديان بە سەركردايەتى ئێرانەوە هەبێت. .