گه‌ڕان

Shadow Shadow
سیاسه‌تی

عەدنان زورفى لە نێوان ڕەتكردنەوە و قبوڵكردن

فراكسيۆنە كوردیيەكان ڕاسپاردنی عەدنان زورفى ڕەتناکەنەوە و چاوەڕێی دانوستانن (تایبەت)

2020.03.17 - 19:25
فراكسيۆنە كوردیيەكان ڕاسپاردنی عەدنان زورفى ڕەتناکەنەوە و چاوەڕێی دانوستانن (تایبەت)
ناس کورد- دوای ئەوەى ئەمڕۆ بەرهەم ساڵح، سەرۆككۆمارى عێراق بە فەرمى عەدنان زورفى، سەرۆكى هاوپەيمانى نەسرى لە پەرلەمانى عێراق بۆ پێكهێنانى حكومەتى داهاتووى عێراق راسپارد،  ئەندامێكى فراكسيۆنى پارتى ديموكراتى كوردستانيش دەڵێت، چاوەڕێى بۆچونى ناو ماڵى كوردين لەسەر ناوبراو و پەرلەمانتارێكى یەکێتیش دەڵێت، بەپێى بەرنامە حكوميەكەى مامەڵەى لەگەڵدا دەكەن. . شێروان دوبەردانى، وتەبێژى فراكسيۆنى پارتى لەپەرلەمانى عێراق بە ناس كوردى وت، ئێمە وەك فراكسيۆنى پارتى بە تەنها بڕيار نادەين لەسەر ناوبراو، بەڵكو چەندين كوتلە و لايەنى ترى كوردى هەيە و چاوەڕێى بڕيارى ناو ماڵى كوردين، سەركردايەتى كورد لەگەڵ چيدا بوو ئێمەش هەمان بڕيارمان دەبێت. . سەبارەت بەوەى كە زورفى سەرۆكى فراكسيۆنى نەسرەو لە حەيدەر عەبادى سەرۆكى ئيئتلافەكەوە نزيكە لەكاتێكدا عەبادى كێشەى زۆرى لەگەڵ پارتیدا هەبوو دوبەردانى وتى: ڕاستە ئێمە دژى بڕيار و هەڵسوكەوتەكانى عەبادى بوين هەر لە 16ى ئۆكتۆبەر و بڕيارى بڕينى موچە و چەندين بڕيارى تر، ئەوەى گرنگە ئەوەيە بڕيارى ناوماڵى كوردى چى دەبێت لەسەر زورفى و هەڵسەنگاندنى بۆ دەكرێت ئەو كاتە بڕيار دەدرێت، هەروەها پێويستيشە كۆدەنگى نيشتمانى لەسەر ئاستى عێراق لەسەر ناوبراو هەبێت. . زورفی بە دەردی عەلاوی ناچێت؟ دواى دەستلەكاركێشانەوەى عادل عەبدولمەهدى، سەرۆكوەزيرانى كاربەڕێكەرى ئێستاى عێراق، بەرهەم ساڵح بە ڕەزامەندى بەشێک لە لايەنە شيعەكان محەمەد تۆفيق عەلاوى ڕاسپارد بۆ پێكهێنانى حكومەت، بەڵام بەهۆى ئەوەى عەلاوى نەيتوانى زۆرينەى كورد و سونەكان و بەشێكى شيعەكانيش ڕازى بكات سەرکەوتوو نەبوو لە تێپەڕاندنی کابینەکەى، عەدنان زورفيش دووەم كەسە كە بۆ شوێنگرتنەوەى عادل عەبدولمەهدى ڕادەسپێردرێت. . بەڵام لەئێستادا پرسیاری هەرە گرنگ ئەوەیە ئایا زورفیشی بە دەردی عەلاوی ناچێت؟ . لەلايەكى ترەوە شيروان ميرزا، ئەندامى پەرلەمانى عێراق لەسەر فراكسيۆنى يەكێتى نيشتمانى كوردستان لەسەر ڕاسپاردنى زورفى بە ناس كوردى وت، ناوبراو كەسێكى خراپ نييە و ڕۆشنبير و شارستانيە، زياتر لە ڕۆژئاوا نزيكترە وەك لە پياوانى ئاينى و ناوبراو ڕەگەزنامەى ئەمريكى هەيە. وتيىشى، سەبارەت بە بۆچونى پەرلەمانتارانى كورديش ئێمە چاوەڕێى كارنامەى حكومەتەكەى دەكەين و بزانين پلانى چييە بۆ بەڕێوەبردنى وڵات، ئەو كاتە بڕيار لەسەر ئەوە دەدەين دەنگى پێدەدەين ياخود نا. . لاى خۆشيەوە ئارام باڵەتەيى، وتەبێژى فراكسيۆنى پارتى ديموكراتى كوردستان لە پەرلەمانى عێڕاق سەبارەت بە ڕاسپاردنى زورفى لە ڕاگەیەنراوێکدا بڵاويكردوەتەوە: لەگەڵ هاوبەشەكانمان لە هەرێمى كوردستان گفتوگۆ دەكەين هەروەها لەسەر ئاستى عێراقيش، ئەوەش لەپێناو گەيشتن بە هەڵوێستێكى نيشتمانى يەكگرتوو لەسەر ڕاسپاردنى عەدنان زورفى. . سەبارەت بە هەڵوێستى فراكسۆنەكەيان لەسەر ناوبراو ئاماژەى بەوەداوە: هەڵوێستێكى ديارى كراومان نييە لەسەرى و پشت بە بنەما جێگرەكان لە ئيدارەدانى دەوڵەت دەبەستين بۆ ڕاگەياندنى هەڵوسێستمان. . محەمەد تۆفيق عەلاوى ڕاسپێردراوى پێشوو بۆ پێكهێنانى حكومەت كە شكستى هێنا لە ئەركەكەى و دواتر داواى لێبوردنى كرد و دەستى لە راسپاردنەكەى كێشايەوە ئەويش بێهەڵوێست نەبوو لەسەر راسپاردنى پاڵێوراوى نوێ و لەئەكاونتى خۆى لەتۆڕە كۆمەڵايەتيەكان بڵاويكردوەتەوە: زورفى لەبەردەم تاقيكردنەوەيەكى سەختدايە، يان دەبێت بە پشككارى و دابەشكردنى وەزارەتەكان بەسەر حزبەكاندا رازى بێت كە بەوەش ناتوانێت هيچ شتێك بكات و هيچ دەستكەوێتێكى هەبێت و گەندەڵى بەردەوام دەبێت، ياخود دەبێت وەزيرانى پيشەيى و سەربەخۆ ديارى بكات دوور لە حزبەكان بەوەش دەكەوێتە كێشمەكێشێكى سەختەوە لەگەڵ چينى سياسى و كابينەكەى تێناپەڕێنرێت. . ڕاسپاردنى پاڵێوراوى نوێ دوور نەبوو لە ڕەتكردنەوە و ڕەخەنەكان و هەر زوو هاوپەيمانى فەتح كە يەكێكە لە گەورەترين كوتلەكانى پەرلەمانى عێراق ناوبراوى ڕەتكردەوە و "کەریم علێوی" پەرلەمانتاری ئەو هاوپەيمانێتيە كە سەر بە هادی عامريە ڕایگەیاند: کابینەکەی زورفی کابینەیەکی لاواز دەبێت، چونکە بە پاڵپشتی حەیدەرعەبادی، کورد وسونە پێکهاتوە، تەمەنی کابینەکەی هەروەک کابینەکەی عەلاوی دەبێت لە 30 ڕۆژ تێپەڕناکات، چونکە لەسەر بنەمایەکی بە هێزوپتەو نەهاتووەتە کایەوە. ئاماژەى بەوەشداوە: هاوپەیمانی فەتح بەهیچ شێوەیەک لەگەڵ ڕاسپاردنی زورفی نییە و پێشتریش ئەو کەسایەتیەی ڕەتکردوەتەوە، ڕاسپاردنی لە ئەنجامی ڕێککەوتنە ژێربەژێرەکانی سەرۆککۆمار بووە کە بەپێچەوانەی خواستی گەورەترین هاوپەیمانی ناو پەرلەمانی عێراقە، هەڵوێستی سەرۆککۆمارلەگەڵ هاوپەیمانی فەتح هەڵوێستێکی تەمومژاوی بوە، سەرباری جەختکردنەوەی هاوپەیمانی فەتح لە ڕەتکردنەوەی زورفی، بەڵام سەرۆککۆمار هەر ڕایسپارد. . علێوی جەختیکردوەتەوە: فەتح پشتگیری لە زورفی ناکات، ئەوانەی پشتگیری لێدەکەن تەنها پەرلەمانتارەکانی کورد وسونەن لەگەڵ هاوپەیمانییەکەی حەیدر عەبادی، ئەوانە واژویان بۆ بەربژێرکردنی زورفی کۆکردوەتەوە و ناردویانە بۆ سەرۆککۆمار ئەوەش کارێکی نادەستوری و نادروستە. . مەيدانەكانى خۆپيشاندانيش لە دەربڕينى بۆچونى خۆيان بێبەش نەبون و هەرزوو وێنەى ناوبراويان بەرزكردەوە و نيشانەى (X)يان لێدا ئەوەش وەك ڕەتكردنەوەى ناوبراو، هەروەها تۆمەتبارى دەكەن بە دزينى 250 مليۆن دۆلار لە سەروەت و سامانى عێراق لەساڵانى پێشوو كە چەندين پۆستى ترى هەبوە، هەروەها ناوبراو بە "كلكى ئێران" ناودەبەن و دروشەكانى "لەلايەن مەيدانەكانى خۆپيشاندانەوە رەتدەكرێتەوە" و "لەلايەن گەلەوە ڕەتدەكرێتەوە" دژى ناوبراو بەرز كراونەتەوە.