گه‌ڕان

Shadow Shadow

بەڵێنە گەورەكانمان لەحكومەتدا جێ بەجێ دەكەین

شاسوار عەبدولواحید: ئەگەر 3 پەرلەمانتارەكەی دیكەمان فۆڕمی ڕەتكردنەوەی خانەنشینی پڕنەكەنەوە دەریاندەكەین

2020.01.20 - 12:22
شاسوار عەبدولواحید: ئەگەر 3 پەرلەمانتارەكەی دیكەمان فۆڕمی ڕەتكردنەوەی خانەنشینی پڕنەكەنەوە دەریاندەكەین
ناس كورد- نیوەڕۆی ئەمڕۆ (دوشەممە، 20ی كانونی دوەمی 2020)، لەكۆنگرەیەكی ڕۆژنامەوانیدا كە بەئامادەبوونی ئەو چوار پەرلەمانتاری فراكسیۆنی حزبەكەی لەپەرلەمانی كوردستان موچەی خانەنشینییان ڕەتكردەوە، سه‌رۆكی جوڵانه‌وه‌ی نه‌وه‌ی نوێ ڕایگەیاند، مەبەستیانە دوو مه‌به‌ست بگەیەنن، یەكێكیان گەیاندنی دەستخۆشی جوڵانەوەكەیه‌ بەو چوار پەرلەمانتارە، مەبەستی دوەمیشیان ناردنی پەیامێكە بۆ سێ پەرلەمانتاری دیكەیان، گەر بێتو ئەوانیش بەفەرمی فۆڕمی ڕەتكردنەوەی خانەنشینی ڕەتنەكەنەوە ئەوا لەجوڵانەوەكە دەریان دەكەن. . سەرۆكی جوڵانەوەی نه‌وه‌ی نوێ ڕونیكردەوە" چوار پەڕلەمانتارەكەی نەوەی نوێ پێش ئەوەی دەستكەوتێك بۆ ئەوان و جوڵانەوەكەیان وەدەستبهێنن مێژویان بۆ خۆیان تۆماركردووە كە بەفەرمی وەكو یەكەم پەرلەمانتار دەستبەرداری دەستكەوتە شەخسیەكانیان بون و موچەی خانەنشینیان ڕەتكردەوە ئەوان و خەڵكی كوردستانیش ئەو هەڵوێستەیان لەپێشچاوە". . باسی لەوەش كرد" پێش هەڵبژاردن قسە كردن و بەڵێندان ئاسانە بەڵام جێبەجێكردنی گرنگە لەدوای ئەوەی كە پۆستەكە وەردەگریت و بەڵێنەكەی جێبەجێ بكات، بۆیە پەرلەمانتارانی نەوەی نوێ بەڵێنێكی گرنگی كاتی بانگەشەی هەڵبژاردنیان بەجێهێنا". . شاسوار عەبدولواحید جەختی لەوەش كردەوە، كە بەڵێنە گەورەكانیان كاتێك كە حكومەت دەگرنە دەست و دەچنە دەسەڵاتەوە ئەوكات جێبەجێی دەكەن. . سەرۆكی جوڵانەوەكە ئەوەی خستە ڕوو، مەبەست لە تەوەرەی دووەم ئەوەیە، لە ئێستادا فراكسیۆنەكەیان لەپەرلەمانی كوردستان 7 ئەندامە جگە لەو چوار پەرلەمانتارە 3 پەرلەمانتاری نەوەی نوێ فۆرمیان پڕنەكردووەتەوە دەبێت لەماوەی 48 كاتژمێردا گەر پڕینەكەنەوە ئەوا لەجوڵانەوەكە دەریاندەكەن. . وتیشی "گرنگ نیە چەند پەرلەمانتاریان دەبێت و ژمارەیان چەند دەبێت، بەڵكو ئەوە گرنگە چەند خەڵكێكی تێدا بێت خاوەن پرەنسیپ و خاوەن ئەخلاق و و خاوەنی بەڵێنی خۆیان بن". . شاسوار عەبدولواحید ئەوەشی بیرهینایەوە كە هەموو كاندیدەكانی نەوەی نوێ ، پێش هەڵبژاردن بەڵێننامەیان پڕ كردووەتەوە كە موچەی خانەنشینی وەرنەگرن، ئەگەر ئەو سێ پەڕلەمانتارەش فۆرمەكە پڕنەكەنەوە ئەوا لەجوڵانەوەكە دەریاندەكەن. . لەسەر پەیوەندییە سیاسیەكانی جوڵانەوەكەی لەگەڵ حزبەكانی تردا سەرۆكی جوڵانەوەی نەوەی نوێ وتیشی "پێمانباشە جگە لەیەكێتی و پارتی هاوپەیمانێتیەكی بەهێز دروستبكرێت ئەگەر بەدەمەوە هاتنیش نەبێت ئەوا گوناهی ئێمەش نیە و لەداهاتوودا گەشبینم ئەوەش دێتە دی". . لەسەر ئەو قەرزانەی كە زۆرجار باس دەكرێت، سەرۆكی ئەو جوڵانەوەیە بەڕۆژنامەنوسانی وت "ئێوە بچن لەحكومەت بپرسن ئەگەر ئەو پیاوە قەرزارە بۆچی لێیوەرناگرنەوە..؟". . لەسەر كۆی یاسای چاكسازیش وتی " نابینە بەشێك لەو یاسا خراپە و گەر كۆدەنگی لەگەڵ خەڵكدا دروستبێت ئەوا بەشێوازی تر كار بۆ ڕەتكردنەوەی یاساكە دەكەینەوە". . بەوتەی سەرۆكی جوڵانەوەی نەوەی نوێ، خۆپیشاندان و جوڵانی شەقام یەكێك دەبێت لەبژاردەكانی حزبەكەی لەداهاتودا. لەسەر گرژییەكانی نێوان گۆڕان و نەوەی نوێ، شاسوار عەبدولواحید ڕایگەیاند" پارتی و یەكێتی دەیانەوێت شەڕ لەنێوان دەرەوەی لایەنەكانی خۆیاندا دروست بكات و پارتی و یەكێتی دەیانەوێ لەنیوان گۆڕان و نەوەی نوێ دا و لایەنەكاتی تردا كێشە و ناكۆكی دروست بكەن، به‌ڵام ئێمه‌ ناچینه‌ ناو ئه‌و گه‌مه‌یه‌ی پارتی و یه‌كێتی". .