گه‌ڕان

Shadow Shadow

شاره‌زایان: مالیکى و عامرى و خەزعەلى و چەند کەسایەتیەکى تر پلانەکانى سولەیمانى تەواو دەکەن

2020.01.13 - 10:18
شاره‌زایان: مالیکى و عامرى و خەزعەلى و چەند کەسایەتیەکى تر پلانەکانى سولەیمانى تەواو دەکەن
ناس كورد- ژمارەیەک لە شارەزایان و چالاکوانانى سیاسى عێراق رایانگه‌یاند، دواى کوژرانى قاسم سلێمانیش هێشتا هەژمونى ئێران لەعێراقدا بەتایبەت لەدیاریکردنى کاندیدى سەرۆکوەزیرانى نوێ کاریگەرە و چەندین کەسایەتى ترى سیاسى و میلیشیاى عێراق پلانەکانى سولەیمانى جێبه‌جێده‌كه‌ن. . بەپێى زانیارییەکانى میدیایەکى ئەمریکیش، ئەمریکا پلانێکى نوێى بۆ عێراق و ناوچەکە داناوە سیستمێکى نوێ بێتە کایەوە لەناو شەقامەوه‌ هەڵقوڵابێت. . بەلاى چاودێرانەوە، لەئێستادا ئێران سەرقاڵە لەڕێگەى ئەو کەسایەتیانەوە دۆسیەى سەرۆکوەزیرانى نوێی عێراق لەبەرژەوەندى خۆیدا یەکلابکاتەوە و قەرەبوی ئەو شکستەش بکاتەوە کە ماوەیەکە لەناوچەکەدا ڕوی تێکردووە. . هەیسەم هیتى پسپۆڕى زانستى سیاسى  لەسەر ئەو پرسە دەڵێت :"چەند کەسایەتیەکى ترى عێراقى سەر بەئێران هەوڵى ئەوە دەدەن ڕۆڵى سولەیمانى لەعێراقدا بگێڕن لەوانە نورى مالیکى و عامرى و خەزعەلى و محەمەد کەوسەرانى و چەندین بەرپرسى ترى حزبوڵاش". . ئاماژەى بۆ ئەوەش کرد، پێویستە واشنتۆن بەبێ پێشکەشکردنى پشتیوانیەکى بەهێز عێراق بەجێنەهێڵێت و ئەمجارەیان جیاواز لەڕابردو پێویستە نەخشەڕێگایەکى تر دابڕێژێت و پشتیوانى داواکارییەکانى خۆپیشاندەرانى عێراق بکات. .   ئەو پسپۆڕه‌ سیاسییەى عێراق ڕونیکردەوە، ئەمریکا كەشارەزاییەکى باشى لەکاروبارە ناوخۆییەکانى عێراقدا بۆ ماوەى 16 ساڵە هەیە و پێویستە ئەو ئەزمونەى جارێکى تر بۆ هاریکاریکردنى سەرکردەى نوێ بۆ بەڕێوەبردنى وڵات بخاتەگەڕ. . لاى خۆشیەوە هەر لەسەر ئەو پرسە، عەبدولئەمیر مەجر، مامۆستاى زانستە سیاسیەکان و چالاکوانى سیاسى عێراق کە بۆ میدیا جیهانییەکان قسەى کردووە، جەختى لەسەر ئەوە کردۆتەوە، کە پێویستە هەر دەستوەردانێکى ئێران لەدیاریکردنى سەرۆکوەزیرانێکى نوێ بۆ عێراق نەهێڵدرێت و ڕێگەش نەدرێت جارێکى تر کەسێکى تر نزیک لەو وڵاتە ئەو پۆستەى پێبدرێت چونکە ئەو کارە بەئەزمونێکى تاڵى شکستخواردودا تێپەڕێوە. . ئەو شارەزایە سیاسەش داوا دەکات، ئەمریکا لەو پرسەدا خۆى به‌دور نەگرێت و پەلەى تێدا بکات بۆ ئەو مەبەستەش پشتیوانیکردنى خۆپیشاندەران زۆر پێویستە. . مەجەر ئاماژەى بۆ ئەوەکرد، لەناوچونى قاسمى سولەیمانى وەرچەرخانێکى باش بوو بۆ ئەوەى هێزى پێچەوانەى هەژموونى ئێرانى لەعێراقدا ڕۆڵبیینن و هەروەها پەیامێکى باشیش بۆ لایەنگرانى ئەو وڵاتە لەناو کایەى باڵاى سیاسى و حوکمڕانى عێراقیدا بەوەى دەستوەردانەکانى ئێران لەڕووى ناوخۆیى و نێودەوڵەتیەوە دەبێت کۆتاییان بێت لەم ناوچەیەدا. . گەندەڵى وەک سیمبولێکى ئیرانی . بەپێى ڕاپۆرتێکى فۆرین پۆڵسى، ئەمریکا دەیەویت تێبگات لەقۆناغى داهاتووى ڕۆژهەڵاتى ناوەڕاستدا چ کارێک بکات لەوەش تێبگات چ جۆرە دەسەڵاتێک دەیەویت شەقام لەخۆى ڕازى بکات. . ئاماژە بۆ ئەوەش کراوە ، ناوى ئێران لکاوە بەگەندەڵى کۆمەڵێک سەرکردەى عێراقى و لوبنانیەوە بەشێوەیەک گەندەڵى کردووەتە سیمایەکى بازرگانى سیستمى خامنەى و گەر بێتو گەندەڵى لەو وڵاتانەدا نەمێنێت ئەوا ئەو سیستمەى ئێران خۆى هەرەس دەهێنێت، ئەمەش دەرفەتێکى باشى داوەتە ئەمریکا هەوڵەکانى خۆى لەڕێگەى پشتیوانیکردنى خواستى خۆپیشاندەرانەوە چڕ بکاتەوە. . هەر بەگوێرەى فۆرین پۆڵسیى ئیدارەى ئەمریکا سەرقاڵى تاوتوێکردنى پڕۆژەیەکە بۆ چۆنیەتى ئاراسته‌كردنی ناڕەزایەتیەکانى شەقام لەعیراق و لوبنان و چەند وڵاتیکى ناوچەکە بۆ ئەوەى ئەزمونێکى تر بەرپا بکرێت دور لەهەژموونى ئێران. .