گه‌ڕان

Shadow Shadow

ئێران بەشێوەیەک مامەڵە دەکات وەک ئەوەى هیچ شتێکى نەمابێت کە لەدەستى بدات

شکستى ستراتیژى ئەمریکا لە عێراق دواى خەرجکردنى نزیکەى ترلیۆنێک دۆلار

2020.01.01 - 14:05
 شکستى  ستراتیژى ئەمریکا لە عێراق دواى خەرجکردنى نزیکەى ترلیۆنێک دۆلار
ناس كورد- ڕۆژنامەیەکى بەریتانى هێرشکردنە سەر باڵیۆزخانەى ئەمریکا لە بەغدا بە "شکستى" ستراتیژى واشنتن دادەنێت و باس لەوەشدەکات، ئێران بەشێوەیەک مامەڵە دەکات وەک ئەوەى هیچ شتێکى نەمابێت کە لەدەستى بدات. . ڕۆژنامەی گاردیان لە ڕاپۆرتێكی ئەمڕۆ چوارشەممە، 1ی کانونی دووەمی 2019، کە لەلایەن جولیان بورگر لە واشنتۆنەوە ئامادەکراوە لەژێر ناونیشانی "هێرشكردنە سەر باڵیۆزخانەی ئەمریكا لە بەغدا شكستی ستراتیژی ئەمریكا نیشاندەدات" ئاماژەى بەوەکردووە، هێرشكردنە سەر باڵیۆزخانەكە یان مەترسی تەقاندنەوەى ئاماژەیەكە بۆ بێهێزبونی ئەمریكا. . ئەوەش خراوەتەڕوو، ڕوداوەكانی دوێنێی بەغدا مەترسیدار نەبوو بەهەمان ئاستی ڕوداوی پەلاماردانى باڵیۆزخانەی ئەمریكا لە ڕێگەی فڕۆكەوە لە سایغۆنی ڤێتنام لە ساڵی 1970 و دەستبەسەرداگرتنی باڵیۆزخانەی ئەمریكا لە تاران. . لە ڕاپۆرتەکەدا ئاماژە بەوەکراوە کە هێزە عێراقیەكان لە كۆتایی ڕوداوەكاندا گەیشتنە شوێنەكە بۆ پاراستنی باڵیۆزخانە، باڵیۆزیش لە پشوودا بوو، هەربۆیە پێویستی بەوەنەبوو بە فڕۆكە هەڵبێت لەسەر بەرزترین شوێنی باڵەخانەكەوە، هێرشەكە بە ئاشكرا بێهێزی وڵاتە یەكگرتووەكانی ئەمریكا نیشان دەدات دوای خەرجکردنى نزیکەى ترلیۆنێک دۆلار لەعێراق. . لە ڕاپۆرتەکەدا هاتووە کە "خۆپیشاندەران لە ژێر فەرمانی كەتیبەكانی حیزبوڵای نزیك لە ئێران هەڵسوکەوتیان کردووە، بە خاڵی پشكنینە حكومیەكاندا تێپەڕیون، هەروەها هێزە ئەمنیەكان كە لە پێشووتر بە تەقاندنی بۆمبی فرمێسكرێژ بەسەر ئەو خۆپیشاندەرانەی لەدژی هەژمونى ئێرانی بوون لە عێراق، هیچ هەڵوێستیان نەبووە و نەیانتوانیوە بەر بە پەلاماری سەر باڵیۆزخانەی ئەمریكا بگرن." . هەر بەپێی ڕاپۆرتەکە، ململانێكانی نێوان ئەمریكا و ئێران لەسەر هەژموونى خۆیان لە عێراق زیاتر دەبێت بە تایبەت لەگەڵ پاشەكشەی هەڕەشەكانی دەوڵەتی ئیسلامی، بەڵام هەوڵەكانی ئەمریكا بۆ وێرانكردنی ئابوری ئێران لەرێگەی هەڵمەتەكانیەوە بۆ جێبەجێكردنی فشاری ئابوری وایكردووە كە ئێران بەجۆرێك مامەڵەبکات وەک ئەوەى هیچ شتێکى نەمابێت تا لەدەستی بدات.