گه‌ڕان

Shadow Shadow
سیاسه‌تی

عێراق هەوڵى گەڕاندنەوەى 87 ملیار دۆلارى بلۆککراوى لە 55 وڵاتى جیهان دەدات

2019.12.09 - 14:01
عێراق هەوڵى گەڕاندنەوەى 87 ملیار دۆلارى بلۆککراوى لە 55 وڵاتى جیهان دەدات
ناس کورد-   دەستەى دەستپاکى عیراق ڕایگەیاند، هەوڵى گەڕاندنەوەى 87 ملیار دۆلار لە 55  وڵاتانى جیهان دەدات، کە پێش داگیرکردنى کوەیت بەپێى گرێبەستى جۆراوجۆر کەوتووەتە لاى ئەو وڵاتانە. . سەرۆکى فەرمانگەیەکى سەر بەدەستەى دەستپاکى عێراق بە ڕۆژنامەى سەباحى وتووە "یاساکانى عێراق سندوقى گەڕاندنەوەى پارەکانى سەرپشکردووە بۆ گەڕاندنەوەى ئەو پارانەى عێراق کە لەلاى وڵاتانى دیکەن، ئەوەش بەپێى یاسای ژمارە 30 ى ساڵى 2011 ى تایبەت بۆ گەڕاندنەوەى پارە و ماڵ و موڵکى عێراق و تۆمەتبارانى گەندەڵى لەدواى ساڵى 2003 بۆ ئەوەى بگەڕێنرێنەوە بۆ وڵات". . ئاماژەى بۆ ئەوەشکردووە، دواى داگیرکردنى کوەیت ئەنجومەنى ئاسایش موڵک و ماڵى عێراقى لەوڵاتانى جیهاندا بلۆک کرد تەنانەت هى ئەوانەش کەپەیوەندیان بە ڕژێمى بەعسەوە هەبوو، ئێستا ئەو پارانە ماونەتەوە، بۆ نمونە حکومەتى بەعسى ڕوخاو گرێبەستێکى لەگەڵ ئیتاڵیادا کردووە بۆ دروستکردنى 11  کەشتی جەنگى بەبڕى ملیارێک و 350 ملیۆن دۆلار پارەکەش بڕێکى بەنەوت و بڕێکى تریشى بەکاش ڕادەستکراوە. . ئەو بەرپرسەى دەستەى دەستپاکیى عێراق ڕونیشیکردووەتەوە، گرێبەستێکى تر لەگەڵ وڵاتى ئیسپانیادا واژۆ کراوە بەبڕى 11 ملیۆن دۆلار لەگەڵ وەزارەتى پیشەسازى ئەو وڵاتەدا بۆ دروستکردنى کەرەستەى پیشەسازى جیاجیا بۆ عێراق، پارەکەش ڕادەستکراوە و بەهۆى شەڕى کوەیتەوە ئەو گرێبەستەش هەڵوەشاوەتەوە، لە ئێستاشدا ئیسپانیا ئامادەى بۆ گەڕانەوەى پارەکە دەربڕیوە بەڵام لەبرى ئەو بڕە ئامادەى ڕەوانەکردنى شتومەکە.