گه‌ڕان

Shadow Shadow
سیاسه‌تی

لەبارەی دۆسیەى کوژرانى ئامانج بابانی و خێزانەکەیی و مناڵەکەى

دژەتیرۆر و دەزگا ئەمنییەکانی سلێمانی: پێویستە حکومەت و پەرلەمان داوای لێبوردنمان لێ بکەن

2019.10.17 - 18:08
دژەتیرۆر و دەزگا ئەمنییەکانی سلێمانی: پێویستە حکومەت و پەرلەمان داوای لێبوردنمان لێ بکەن
ناس کورد- دەزگای دژە تیرۆر و دەزگا ئەمنییەکانی سلێمانی، سەبارەت بە کوژرانى ئامانج بابانی و خێزانەکەی  راگەیەندراوێکیان بڵاوکردەوە و تیایدا داوا لە حکومەت و پەرلەمان و ئەو دەزگا میدیاییانە دەکات کە بەوتەى ئەوان "بۆ ناشرینکردنی ئەمنییەتی سلێمانی ڕووداوەکەیان بەلاڕێدا برد" داوای لێبوردن بکەن. . دەزگای دژە تیرۆر و لایەنە ئەمنییەکانی سلێمانی، لە راگەیەندراوەکەدا ئاماژە بەوە دەکەن "تاوانە خۆكوژییەكەی رۆژنامەنووس ئامانج بابانی و لانە محەمەدی خێزانی و منداڵەكەیان چەندە ڕووداوێكی ناخ هەژێن بوو بۆ هێزە ئەمنییەكانی سلێمانی، ئەوەندەش بەلاڕێدابردنی ئەم ڕووداوە بۆ لەكەداركردنی رۆڵەكانی دژە تیرۆر و سەرجەم هێزەئەمنییەكانی سلێمانی ، كارێكی قێزەون بوو". . ئاماژە بەوەش کراوە، بڕیاردانی حكومەت و پەرلەمان و ژمارەیەك رۆژنامەنووس و میدیا و ڕاگەیاندنی كوردی پێش لێكۆڵینەوە لە ڕووداوەكە و دەرخستەی ئەنجامەكانی ئەو كارە خۆكوژییە، خۆی لە خۆیدا تاوانێكە و كەمن ئەو كەسانەی پەنای بۆ دەبەن. . دەزگای دژە تیرۆر و دەزگا ئەمنییەکانی سلێمانی جەخت دەکەنەوە: " مەخابن ژمارەیەك بەرپرسی حكومی و پەرلەمان و دامەزراوەی میدیایی و ڕاگەیاندنی سێبەری لایەنێكی هەرێم ، لەسەرو بەندی بڵاوبوونەوەی هەواڵەكەدا بەبێ‌ زانیاری و بەڵگە تەواوی دەزگا شەرعییەكانی ئەمنی سلێمانیان كردە ئامانج و وشەی تیرۆریان نوساند بە ڕووداوەكەوە، هەر بەوەشەوە ئەم تۆمەتە نەوەستاو بگرە بكەری ئەو تاوانە ناخ هەژێنەشیان خستە پاڵ پارێزەرانی ئەمن و ئاسایشی سلێمانی". .. لە ڕاگەیەندراوەکەدا ئەوەخراوەتەڕوو، وشەی "تیرۆر" و وێناكردنی بە رووداوێكی خۆكوژی ، ترۆپكی نەزانی و نەشارەزایی ئەو كەس و لایەن و راگەیاندنانە نیشاندەدات، كە بێ‌ گەڕانەوە بۆ لایەنە پەیوەندیدارەكانی تایبەت بە لێكۆڵینەوە لە ڕووداوەكە دەستبەجێ ژمارەیەك لێدوانی نابەرپرسانەیان لە میدیاكان و تۆڕە كۆمەڵایەتییەكان بڵاوكردەوە، ئەوەش بەمەبەستی گۆڕینی كەیسی ئامانج بابانی بۆ بابەتێكی سیاسی و كردەوەیەكی تیرۆرستی، بۆ بەلاڕێدابردنی رووداوەكە و تێكدانی دۆخی ئاسایشی سلێمانی و لاواز نیشاندانی بەرپرسانی ئەمنی شارەكە. . جەخت لەوەشکراوەتەوە، بەگوێرەی سەرجەم لێکۆڵینەوەکان ئەو ڕووداوەی ئامانج بابانی و لانە محەمەد و منداڵەكەیان، لە دورو نزیكەوە پەیوەندی بە كردەوەی تیرۆرستییەوە نییە و بابەتەكە كۆمەڵایەتییە و كردەوەكەش خۆكوژ بووە، هەموو بەڵگەكانیش لەسەر روداوەكە ئەوە نیشاندەدەن، ئامانج بابانی كۆتایی بە ژیانی خێزان و منداڵەكەی پاشان خۆی هێناوە. . لە کۆتایی ڕاگەیەندراوەکەدا دژەتیرۆر و دەزگا ئەمنییەکانی سلێمانی ڕایانگەیاندووە: "ئەوەی ماوەتەوە  بڵێین، داواکارین لەهەموو ئەو كەس و لایەن و دامەزراوە میدیایی و بەرپرسە حكومییانەی، كە تۆمەتیان خستە پاڵ پارێزەرانی خاك و ئارامی شاری سلێمانی، وانەیەك لەم ڕووداوە فێربن و داوای لێبوردنیش بكەن و بە هەستی بەرپرسیارێتیشەوە لە ڕووداوەكان بڕوانن ، نەك ببنە لایەنێك بۆ تەمومژاویكردنی كۆی ئەو ڕوداوانەی كەلەهەموو كۆمەڵگایەكی جیهاندا رۆژانە ئەگەری رودانیان هەیە. .