گه‌ڕان

Shadow Shadow
سیاسه‌تی

هەولێر؛ مۆڵەتى ئەنجامدانی گردبوونەوەیەکی پشتگیری لە خۆپیشاندانەکانی گۆڕەپانی تەحریر نەدرا

2019.10.03 - 20:35
هەولێر؛ مۆڵەتى ئەنجامدانی گردبوونەوەیەکی پشتگیری لە خۆپیشاندانەکانی گۆڕەپانی تەحریر نەدرا
  ناس کورد- پەرلەمانتارێکى پێشووى عێراق رایگەیاند "بەپاساوى هەستیاری دۆخی ئەمنی کوردستان و عێراق، بەرپرسانی شاری هەولێر داوایەک بۆ گردبوونەوە و پشتگیری لە خۆپیشاندەرانی گۆڕەپانی تەحریر لە بەغدا، ڕەتکردەوە". .   جۆزیف سڵێوا، پەرلەمانتاری پێشووی عێراق، هاوکات یەکێک لە سەرپەرشتیارانى ئەو گردبوونەوەیەى کە بڕیار بوو لە شارى هەولێر ئەنجام بدرێت، تایبەت بەناس کوردی ڕاگەیاند :"بۆ پشتگیرکردن لە خۆپیشاندانەکانی شاری بەغدا و ناوچەکانی دیکەی عێراق بڕیار بوو ئەمڕۆ (پێنجشەممە)، کاتژمێر چواری ئێوارە لە پارکی سامی عەبدولڕەحمان،  گردبوونەوەیەک ئەنجام بدەین ، بەڵام بەرپرسانی شاری هەولێر مۆڵەتیان نەداینێ". . وتیشی،  بڕیار بوو گردبوونەوەکە لەلایەن کۆمەڵێک چالاکوانی مەدەنی و خوێندکارانی زانکۆ و هەڵسوڕاوانی حزبی شیوعی ئەنجام بدرێت. . سڵێوا، روونیکردەوە،  ئەوان بەدڵێکی فراوانەوە گوێڕایەڵی ڕوونکردنەوەی بەرپرسانی شارەکە بوون لە ئەنجامنەدانی گردبوونەکە، چونکە ئەوان پێیان وتوون ترسی ئەوەیان هەیە کە چەند لایەنێکی سیاسی لە هەرێمی کوردستان ئەو گردبوونەوەیە بۆ خۆیان بقۆزنەوە و بەلاڕێدا بیبەن و ئاسایشی شارەکە و هەرێمی کوردستانیش دووچاری مەترسی بکەنەوە. . نەبەز عەبدولحەمید، جێگری پارێزگاری هەولێر، تایبەت بە ناس کوردی وت :"هەموو خۆپیشاندانێک و گردبوونەوەیەک پێشوەخت پێویستی بە مۆڵەت وەرگرتن هەیە لە پارێزگاوە بۆ ئەوەی هێزە ئەمنییەکان بتوانن ئامادەکاری بۆ بکەن و ئەمنیەتی ئەو جۆرە چالاکییانە بپارێزن". . ماوەی سێ ڕۆژە ناڕەزایەتی هاوڵاتییانی عێراق پەرەی سەندووە و هاوڵاتییان لە زۆرینەی شارەکانی عێراقەوە ڕژاونەتە سەر شەقامەکان و سەرباری بچڕانی ئینتەرنێت و تۆڕە کۆمەڵایەتییەکان و ڕاگەیاندنی قەدەغەی هاتوچۆ. .