گه‌ڕان

Shadow Shadow
سیاسه‌تی

هەرێم بۆ ڕێککەوتن لەسەر بەشە بودجەی 2020ی عێراق کاتی کەمی لەبەردەستدایە

2019.08.19 - 13:09
هەرێم بۆ ڕێککەوتن لەسەر بەشە بودجەی 2020ی عێراق کاتی کەمی لەبەردەستدایە
ناس کورد- هەڤاڵ فەتاح ئەندامێکی لیژنەی دارایی پەرلەمانی عێراق ڕایگەیاند، ماوەیەکی کەم لە بەردەم حکومەتی هەرێم ماوە تا لەگەڵ بەغدا ڕێک بکەوێت، بەپێچەوانەوە کێشە بۆ پشکی هەرێم لە بودجەی گشتی 2020 عێراقدا دروست دەبێت. . ئەحمەدی حاجی ڕەشید، ئەندامی لیژنەی دارایی لە پەرلەمانی عێراق، بە ناس کوردی ڕاگەیاند: "پێویستە پڕۆژە یاسای بودجەی عێراق بە کۆمەڵێک قۆناغدا تێپەرێت، ئەگەر پڕۆژەکە بوو بە یاسا ئەوە زۆر زەحمەتە گۆڕانکاری تێدا بکرێت، بۆیە هەرێم پێویستە پێش ئەوەی پڕۆژەکە ڕەوانەی پەرلەمان بکرێت لەگەڵ بەغدا ڕێکبکەوێت." . ئەندامەکەی لیژنەی دارایی پەرلەمان وتی: بەپێی یاسای ئیدارەی دارایی عێراق، دەبێت وەزارەتی دارایی حکومەتی فیدڕاڵی، پرۆژەیاسای بوجە لەناوەراستی ئەم مانگە ئامادەبکات و ئەنجوومنەی وەزیرانیش دەنگی لەسەر بدات، لە کۆتایی مانگی ئەیلولدا پڕۆژەکە ڕەوانەی پەرلەمان بکرێت. . ئەحمەدی حاجی ڕەشید باسی لەوەکرد، ئەوە ماوەیەی کە لە بەردەستدایە دەبێت هەرێم بە زووترین کات لەگەڵ بەغدا بابەتەکانی نەوت، گومرگ و باجەکان یەکلابکاتەوە،  بە پێچەوانەوە یاسای بودجە کۆمەڵێک بڕگەی تێدا دادەنرێت کە بەدڵی هەرێم نابێت. . هەروەها باسی لەوەکرد، ساڵی ڕابردوو بەهۆی ئەوەی گومانی ئەوەکرا کە ئەو پڕۆژە یاسایەی دەنگی لەسەر دراوە لەگەڵ ئەو پڕۆژەیەی ڕەوانەی پەرلەمان کراوە جیاواز بووە ئەمساڵ پەرلەمانتاران زیاتر چاوکراوەن و ڕێگەنادەن هاوشێوەی ساڵی ڕابردوو پڕۆژەکە تێپەڕێت. . ئەو ئەندامە کوردەی لیژنەی دارایی پەرلەمانی عێراق لەبارەی بەرەوپێشچوونی گفتوگۆکانی هەرێم و بەغدا وتی: "هیچ ئاگاداری ئەو شاندانە نیم، زانیاریشمان لە سەر ئەو نییە چ ڕێککەوتنێک  کراوە، بە هیچ جۆرێکیش  ئاگاداری هاتن و ڕۆیشتنی شاندەکان هەردوولا نیین".