گه‌ڕان

Shadow Shadow
سیاسه‌تی

  کوڕەکەی بن لادن لەسەرووی لیستەکەدایە

ئەمریکا 58 ملیۆن دۆلار بۆ زانیاریی لەسەر سەرکردەکانی قاعیدە و داعش تەرخان دەکات

2019.03.02 - 09:49
ئەمریکا 58 ملیۆن دۆلار بۆ زانیاریی لەسەر سەرکردەکانی قاعیدە و داعش تەرخان دەکات

 

 

ناس کورد-

 

ویلایەتە یەکگرتووەکانی ئەمریکا بڕە پارەیەکی زۆری تەرخانکردووە بۆ هەر کەسێک کە زانیاریی لەسەر سەرکردەکانی قاعیدە و داعش-یان پێ بدات، لەسەروو ناوی داواکراوەکانیشەوە کوڕێکی ئوسامە بن لادن دەبینرێت.

 

 بە كوشتنی ئوسامە بن لادن ئەمیری ڕێكخراوی قاعیدە لە ساڵی  2011، پەیوەندیەكانی  نێوان سەركردەكانی  ئەو ریكخراوەو بنەمالەی بن لادن نەپچڕا و ئێستا کوڕە گورەکەی سەرکردەی پێشووی قاعیدە یەکێکە لە ڕابەرانی ئەو ڕێکخراوە توندڕەوە.

  وەزارتی دەرەوی ئەمریكا لە ڕاگەیاندراویكدا حەمزەی کوڕی ئوسامە بن لادنی بە یەکێک دیاریترین سەركردەكانی  ئەو ڕێكخراوەی لە قەڵەمداوە و بڕی یەک ملیون دۆلاری وەك خەڵات داناوە بۆ هەركەسێك زانیاری لەسەر شوێنەکەی بدات.

حەمزە لە ساڵی 2015 بەهەمان شێوەی باوكی لە چەند تۆمارێکی دەنگییدا دەركەوت، کە داوای لە "موجاهدینەکانی" ڕێكخراوی قاعیدە دەكات  تۆڵەی باوكی بكەنەوە بە ئەنجامدانی هێرش دژ بە ئەمریكا لە هەموو جیهاندا.

جگە لە حەمزە، لە لیستی داواکراوەکانی ئەمریکادا ناوی چەند سەرکردەیەکی دیکەی ڕێکخراوی قاعیدە و ڕێکخراوە توندڕەوەکانی دیکەش دەبینرێن. لەوانە ئەیمەن  زەواهیریی کەسی یەکەمی قاعیدە کە 25 ملیۆن دۆلار بۆ تەرخانکراوە، هەروەها ئەبوبەکر بەغدادی کەسی یەکەمی داعش 10 ملیۆن دۆلاری بۆ تەرخان کراوە.

هەروەها لە لیستەکەدا ناوی هەیەک لە ئەبو قاسم ڕیمی فەرماندەی قاعیدە لە یەمەن، ئەبوبەکر شیکاو فەرماندەی ڕێکخراوی بۆکۆحەرام لە نایجیریا و خالید سەعید باترفی فەرماندەی قاعیدە لە نیمچە دوورگەی عەرەبی دەبینرێن.