گه‌ڕان

Shadow Shadow
چیرۆكه‌كانمان

بەبیانووی وێنەگرتن مۆبایلێكی زۆری خوێندكاران دەستی بەسەردا گیراوە

خوێندكارانی ناڕازی زانكۆی سلێمانی: سێ‌ خوێندكارمان لەلایەن ئاسایشەوە دەستگیركراوون

2019.04.01 - 12:57
خوێندكارانی ناڕازی زانكۆی سلێمانی: سێ‌ خوێندكارمان لەلایەن ئاسایشەوە دەستگیركراوون

ناس كورد- شۆڕش محەمەد

ژمارەیەك لە خوێندكاری زانكۆی سلێمانی بۆ داواكردنی دەرماڵە و لابردنی باج و رسومات لەبەردەم زانكۆ گردبوونەوە و بەوتەی سەرپەرشتیارانی گردبوونەوەكە هێزێكی زۆری ئاسایشی سلێمانی رێگرییان لەگردبوونەوەكە كرد و سێ‌ خوێندكاریان دەستگیركرد.

گمۆ محەمەد یەكێك لەسەرپەرشتیارانی خوێندكارانی ناڕازی زانكۆی سلێمانی تایبەت بە ناس كورد-ی ڕاگەیاند "كاتژمێر 9ی بەیانی لەبەردەم زانكۆی سلێمانی ئامادەبووین بۆ ئەوەی خۆپیشاندانی سەرتاسەری زانكۆی سلێمانی ئەنجام بدەین".

ئاماژە بەوە دەكات كە چوونەتە بەردەم زانكۆی سلێمانی هێزێكی زۆری ئاسایش لەوێ‌ بووە و هێزەكەی ئاسایش رێگری لێكردوون ئەو خێمانە دابنێن كە بۆ مانەوە و مانگرتن ئامادەیان كردبوو.

بەوتەی گمۆ محەمەد "لەلایەن هێزەكانی ئاسایشی سلێمانییەوە سێ‌ خوێندكار لەگردبوونەوەكە گیراوە و تائێستا بێسەروشوێنن".

ئەو سەرپەرشتیارەی گردبوونەوەكە روونیدەكاتەوە كە لەلایەن هێزەكانی ئاسایشەوە ژمارەیەكی زۆری مۆبایلی خوێندكاران بە بیانووی وێنەگرتن، دەستی بەسەردا گیراوە.

"هێزەكانی ئاسایش رێگەمان پێ‌ نادەن لەبەردەم زانكۆی سلێمانی گردبینەوە و دەڵێن دەبێت بچنەوە ناو زانكۆ" گمۆ محەمەد وای وت.

ئەو هەڵسوكەوتەكەی هێزەكانی ئاسایشی بە سوكایەتی و دەستدرێژیكردنە سەر حەرەمی زانكۆی سلێمانی وێنا كرد و جەختی لەسەر ئەوە كردەوە "زانكۆكانی هەرێمی كوردستان پیرۆزیی خۆیان هەیە و بۆ هیچ هێزێك نییە لەژێر هیچ پاساوێكدا مامەڵەی لەو جۆرە لەگەڵ خوێندكارانی زانكۆ بكات".

وتیشی "تا ئەو كاتەی داواكارییەكانمان لەدەرماڵە و لەلابردنی باج و رسومات و دامەزراندنی یەكەمەكانی زانكۆكان جێبەجێ‌ دەبێت، بەردەوام دەبین لەگردبوونەوە و ناڕەزایەتییەكانمان".