گه‌ڕان

Shadow Shadow
سیاسه‌تی

تورکیا شکستی هێنا لە هاتنە ناوەوەی بۆ مەنبەج

فەرماندەی هەسەدە: مانه‌وه‌ى 400 سه‌رباز گەرەنتی سه‌رهه‌ڵنه‌دانه‌وه‌ى داعش ناكات

2019.04.01 - 08:45
فەرماندەی هەسەدە: مانه‌وه‌ى 400 سه‌رباز گەرەنتی سه‌رهه‌ڵنه‌دانه‌وه‌ى داعش ناكات

ناس كورد-

 

فەرماندەی هێزەکانی سوریای دیموکرات ڕایدەگەیەنێت، تورکیا شکستی هێناوە لە هاتنە ناوەوە بۆ شارۆچکەی مەنبج  و ناوچه‌كانى باكور و ڕۆژهه‌ڵاتى سوریا، جەختیش دەکاتەوە کە مانەوەی 400 سەربازی ئەمریکی لە سوریا بەس نییە بۆ گەرەنتی لەناوبردنی رێکخراوی چه‌كدارى داعش و سەرهەڵدانەوەی.

 

مەزڵوم کۆبانێ، فەرماندەی هێزەکانی سوریای دیموکرات لە لێدوانێکدا بە پێگه‌ى سكاى نیوزى ڕاگه‌یاندووە، هێزەکان سوریای دیموكرات خوازیاری هیچ جەنگێک نین لەگەڵ تورکیا و گروپه‌ چه‌كداره‌كانى نزیك له‌و وڵاته‌، ئه‌و ده‌ڵێت، "توركیا شکستی هێناوە لە هاتنەناوەوە بۆ شارۆچکەی منبج".

 

ده‌رباره‌ى مانه‌وه‌ى هێزه‌كانى ئه‌مریكا له‌ خاكى سوریا، فه‌رمانده‌كه‌ى هه‌ده‌سه‌ دەڵێت: "مانەوەی 400 سەربازی ئەمریکی لە رۆژئاوای کوردستان بەس نییە بۆ گەرەنتی لەناوبردنی رێکخراوی چه‌كدارى داعش و هەروەها مەترسی دوبارە سەرهەڵنەدانەوە ئەو رێکخراوە لە ناوچەکە".

 

شەڕڤانانی هێزەکانی سوریای دیموکرات، له‌ 22ى ئادار2019، سه‌ركه‌وتنى به‌سه‌ر ڕێكخراوى داعش ڕاگەیاند و تەواوی ئەو ناوچانەیان کۆنترۆڵکردەوە کە لەماوەی چوار ساڵی ڕابردوودا لەژێر کۆنترۆڵی ئەو ڕێکخراوەدابوون.