گه‌ڕان

Shadow Shadow
چیرۆكه‌كانمان

کورد دەبێت گەورەتر بیر بکاتەوە

هەڵبژاردنی شارەوانییەکانی تورکیا تا چەند بۆ کورد گرنگە؟

2019.03.31 - 11:57
هەڵبژاردنی شارەوانییەکانی تورکیا تا چەند بۆ کورد گرنگە؟

ناس کورد- شەهرام عەزیز

ئەمڕۆ یەکشەممە 31ی ئازاری 2019 هاوڵاتیانی تورکیا ڕویانکردە سندوقەکانی دەنگدانی ئەو وڵاتە بۆ هەڵبژاردنی نوێنەرەکانیان لە شارەوانییەکان، چاودێرێکی سیاسی پێیوایە، ئەم هەڵبژاردنە گرنگییەکی زۆری بۆ کورد هەیە، بەڵام پێی وایە کوردی باکور لە ڕێگەی شارەوەنییەکانەوە ناتوانن بە مافەکانی خۆیان بگەن.

ئەبوبەکر کاروانی، چاودێری سیاسی تایبەت بە ناس کورد-ی ڕاگەیاند: "هەڵبژاردنی شارەوانییەکانی تورکیا بۆ کورد زۆر گرنگە بەو پێیەی پەیوەندی تەواوی بە هەڵبژاردنی پەرلەمانی تورکیاوە هەیە و ئەگەر (هەدەپە) کە گەورەترین پارتی سیاسی کوردییە لە تورکیا، نەتوانێت لەم هەڵبژاردنەدا سەرکەوتوو بێت و دەنگەکانی زیاد نەکات، ئەوا لە هەڵبژاردنی پەرلەمانیشدا ناتوانێت کورسییەکانی زیاد بکات".

 

ئەبوبەکر کاروانی ئاماژە بەوە دەکات، دەڵێت بەدەستهێنانی زۆرترین شارەوانی بۆ کورد گرنگە و دەتوانن خۆیان حوکمی خۆیان بکەن لە ناوچەکانی خۆیاندا، لە هەمانکاتدا ئاماژەش بەوە دەکات: "کورد لە باکور کێشەی ئاو و کارەبا و خزمەتگوزاری نییە، بەڵکو کێشەی سیاسی و دۆزی کورد و زمان و نەتەوەی هەیە، بێگومان ئەو کێشانەش لە شارەوانییەکانەوە چارەسەر ناکرێت، بەڵکو لە پەرلەمانەوە هەوڵی بۆ دەدرێت،  پێویستە کوردی باکور گەورەتر لە کێشەی خزمەتگوزاری بیربکاتەوە و ئەو کێشانە لە پەرلەمانەوە چارەسەر بکات و پێویستە هەوڵی بەدەستهێنانی بدات".

 

سەبارەت بە سیاسەتی (هەدەپە) لە باکوری کوردستان ئەو چاودێرە سیاسیە ئاماژەی بەوەکرد، لە ڕابردوودا (هەدەپە) چەند هەڵەیەکی کرد، بەڵام بۆ ئەم هەڵبژاردنە جیاواز لە ڕابردوو توانی لایەنە کوردییەکانی دیکەی باکور نزیک بکاتەوە لە خۆی و چاوەڕێدەکرێت دەنگەکانی لە ڕابردوو زیاتر بێت.

 

لە لایەکی دیکەوە، عەبد ئیکە نوێنەری (هەدەپە) لە هەرێمی کوردستان تێڕوانینێکی جیاوازی هەیە لە بەرامبەر گرنگی هەڵبژاردنەکە بۆ کورد و لە لێدوانێکی تایبەتدا بۆ ناس کورد ڕایگەیاند: "هەڵبژاردنی شارەوانییەکان بۆ کورد لە هەڵبژاردنی پەرلەمان گرنگترە، چونکە بە بەدەستهێنانی زۆرترین شارەوانی، خەڵکی سنوری ئەو شارەوانییانە خۆیان حوکمی خۆیان دەکەن و سنوری خۆیان بەڕێوە دەبەن، بەڵام لە پەرلەمانەوە هەندێک جار لە ئەنقەرەوە بڕیاریک دژی کورد دەدرێت و ناشتوانرێت ڕێگری لێبکرێت".

 

نوێنەرەکەی هەدەپە لە هەرێم ئاماژەی بەوەشکرد، لە ئێستا 104 شارەوانیان هەیە و بۆ ئەم هەڵبژاردنە ئامادەکاریان کردووە 130 شارەوانی بەدەستبهێنین.

 

لە هەڵبژاردنی ئەمڕۆدا 57 ملیۆن دەنگدەر بەشداری لە هەڵبژاردنی شارەوانییەکان دەکەن،

لە هەڵبژاردنەكەدا 12 پارتی سیاسی بەشدارن لە كێبركێكەدا و لە 194 هەزار و 390 سندوق دەنگ دەدەن.