گه‌ڕان

Shadow Shadow
چیرۆكه‌كانمان

وردەكاری و ئاماری هەڵبژاردنەکە

سبەینێ لە تورکیا هەڵبژاردنێکی چارەنوسساز بەڕێوەدەچیت

2019.03.30 - 21:21
App store icon Play store icon Play store icon
سبەینێ لە تورکیا هەڵبژاردنێکی چارەنوسساز بەڕێوەدەچیت

کەناڵی ناس کورد لە تێلیگرام جۆین بکە   

ناس کورد-

 

سبەینێ لە سەرانسەری تورکیادا 57 ملیۆن هاوڵاتی مافی هەڵبژاردنی هەزاران کاندیدیان هەیە بۆ ئیدارە خۆجێییەکان کە بۆ ماوەی پێنج ساڵی داهاتوو بەرکەوتنی ڕاستەوخۆیان لەگەڵ خەڵکدا دەبێت.

لە هەڵبژاردنکەی سبەینێدا 12 پارتی سیاسی بەشدارن لە كێبركێكەدا و لە زۆربەی شارەکان ململانێی توند لە نێوان کاندیدی پارتە گەورەکاندا هەیە.

بەپێی ئامارەکانی دامەزراوەی باڵای هەڵبژاردنەكانی توركیا، یەك ملیۆن و 156 هەزار دەنگدەر كە 18 ساڵیان تەواو كردووە بۆ یەكەمجارە بەشداری دەكەن لە هەڵبژاردندا، 38 ملیۆن و 929 هەزار و 732 دەنگدەر مێ، 28 ملیۆن و 218 هەزارو 904 یان نێرن، كە سەرجەم 57 ملیۆن و 58 هەزار و 636 دەنگدەرن و دەچنە سەر 194 هەزار و 390 سندوق.

 

پارتە بەشدارەکانی هەڵبژاردنەکەی سبەینێ

لە هەڵبژاردنەکەی سبەینێدا 12 پارت بەشداریی دەکەن کە بریتین لە؛ پارتی داد و گەشەپێدان، پارتی سەربەخۆیی توركیا، پارتی یەكگرتووی مەزن، پارتی گەلی كۆماری، پارتی دیموكرات، پارتی چەپی دیموكراتیك، پارتی دیموكراتی گەلان، پارتی ئیی، پارتی بزووتنەوەی نەتەوەپەرستی، پارتی سەعادەت، پارتی كۆمۆنیستی توركیا، پارتی نیشتیمان، بەشدارن لە كێبركێكەدا.

 

ژمارەی سندووقەکانی هەڵبژاردن

جگە لەو سندوقانەی لە بەندینخانەكاندا دادەنرێت لە 30  شارەوانی گەورە 44 ملیۆن و 212 هەزار و 704 دەنگدەر لە 142 هەزارو777 سندوقدا دەنگ دەدەن، لە 51 پارێزگاكەی تریشدا 12 ملیۆن و 837 هەزار و 77 دەنگدەر لەسەر 51 هەزارو 851 سندوق دەنگ دەدەن.

 

 

دەنگدەرانی گەورەشارەكان چەند کاندید هەڵدەبژێرن؟

دەنگدەرانی ئادانا، ئەنقەرە، ئەنتاڵیا، ئایدن، باڵكەسیر، بورسا، دەنیزلی، دیاربەكر، ئەرزوڕووم، ئێسكیشەهر، عەنتاب، هاتای، ئیستانبول، ئیستانبوڵ، ئیزمیر، ماراش، قەیسەری، كۆجائەلی، كۆنیا، ماڵاتیا، مانیسا، ماردین، مێرسین، موغڵا، ئۆردو، ساكاریا، سامسون، ئورفا، تەكیرداغ، ترابزۆن و وان، دەنگ بۆ هەڵبژاردنی سەرۆكی گەورە شارەوانی، سەرۆكی شارەوانی، ئەندامانی ئەنجوومەنی شارەوانی، موختار و دەستەی ریشسپیان دەدەن.

 

دەنگدەرانی شارە بچووکەکان و گوندەکان چەند کاندید هەڵدەبژێرن؟

دەنگدەری ئەو شارانەی گەورەشار نین، دەنگ بۆ هەڵبژاردنی سەرۆكی شارەوانی، ئەندامانی ئەنجوومەنی شارەوانی، موختار و دەستەی ریشسپیان دەدەن. هەروەها دەنگدەری گوندەكان دەنگ بۆ هەڵبژاردنی ئەندامانی ئەنجوومەنی گشتیی شار، موختار و دەستەی ریشسپیان دەدەن.

 

ڕەنگی کارتەکانی دەنگدان جیاواز دەبێت

كارتی دەنگدان بۆ سەرۆكایەتی گەورە شارەوانی رەنگی "سپی"، بۆ ئەندامێتی ئەنجوومەنی گشتیی پارێزگا "پرتەقاڵی"، بۆ سەرۆكایەتی شارەوانی "شین" و بۆ ئەندامی ئەنجوومەنی شارەوانی "زەرد"ە و سەرجەم كارتەكانی دەنگدان لە یەك زەرفدا دادەنرێن.

 

کاتی دەستپێکردنی دەنگدان بەپێی شارەکان دەگۆڕێت

بەپێی بریاری دامەزراوەی باڵای هەڵبژاردنەكانی توركیا، دەنگدان لە پارێزگاكانی ئادیامان، ئاگری، ئارتڤین، بینگۆل، بەدلیس، دیاربەكر، ئەلازیغ، ئەرزینجان، ئەرزەڕووم، عەنتاب، گیرەسون، گوموشهانە، هەكاری، قەرس، ماڵاتیا، ماراش، ماردین، مووش، ئۆردو، ریزە، سێرت، سیڤاس، ترابزۆن، دێرسم، ئورفا، وان، بایبورت، باتمان، شڕناخ، ئەردەخان، ئیغدر، كلیس و گرتووخانەكانی ناو ئەو پارێزگایانە كاتژمێر 07:00 دەستپێدەكات و كاتژمێر 16:00 تەواودەبێت. جگە لەو پارێزگایانە لە پارێزگاكانی دیكە كاتەكانی دەنگدان لە نێوان 08:00 بۆ 17:00ه.

 

سندووقی گەڕۆکیش دابینکراوە

لەم هەڵبژاردنەدا سندوقی گەرۆك بۆ ئەو دەنگدەرانەی دانراوە كە بەهۆی نەخۆشی و و كەم ئەندامێتییەوە لە جێگادا كەوتوون. ئەو دەنگدەرانە دەتوانن لەو سندوقی گەڕۆكانەدا دەنگەكانیان بدەن. ئەو پەیڕەوەش بۆ یەكەمجار لە هەلبژاردنی سەرۆكایەتی كۆمار و 27ـەمین هەڵبژاردنی گشتیی 24ی حوزەیرانی 2018دا بەكارهێنرا و، لە هەڵبژاردنە شارەوانەكانیشدا ئەوە دووەمین جارە بەكاردەهێنریت.

 

وادەی جیاکردنەوەی دەنگەکان

لەو پارێزگایانەی كاتەكانی دەنگدان تیایاندا 07:00-16:00ە، كاتژمێر 16:00 دەست بە جیاكردنەوە و ئەژماركردنی دەنگەكان دەكرێت و لە پارێزگاكانی دیكەدا لە پێش كاتژمێر 17:00 دەستپێناكات. تەنانەت ئەگەر تەواوی دەنگدەری ناو لیستەكانیش هەموو دەنگ بدەن، ئەوا ناتوانرێت پێش تەواوبوونی وادەی دەنگدانەكە سندوقەكان بكرێنەوە.

 

سەرەتا دەنگی كێ دەژمێردرێت؟

لە گەورەشارەكان بە دوای یەكدا كارتی دەنگەكانی سەرۆكایەتی شارەوانی گەورەشارەكان، سەرۆكایەتی شارەوانی، ئەندامانی ئەنجوومەنی شارەوانی و موختارەكان دەژمێردرێت، لە پارێزگاكانی دیكەیش بە دوای یەكدا سەرۆكایەتی شارەوانی، ئەندامانی ئەنجوومەنی شارەوانی ئەندامانی ئەنجوومەنی گشتی پارێزگا و موختارەكان دەژمێردرێت.

 

سەرەتا كێ دەنگ دەدات؟

لە سەرەتادا بێ ئەوەی لە ریز بوەستن ژنانی دووگیان، كەسانی نەخۆش و خاوەن پێداویستی تایبەت دەنگ دەدەن. رێگا بە بەساڵاچووانیش دەدرێت بێئەوەی لە ریزدا بوەستن دەنگی خۆیان بدەن. هەروەها رێگە بەو دەنگدەرانەش دەدرێت كە یارمەتی دەنگدەرانی دیكە دەدەن لە كاتی دەنگداندا سەرەتا دەنگ بدەن. هێنانی ئامێرەكانی تۆماركردن و گرتە گرتنی وەك مۆبایل، كامێرا و زانیاریدان قەدەغەیە.

 

لە چ كاتێكدا دەنگەكان پوچەڵ دەكرێنەوە؟

ئەو كاغەزانەی شێوە و رەنگیان ئەو كاغەزانە نەبێت كە لە سەر سندوق بە دەنگدەران دەدرێت، یان بە نووسینی ئاوی هێمای "دامەزراوەی باڵای هەڵبژاردنی كۆماری توركیا"ی لەسەر نەبێ یاخود هێمای دامەزراوەی باڵای هەڵبژاردنی لەسەر نەبێ و جگە لە مۆری لیژنەی هەڵبژاردنی قەزا و لیژنەی سندوق هەر جۆرە مۆر، واژوو، نووسین، پەنجەمۆر و هێمایەكی پێوە بێت دەنگەكە دەسوتێندرێت و پوچەڵ دەكرێتەوە.