گه‌ڕان

Shadow Shadow
چیرۆكه‌كانمان

داوای زیادکردنی مووچەی خاوەنپێداویستییە تایبەتەکان دەکرێت

یەکێتی کەمئەندامان: دەرگای خۆتۆمارکردنی خاوەنپێداویستییە تایبەتەکان دەکرێتەوە

2019.03.28 - 13:09
یەکێتی کەمئەندامان: دەرگای خۆتۆمارکردنی خاوەنپێداویستییە تایبەتەکان دەکرێتەوە

ناس کورد- هەڤاڵ فەتاح

یەکێتی کەمئەندامانی کوردستان داوادەکات یاسای کەمئەندامانی هەرێمی کوردستان هەمواربکرێتەوە، سكرتیری یەکێتییەکەش دەڵێت ئەو مووچەیەی خاوەن پێداویستییە تایبەتەکان وەری دەگرن زۆر کەمە و داوا دەکات زیادبکرێت بۆ 300 هەزار دینار.

 

سامان حسێن سكرتێری یەكێتی كەمئەندامانی کوردستان بە ناس كورد-ی ڕاگەیاند: "دۆخی كەمئەندامان لە چەند ساڵی ڕابردوودا زۆر خراپ بوو، هیچ كاتێكش حكومەت لە ئاستی داخوازییەكانی ئێمەی كەمئەندامان نەبووە، ئەو مووچەیەشی دەدرێت بەو چینە زۆر كەمە، ناتوانێت پێداویستییە سەرەتایەكانیشیان دابین بكات".

 

بڕیاری سیستمی پاشەکەوت، خاوەن پێداویستییە تایبەتەکانیشی گرتەوە، لە بارەی باشبوونی دۆخی ئێستای خاوەن پێداویستییە تایبەتەکان پاش لابردنی پاشەکەوت، سكرتێری یەکێتی كەمئەندامان دەڵێت: "پاش لابردنی پاشەكەوت، مووچەی کەمئەندامان لە 60 هەزارەوە گەڕاوەتەوە بۆ 100 هەزار، ئەو مووچانەشی كە 120 هەزاربوون، بوونەتەوە بە 150 هەزار دینار، ئەو مووچانە زۆر کەمن و بەهیچ شێوەیەك پێویستییەكانی كەمئەندامان پڕناكاتەوە، دەبێت مووچەکانیان کەمتر نەبێت لە 300 هەزار دینار".

 

لە خولی پێشووی پەرلەمانی کوردستان، هەوڵدرا لە ڕێی پرۆژە یاسایەکەوە، مووچەی کەمئەندامان زیاد بکرێت بەڵام هەوڵەکە سەرکەوتوو نەبوو، سامان حسێن باسی لەوەکرد، بۆ ئەم خولەش پرۆژەیان پێشکەش پەرلەمان کردووە بۆ هەموارکردنەوەی یاسای کەمئەندامان، تیایدا داوادەکەن مووچەی خاوەنپێدایستییە تایبەتەکان زیادبکرێت.

 

پاش ئەوەی دەرگای خۆتۆمارکردنی خاوەن پێداویستییە تایبەتەکان داخرا، بە گوێرەی زانیارییەکانی سکرتێری یەکێتی کەمئەندامان، بڕیارە بەم نزیکانە جارێکی تر دەرگای تۆمارکردنی خاوەن پێداویستییە تایبەتەکان بۆ وەرگرتنی مووچە بکرێتەوە.