گه‌ڕان

Shadow Shadow

لەبارەی فەتواكەوە..

2019.12.09 - 16:57

بیروڕا- خانم ڕەحیم سەرباری هەر سەرنج و تێبینییەك لەسەر دۆخی ژنان، لە 16 ڕۆژ چالاكی بۆ بەرەنگاربوونەوەی توندووتیژی دژی ژنان، جێگەی دڵخۆشی بوو كە سەرۆكی حكومەت و جێگرەكەی ئەمساڵ بە گرنگییەكی زیاتر و جیاوازترەوە بەشداری ئەم بۆنەیەیان كرد، بەڵام بەداخەوە لەگەڵ ئەوەى 16 ڕۆژەكە تێنەپەریبوو، لیژنەی باڵای فەتوا، بە فەتوایەك لەبارەی بەكارهێنانی تاکسییەوە لەلایەن ژنانەوە، كۆمەڵێك پێشێلكاری كرد نەك تەنها بە مافی ژنان، بەڵكو بە ماف و ئەركی حكومەت و دامەزراوەكانی تریش. , گەر خۆ لەوە ببوێرین، باس لەوە بكەین لە ئیدارە و سیستمی پەرلەمانی، ژیانی هاوڵاتییان بە یاسا ڕێكدەخرێت و ئەركی پەرلەمانە یاسا دەربكات و چاودێری حكومەت بكات، ئەوا ئەركی دامەزراوەكانی تری حكومەتیش ئەوەیە لە سایەی یاسادا مامەڵە لەگەڵ هەر پرسێك بکەن، كە تایبەتن بە ژیانی گشتی، یاخود ئەرك و مافەكانی هاوڵاتییان بەتایبەت. , ئەگەر ئەركی لیژنەی فەتواش ئەوە بێت كە ڕۆبچێتە خوارەوە تا ئاستی ئەوەی وردەكاری بۆ چۆنیەتی بەكارهێنانی تاکسی لەلایەن ژنانەوە دیاری بكات، ئەی ئەبێت ئیتر ئەركی پەرلەمان و حكومەت و وەزارەتە تایبەتمەندەكانی تر چی بێت، بەتایبەتی ئەم فەتوایە لەكاتێكدایە، وەزارەتێكی گەورە و گران لە هەرێم هەیە بەناوی وەزارەتی ئەوقاف و كاروباری ئاینی!. , دەكرێت لیژنەی باڵای فەتوا، لەسەر داوای پەرلەمان و حكومەت بۆ پرسێكی ئاینی، یان بۆ پرسێكی عاسی بوو لە دەستی وەزارەت و حكومەت و پەرلەمان، بە هەماهەنگی لەگەڵ لایەنی پەیوەندیدار، ڕاوێژیان لەگەڵ بكرێت لەسەر پرسێكی دیایریكراو، بەڵام هەرگیز پەسەند نییە، سەرباری بوونی ئەم هەموو دامەزراوە تایبەت بە پرسەكانی ژنان و باری كۆمەڵایەتی، سەرباری فرێدان و بەڵێنی ئەو هەموو دەستەواژانەی باسی مەدەنییەت و ئازادی دەكەن، چەند مامۆستایەكی ئاینی ببنە دەمراستی كۆمەڵگە و بریارێكی یەكلاكەرەوە لەبارەی پرسێكەوە بدەن كە ڕۆژانە لە هەرێم بە دەیان هەزار جار دووبارە و سێ‌ بارە دەبێتەوە. , بۆیە ئەركی حكومەت و پەرلەمانە لەبەرامبەر ئەم فەتوایە بێدەنگ نەبن و رێگاچارەیەكی ڕیشەیی بۆ ئەركی لیژنەی باڵای فەتوا بدۆزنەوە، نەبا بۆ پرسێكی دی، سەربەخۆ فەتوای تر بدەن، چونكە ئەوان لەكۆتاییدا بەناوی ئاینەوە فەتوا دەدەن نەك وەك ڕای چەند مامۆستایەكی ئاینی. , ئەركی حكومەتە پێش رێكخراوە مەدەنییەكان لەوبارەوە هەڵوێستی هەبێت، چونكە گەر بەشێكی ئەم فەتوایە، بۆ بەرتەسككردنەوەی ئازادی ژنان و هەڵسوكەوتی بەردەم تاك و دروستكردنی دردۆنگی بێت لەنێون هەردوو رەگەز، ئەوا بەشەكەی تری فەتواكە، كەمبایەخكردنی ڕۆڵی پەرلەمان و حكومەت و دامەزاوە تایبەتمەندەكانییەتی. , ,