گه‌ڕان

Shadow Shadow
سیاسه‌تی

عەبادی بەرامبەر پێشمەرگە و گەلی کوردستان بێوەفا بوو

بارەگای مەسعود بارزانی وەڵامی لێدوانەکانی حەیدەر عەبادی دەداتەوە

2019.03.26 - 16:13
بارەگای مەسعود بارزانی وەڵامی لێدوانەکانی حەیدەر عەبادی دەداتەوە

 

 

 

 

ناس کورد-

 

باره‌گای مەسعود بارزانی وه‌ڵامی وته‌كانی حه‌یده‌ر عه‌بادی سه‌رۆك وه‌زیرانى پێشووى عێراق ده‌داته‌وه‌ ڕایدەگەیەنێت "وته‌كانی عه‌بادی بۆ هەندێ قەزاوەت و قسەی نابەجێی لەبارەی كەركووك و پێشمەرگە و گەلی كوردستان خستووتەڕوو، كە مەبەست لێی تێكدانی ئەو كەشە ئیجابیەیە كە لە دوای هەڵبژاردنەكانی عێراق لە نێوان هەرێم و بەغدا هاتووەتە ئاراوە و بۆ مەرامی تاكەكەسی ئەو قسانەی كردووە."

 

لەو وەڵامە کە لە پێگەی فەرمی بارزانی بڵاوکراوەتەوە هاتووە: "عەبادی كەسێكی بێ وەفا بوو بەرانبەر پێشمەرگە و گەلی كوردستان. ئەگەر پێشمەرگە نەبا كەسێكی وەك ئەو هەرگیز چاوی بە موسڵ نەدەكەوت بۆ ئەوەی بتوانێ سەركەوتن بەسەر داعش لە موسڵ بۆ خۆی بدزێت و خۆی پێ هەڵكێشێ."

 

 

ده‌قی وه‌ڵامه‌كه‌ی باره‌گای بارزانی بۆ عه‌بادی:

 

حەیدەر عەبادی، سەرۆكی یەكێك لە كوتلەكانی ناو ئەنجوومەنی نوێنەرانی عێراق, لە چاوپێكەوتنێكیدا لە گەڵ تەلەفزیۆنی دیجلە, كە ڕۆژی شەممە 23ـی 3ـی 2019 بڵاوكراوەتەوە، بەداخەوە هەندێ قەزاوەت و قسەی نابەجێی لەبارەی كەركووك و پێشمەرگە و گەلی كوردستان خستووتەڕوو, كە مەبەست لێی تێكدانی ئەو كەشە ئیجابیەیە كە لە دوای هەڵبژاردنەكانی عێراق لە نێوان هەرێم و بەغدا هاتووەتە ئاراوە و بۆ مەرامی تاكەكەسی ئەو قسانەی كردووە.

 

بۆ هەموو لایەك ڕوونە كە پێكهاتەكانی عێراق لە هەڵبژاردنەكاندا عەبادی و هەموو ئەوانەی تریان سزا دا كە بەنیازی شەڕی ناوخۆ و تێكدانی پێكەوەژیان بوون و لە بەرانبەر گەلی كوردستان حاقد بوون و پێشێلكاریی دەستووری و تاوانیان لە كەركووك و دوز ئەنجام دا و لە هەمانكاتدا گەلی كوردستانیش لە هەڵبژاردنی پارلەمانی كوردستاندا پاداشی پێشمەرگە و بەرگریكارانی كوردستانیان دایەوە.

 

 عەبادی كەسێكی بێ وەفا بوو بەرانبەر پێشمەرگە و گەلی كوردستان. ئەگەر پێشمەرگە نەبا كەسێكی وەك ئەو هەرگیز چاوی بە موسڵ نەدەكەوت بۆ ئەوەی بتوانێ سەركەوتن بەسەر داعش لە موسڵ بۆ خۆی بدزێت و خۆی پێ هەڵكێشێ.

 

بەلای گەلی كوردستانیش ئەو لایەنە كوردیانەی عەبادی بە توندڕەو وەسفی دەكات دڵسۆز و نیشتیمانپەروەرن و، ئەوانەی تەنسیقیان لەگەڵ عەبادی كرد ئەوان خائین و نیشتیمانفرۆشن. ئەوەی بەلای ئێمەوە گرنگە ڕای گەلی كوردستانە و هەڵسەنگاندنی خەڵكی حاقید هیچ بەهایەكی نییە.

 

هێزی پێشمەرگەی كوردستانیش چۆن خەونی ناحەزان و ڕژێمەكانی پێشووی لەگۆڕ نا ئەوەهایش بە قارەمانێتیی خۆی پیلانە نەگریسەی عەبادی لەگۆڕ نا و خودی عەبادی باشتر لە هەركەس دەزانێ پێشمەرگە چیی بەسەر خۆی و پیلانەكەیدا هێنا..

 

دەبێ هەموولایەكیش ئەوە باش بزانن ئێستا دۆخێكی تر لە عێراقدا هاتووەتە ئاراوە و دەموچاوی حاقد و خۆپەرست و یاساشكێن نابێ ڕۆڵیان هەبێ. قۆناغی ئێستا قۆناغی بەرپرسیارێتی و پتەوكردنی بنەماكانی پێكەوەژیان و چەسپاندنی شەراكەت و تەوافوق و تەوازونە لە عێراقدا.