گه‌ڕان

Shadow Shadow
سیاسه‌تی

بۆچی بەلەمەكە ژێر ئاو كەوت؟

ناس كورد راپۆرتێكی سەرەتایی لەبارەی رووداوەكەی موسڵ ئاشكرا دەكات

2019.03.22 - 15:32
ناس كورد راپۆرتێكی سەرەتایی لەبارەی رووداوەكەی موسڵ ئاشكرا دەكات

ناس كورد-

لایەنە پەیوەندیدارەكانی شاری موسڵ راپۆرتێكی سەرەتاییان لەبارەی هۆكاری ژێر ئاوكەوتنی بەلەمە گەشتیارییەكەی شاری موسڵ ئامادەكردووە و تیایدا هۆكاری رووداوەكە ئاشكرا دەكەن.

بەپێی راپۆرتە سەرەتاییەكە یەكێك لەهۆكارە سەرەكییەكانی ژێر ئاوكەوتنی بەلەمەكە توانای هەڵگرتنی كێشی بەلەمەكە بووە، بەجۆرێك بەلەمە دەتوانێت 50 سەرنشین هەڵبگرێت بەڵام ساتی رووداوەكە 170 سەرنشینی تێدا بووە.

لەبەشێكی تری راپۆرتە سەرەتاییەكەدا بەرزكردنەوەی رێژەی بەردانەوەی ئاوی رووباری دیجلە و نەبوونی مەرجەكانی سەلامەتی و توندوتۆڵی و نەبوونی تیمی رزگاركردن و فریاكەوتنی پزیشكی، بە هۆكارێكی دیکەی رووداوكە دانراوە.

راپۆرتەكە ئاماژە بە كەموكورتییەكانی فەرمانگەی پۆلیسی دەریایی شارەكە دەكات لەبواری كادر و پێویستی سەرەكی بۆ روبەڕوبوونەوەی دۆخی لەو شێوەیە و جەخت لەسەر ئەوە كراوەتەوە كە لەكاتی رووداوەكەدا كەمتر لە 40 پۆلیسی لێبوە و بەهۆی زۆری قوربانییەكانەوە فریای بەهاناوەچوون نەكەوتوون.

هاوكات ئەحمە ئەلجبوری ئەندامی پەرلەمانی عێراق لەمیانەی بڵاوكردنەوەی تویتێكدا لەتویتەر ئاماژە بەوە دەكات "ژمارەی تەواوی سەرنشینانی بەلەمە ژێر ئاو كەوتووەكەی موسڵ 287 سەرنشین بووە، 103 سەرنشینیان ژن،86 سەرنشینی پیاو، 98 سەرنشینی منداڵ".

ئەلجبوری روونیدەكاتەوە لەرێگەی كامێراكانی چاودێرییەوە ژمارەی سەرنشینەكان دیاری كراوە و بەوتەی ئەو لەدوای رووداوەكە 80 سەرنشینیان رزگار كراوە و هەتا ئێستاش 118 سەرنشینیان بێسەر‌وشوێنن.

دوێنێ‌ (پێنجشەممە) بەلەمێكی گەشتیاری لە یەكێك لە دوورگە گەشتیارییەكانی ڕووباری دیجلە لە شاری موسڵ ژێر ئاو كەوت و بەهۆیەوە قوربانییەكی زۆری لێكەوتەوە.
هەر لەدوای رووداوەكە عادل عەبدولمەهدی سەرۆك وەزیرانی عێراق گەیشتە شاری‌ موسڵ‌ بەمەبەستی‌ لەنزیكەوە ئاگاداربوون لە وردەكاری‌ ڕوداوەكە و نووسینگەی رۆژنامەوانی سەرۆك وەزیرانی عێراق بڵاوی كردەوە "سەرۆك وەزیران لەشاری موسڵەوە بۆ ماوەی سێ‌ رۆژ ماتەمینی گشتی لەسەرانسەری وڵات و باڵێوزخانە و نوێنەرایەتییەكانی عێراق لە دەرەوە راگەیاند".

هاوكات دادگای لێكۆڵینەوەی موسڵ راگەیەندراوێكی بڵاوكردەوە و تیایدا بڕیاری دەستبەسەركردنی بۆ نۆ كەس لە كارمەندانی بەرپرسی ئەو بەلەمە دەركرد كە دوێنێ‌ لە ڕووباری دیجلەدا ژێر ئاو كەوت.



دادگاكە ئاماژەی بۆ ئەوەش كردووە، فەرمانی دەستگیركردن بۆ هەریەك لە خاوەنی دوورگە گەشتیارییەكە و خاوەنی بەلەمەكەش دەركراوە، لایەنە پەیوەندیدارەكانیشی ڕاسپاردووە بۆ ئەنجامدانی ڕێوشوێنی پێویست.

بەرەبەیانی ئەمڕۆش (هەینی) فەرمانگەی پزیشكی دادوەری لەپارێزگای موسڵ لەدواین ئاماریدا لەبارەی رووداوی ژێر ئاوكەوتنی بەلەمەكەی شاری موسڵ رایگەیاند "تائێستا 100 تەرمی ئەو رووداوە رادەستی فەرمانگەكەمان كراوە".