گه‌ڕان

Shadow Shadow
سیاسه‌تی

هەرێمی كوردستان: چالاكی و ئاهەنگە فەرمییەكانی جەژنی نەورۆز ڕادەگیرێت

2019.03.22 - 12:23
هەرێمی كوردستان: چالاكی و ئاهەنگە فەرمییەكانی جەژنی نەورۆز ڕادەگیرێت

ناس كورد-

حكومەتی هەرێمی كوردستان وەك هاوسۆزییەك بۆ قوربانییانی رووداوی ژێر ئاوكەوتنی بەلەمێك لەشاری موسڵ، بڕیاریدا سەرجەمی چالاكی و ئاهەنگە فەرمییەكانی جەژنی نەورۆز رابگرێت.

حكومەتی هەرێمی كوردستان راگەیەندراوێكی بڵاوكردەوە و تیایدا ئاماژە بە راگرتنی سەرجەمی چالاكی و ئاهەنگە فەرمییەكانی جەژنی نەورۆز دەكات.

لەراگەیەندراوەكەدا هاتووە "خەم و پەژارەی قووڵی خۆمان ڕادەگەیەنین بۆ كارەساتی گیانلەدەستدانی دەیان كەس لە هاووڵاتیانی شاری مووسڵ كە دوێنێ لە ڕووباری دیجلەدا بەهۆی وەرگەڕانی بەلەمێكەوە گیانیان سپارد. لەیەكەم ساتی ڕووداوەكەشەوە هەموو دامودەزگا پەیوەندیدارەكانی تەندروستی و فریاگوزاری لە هەرێمی كوردستان ڕاسپێردراون بەدەم برینداران و لێقەومانەوە بچن و بە شێوەیەكی بەردەوام لە چاودێریكردنی ڕەوشەكەداین، ئەمەش بە ئەركی نیشتمانی و برایەتیی هاوبەشمان دەزانین".

لەراگەیەندراوەكەدا حكومەتی هەرێمی كوردستان خۆی بە بەشدار و هاوبەشی ماتەمی گشتی لە عێراق دادەنێت و بەو بۆنەیەوە چالاكی و ئاهەنگە فەرمییەكانی جەژنی نەورۆز ڕادەگرێت.

دوێنێ‌ (پێنجشەممە) بەلەمێكی گەشتیاری لە یەكێك لە دوورگە گەشتیارییەكانی ڕووباری دیجلە لە شاری موسڵ ژێر ئاو كەوت و بەهۆیەوە قوربانییەكی زۆری لێكەوتەوە.