گه‌ڕان

Shadow Shadow
چیرۆكه‌كانمان

باسکردنی دوو ئیدارەیی لەلایەن یەکێتیەوە بۆ دروستکردنی فشارە

مەحمود عوسمان: پارتی هەڵە دەکات بەبێ یەکێتی هەنگاوبنێت

2019.03.21 - 13:28
مەحمود عوسمان: پارتی هەڵە دەکات بەبێ یەکێتی هەنگاوبنێت

ناس کورد-

نزیکەی شەش مانگ بەسەر هەڵبژاردنەکانی پەرلەمانی کوردستان تێپەڕیوە و دوای ئەنجامدانی چەندین کۆبوونەوەی دوو قۆڵی لە نێوان پارتی دیموکراتی کوردستان و هەریەک لە یەکێتی نیشتیمانی و بزووتنەوەی گۆڕان هێشتا کابینەی نوێی حکومەتی هەرێم پێکنەهێنراوە.

لە دوای ڕێکەوتنی پارتی و گۆڕان لە ڕۆژی 16/2/2019 و ڕێکەوتنی پارتی و یەکێتی لە ڕۆژی 4/3/2019، بەڵام لەسەر پشکەکانی یەکێتی لە کابینەی نوێی حکومەت پەیوەندییەکانی یەکێتی و پارتی بەرەو خراپی دەڕوات و لە دوو کۆبوونەوەی ڕابردوویاندا نەگەیشتوونەتە هیچ ئەنجامێک سەبارەت بەو پرسە، هاوکات پارتی هەڕەشەی ئەوە دەکات چیتر چاوەڕێی یەکێتی ناکەن و ئەگەر سازش لەسەر داواکانیان نەکەن، بەبێ ئەوان سەرۆکایەتی هەرێم کارا دەکەنەوە و حکومەتیش پێکدەهێنن.

لەو بارەیەوە مەحمود عوسمان، سیاسەتمەداری کورد تایبەت بە ناس کورد-ی ڕایگەیاند " پارتی و یەکێتی ماوەی 28 ساڵە پێکەوە حوکمی ئەم هەرێمە دەکەن و هەرچەندە لەو 28 ساڵەشدا بەردەام کێشەیان هەبووە بەڵام، بەبێ یەکتریش ناتوانن حوکم دابمەزرێنن".

لە بارەی هەڕەشەکانی پارتی بۆ پێکهێنانی حکومەت بەبێ یەکێتی، مەحمود عوسمان ئاماژەی بەوەکرد "پارتی کارێکی هەڵە دەکات بەبێ یەکێتی هەنگاو بنێت بۆ کاراکردنەوەی سەرۆکایەتی هەرێم و پێکهێنانی حکومەت، وەک چۆن لە هەڵبژاردنی سەرۆکایەتی پەرلەمانیشد هەڵەی کرد و نەدەبوو بەبێ یەکێتی ئەو هەنگاوە بنێت".

پێشنیازیشی بۆ لایەنەکانی بەشدار لە حکومەت کرد، کە سازش لەسەر هەندێک شت بکەن و هەوڵبدەن بگەنە ڕێکەوتن بۆ ئەوەی چیتر پێکهێنانی حکومەت دوانەکەوێت.

لەبارەی وتەکانی بەرپرسانی یەکێتی بۆ دروستبوونەی دوو ئیدارەیی لە هەرێم، ئەو سیاسەتمەدارە باسی لەوەکرد " ڕاستە نیشانەکانی دوو ئیدارەیی لە هەرێم هەر ماوە، بەڵام پێموانیە یەکێتی دوو ئیدارەیی بوێت و حەزی لێی بێت ئەوە تەنها بۆ دروستکردنی فشارە".

رۆژی سێشەممەی رابردوو لەمەکتەبی سیاسی یەکێتی لە شاری سلێمانی هەردوو وەفدی پارتی و یەکێتی لەسەر پشکەکانی یەکێتی لە کابینەی نوێی حکومەت کۆبوونەوە و لە دوای کۆبوونەوەکەش ئەوەیان ڕاگەیاند، بڕیانداوە لە دوای جەژنی نەورۆز دووبارە کۆببنەوە.