گه‌ڕان

Shadow Shadow
سیاسه‌تی

وەك هاوسۆزییەك بۆ موسڵمانەكان نیوزلەندییەكان لەچك دەپۆشن

2019.03.21 - 11:42
وەك هاوسۆزییەك بۆ موسڵمانەكان نیوزلەندییەكان لەچك دەپۆشن

ناس كورد-هەڤاڵ فەتاح


سەركۆنەكردنی ڕووداوەكەی ڕۆژی هەینی ڕابردووی شاری كرایست لە نیوزلەندا بەردەوامە و هاووڵاتیانی ئەو وڵاتە بەرێگەی جۆرا و جۆر هاوسۆزی و هاوخەمی بۆ موسڵمانەكانی ئەو شارە، دەردەبڕن.

سكای نیوز بڵاوی كردەوە " ئەمڕۆ(پێنج شەممە) كۆمەڵێك لە چالاكوانی مەدەنی نیوزلەندی لەتۆڕە كۆمەڵایەتییەكان هەڵمەتێكیان دەستپێكرد و داوایان لە هاووڵاتیانی ئەو وڵاتە لەژنان و پیاوان و منداڵان كرد سبەینێ‌ هەینی وەك هاوسۆزییەك بۆ قوربانیانی رووداوەكە لەچك بپۆشن كە هێمای موسڵمانەكانە.

بەپێی راگەیەندراوی هەڵمەتەكە ژنان و كچان لەچك لەسەر دەكەن و پیاوانیش لەچك دەدەن بەشانیاندا هاوشێوەی نەریتی موسڵمانان.

هەڵمەتەكە لەژێر ناوی (#headscarfforharmony) ئەنجامدراوە و كاردانەوەیەكی زۆری لەناو تۆڕە كۆمەڵایەتییەكان دروست كرد و بەشێكی زۆری هاووڵاتیان لەتۆڕە كۆمەڵایەتییەكان ئامادەیی خۆیان دەربڕی بۆ بەشداریكردن تیایدا.

هەینی ڕابردوو لە دوو مزگەوتی شاری كرایستی وڵاتی نیوزلەندا لە كاتی ئەنجامدانی نوێژی هەینی، لەلایەن هاووڵاتییەكی ئوستوراڵییەوە بەچەك هێرش كرایە سەر ئامادەبووان و لە ئەنجامی دەستڕێژی گولەوە 50 كەس كوژران و 20 كەسی تریش برینداربوون.