گه‌ڕان

Shadow Shadow
سیاسه‌تی

ژنانی زیندانیکراو سڵ دەکەنەوە لە گەڕانەوە بۆ کۆمەڵگا

2019.03.18 - 23:08
App store icon Play store icon Play store icon
ژنانی زیندانیکراو سڵ دەکەنەوە لە گەڕانەوە بۆ کۆمەڵگا

کەناڵی ناس کورد لە تێلیگرام جۆین بکە   

 

 

ناس کورد- رێژنە سەردار

 

ژمارەیەک لەو ژنانەی بەهۆی ئەنجامدانی تاوانێکەوە حوکمدەدرێن، لە ترسی تانەو تەشەرو مەترسیی لەسەرژیانیان، نایانەوێ پاش تەواوکردنی سزاکەیان لەزیندان ئازاد بکرێن‌و بگەڕێنەوە نێو کەسوکاریان. 

کانی (ناوێکی خوازراوە) تەنها چەند رۆژێکی کەمی ماوە بۆ کۆتاییهاتنی ماوەی حوکمەکەی‌ و ئازادبون لەزیندان، بەڵام لەبری ئەوەی شادو دڵخۆش بێت، نیگەران‌و دڵتەنگە، چونکە نازانێت پاش ئازادبونی ڕوبکاتە کوێ‌ و ژیانی پارێزراو نابێت.

ئەو کە بەتاوانی گواستنەوەی مادەی هۆشبەرەوە تێوەگلاوە، نازانێت پاش بەسەربردنی چەند ساڵێک لەگرتوخانەی چاکسازی کۆمەڵایەتی چۆن روبەڕوی کەسوکارو کەسە نزیکەکانی بێتەوە کە دوای دەستگیرکردنی حاشایان لێکردوە.

کانی وتی "حەزناکەم حوکمەکەم کۆتایی بێت‌و ئازاد بم، مانەوەم لەناو زیندان پێخۆشترە لەوەی

بچمە دەرەوەو سور دەزانم هەڕەشە لەسەر ژیانمە".

 

کانی تەمەن 50 ساڵ، پەشیمانە لەو کارەی ئەنجامیداوەو پڕ بەدڵ حەز دەکات بگەڕێتەوە ناو خێزانەکەی‌و ژیانێکى نوێ دەستپێبکات، بەڵام نایشارێتەوە کە دەترسێت قسەو قسەلۆکی کۆمەڵگە ژیانى لێهەراسان بکات و داهاتوى خۆی‌و منداڵەکانیشی بخاتە مەترسییەوە.

 

ئەو ژنە یەکێکە لەوانەی پاش بەسەربردنی ساڵانێک لەزیندان، لەئازادیی دەترسن ‌و خوازیارن لەگرتوخانە بمێننەوە، ئەویش بەهۆی روانینی کۆمەڵگە‌و هەڕەشەی کەسوکاریانەوە بەرامبەریان.

 

بەڕێوبەری چاکسازى ژنان لە سلێمانى، ئومێدە محەمەد ئاماژە بەوە دەکات کە ژنانى ناو چاکسازیەکە لەقسەى ناو کۆمەڵگە دەترسن و دەڵێت، "لەکۆمەڵگەیەکى وەک ئەوەی ئێمەدا کە ژنانى ئاسایى ڕوبەڕوى قسەو قسەڵۆک دەبنەوە، ئەی کاردانەوەیان چۆن دەبێت بەرامبەر ئەوانەی تاوانێکیان ئەنجامدابێت؟"

ئومێدە ئەوەش ڕوندەکاتەوە کە بەردەوام لە ڕوی  دەروونى‌ و کۆمەڵایەتیەوە کار لەسەر ئەوە دەکەن بەشێوەیەکى تەندروستر زیندانییەکان بگەڕێنەوە کۆمەڵگە، لەو بارەیەشەوە دەڵێت "قسە لەگەڵ کەسوکاریشیان دەکەین، بەڵام ئێمە ناتوانین بەتەنها کێشەى بەو جۆرە خراپ سەیرکردنى کۆمەڵگە بگۆڕین، پێویستە ڕێکخراوەکانى ژنان سیمینارى تایبەت لەشوێنە گشتیەکاندا ساز بکەن ‌و ببنە هۆکارێک بۆ گۆڕینى ڕوانینی خەڵک بۆ ئەوەى ئەو ژنانە جارێکى تر نەبنەوە بەقوربانى، ڕاستە ئەوان هەڵەیەکیان ئەنجامداوە، بەڵام ئێستا گۆڕاون‌و پەشیمانن".

 

ئەگەرچى زیندان شوێنێکى سەختە بۆ بەسەربردنى ماوەى سزاى یاسایی ئەو کەسانەى کە لەتاوانێکەوە تێوەدەگلێن، بەڵام زیندانى چاکسازى ژنانى سلێمانى بووە بەپەناگەیەکى هێمن بۆ ئەو ژنانەى کە لەترسی تەواوبونى ماوەى سزاکەیان ژیان بەسەردەبەن. هەرچەندە ئەوان وەک خۆیان  دەڵێن وانەیان لەهەڵەکانیان وەرگرتوە و پەشیمانى دەردەبڕن ‌و  خۆیان سەرقاڵى چەند کارێکى وەک نانکردن‌ و بەرگردوریی‌ و‌ کاری دەستیی کردووە، هەندێکیشیان پێکەوە ئاراشتگایەکیان بۆ ژنانى ناو زیندانەکە داناوەو خۆیان سەرقاڵکردوە بە کارەوە، بەشێکیان کە بیر لەڕۆژانى ئازادبونیان ‌و ئەو قسەو قسەڵۆکانەى خەڵک‌ و ئەو هەڕەشانە دەکەنەوە کە هەفتانە لەڕێگەى سەردانى کەسە نزیکەکانیانەوە بۆیان دێت، خۆزگە بەمانەوە لەزیندان دەخوازن.

 

توێژەری کۆمەڵایەتی، دارا ئەنوەر زۆراب ئاماژە بەوە دەکات هەمیشە ئەو ژنانەی لەزیندانەوە دەگەڕێنەوە نێو کۆمەڵگە لەڕێگەى  خێزان ‌و دەوروبەرەوە توشی تانەو تەشەرو کێشە دەبن ، بۆیە زۆرجار پاڵیان پێوەدەنرێت بچنەناو کێشەی ترەوەو بگەڕێنەوە بۆ زیندان. دارا ئەنوەر پێی وایە "کەموکورتییەکی گەورەش کە هەیە ئەوەیە، چاکسازیەکانى کوردستان لەو ئاستەدا نین کە حوکمدراوان ئامادە بکەنەوە بۆ گەڕانەوە نێو کۆمەڵگە". دەشڵێت "پێویستە تاکى کورد هۆشیار بکرێتەوە لەکێشەیەکى وا گەورە کە دوبارە ژنەکان دەکاتەوە بەقوربانی‌ و زۆرجار دوچاری هەوڵدان بەخۆکوشتن‌ و نەخۆشی دەرونیان دەکەنەوەو، رق‌ و بیری توندوتیژیى ‌و دوژمنکاریی لەناخیاندا دروست دەکەنەوە".

زۆراب جەغت لەوە دەکاتەوە کە پێویستە بۆ ئەو جۆرە کێشانە، وەک بەهێزکردنی پەیوەندى خێزانى ئەو کەسانەى لە چاکسازیدان لە ماوەى بەسەربردنى ماوەى سزاکەیاندا بۆ ئەوەى بڕوایان بەوە هەبێت کە کاتێک دەگەڕێنەوە کۆمەڵگە کەسانێک هەن پشتگیریان لێدەکەن ‌و دەیانپارێزن. لەم بارەیەشەوە پێی وایە ئەم ژنانە لەبەردەم پێنج مەترسیدان، ئەوانیش : "جەستەیى‌، دەرونى‌، ڕۆحى‌،  عەقڵى ‌و پەیوەندیە کۆمەڵایەتیەکانیان، ئەگەر دواى ئازادبونبان بەر هەڕەشەو تانەو تەشەری کۆمەڵگە بکەون  ئەوا دەرئەنجامى مەترسیداری دەبێت بۆ سەر ژیانیان". لە ڕوانگەی توێژەری ناوبراوەوە، پێویستە حکومەت‌و ڕێکخراوەکان کار لەسەر بونیادنانەوەی ئەم ژنانە کار بکەن وەک کەسێکى خاوەن ئەزمون تەماشا بکرێن.

 

 

سەرچاوە؛ رێکخراوی ئینتەرنیوز