بروسکە و نامەکانی نێوان بارزانی و تاڵەبانی و نەوشیروان مستەفا بڵاو دەکرێنەوە

ناس کورد-

سەڵاح رەشید نوسەرى بیرەوەرییەکانى مام جەلال رایگەیاند، بروسکە و نامەکانی نێوان بارزانی و تاڵەبانی و نەوشیروان مستەفا بڵاو دەکاتەوە.

کەناڵی ناس کورد لە تێلیگرام جۆین بکە   

سەڵاح رەشید (7-11-2022) لە بڵاوکراوەیەکدا ئاماژەى بەوەکردووە، لە نێوان ١٧-٢٦/١١/٢٠٢٢ چوارەمین پێشنگای نێودەوڵەتی کتێب لە سلێمانی دەکرێتەوە و لەوێش کتێبێ بەندە بە ناوی ( بروسکە نامە – نامە و بروسکەی نێوان مام جەلال، مەسعود بارزانی و نەشیروان مستەفا، ١٩٩٠ -٢٠٠٩) بڵاودەبێتەوە.

دەشڵێت،  زۆربەى ئەم نامە و بروسکانە، نزیکی چارەکە سەدەیەک لەمەوبەر نوسراون و بڵاوکردنەوەیان هیچ لێکەوتە و کاریگەریەکى لەسەر دۆخى سیاسى و پەیوەندیەکانى ئێستاى ناوخۆى کوردستان نابێت.

دەقى بڵاوکراوەکە:

هاورێیان سڵاو

لە نێوان ١٧-٢٦/١١/٢٠٢٢ چوارەمین پێشنگای نێودەوڵەتی کتێب لە سلێمانی دەکرێتەوە و لەوێش کتێبێ بەندە بە ناوی ( بروسکە نامە – نامە و بروسکەی نێوان مام جەلال، مەسعود بارزانی و نەشیروان مستەفا، ١٩٩٠ -٢٠٠٩) بڵاودەبێتەوە.

ئەم کتێبە کۆمەڵێک نامە و بروسکەی نێوان ئەو سێ سەرکردەیە لەخۆدەگرێت، کە لەکات و شوێن و بۆنەو ڕووداوى جیاوازدا نووسراون و بۆ یەکتریان ناردووە. زۆربەى ئەم نامە و بروسکانە، نزیکی چارەکە سەدەیەک لەمەوبەر نوسراون و بڵاوکردنەوەیان هیچ لێکەوتە و کاریگەریەکى لەسەر دۆخى سیاسى و پەیوەندیەکانى ئێستاى ناوخۆى کوردستان نابێت، پێشتریش بەشێکیی زۆریان لە گۆڤار و کتێبی جۆراوجۆردا بڵاوکراوەنەتەوە.

• مەبەست لە خستنەڕوى ئەم نامە و بروسکانە لەم کتێبەدا، ئاشناکردنى هاووڵاتیان و خوێنەرانى کوردستانە بەدیوی ناوەوەی ڕووداوەکانى بزووتنەوەی ڕزگاریخوازی کوردستان و ئاست و زمانى نووسین و شێوەى پەیوەندی نێوانی ئەو بەڕێزانە.

ئەم کتێبە، ئاوێنەیەکە بۆ ڕوونکردنەوەى دیوی نادیار و ڕانەگەیەندراوى پەیوەندی نێوانى یەکێتی و پارتی و هێز و لایەنەکانی تر لە کاتی شەڕ و ئاشتیدا، دەروازەیەکە بۆ تێگەیشتن لەو جیاوازیەى لە زمان و قەڵەمى نووسینى نێوان براکاندا لەکاتی شەڕ و ئاشتیدا دەبینرێ، هەنگاوێکە بۆ دۆکۆمێنتکردنى بەشێک لە ڕووداو و پەیوەندى کارەکتەرەدیارەکانى شۆڕش و مێژووى نزیکى بزوتنەوەى ڕزگاریخوازى کورد بۆ توێژەر و خوێندکاران و ناوەندەکانى لێکۆڵینەوە.

• نامە و بروسکەکان، لە سەردەم و کاتى شەڕ یان ئاشتیدا نووسراون و بەپێى رووداو و پێشهاتەکانى سەردەمەکە لە بەشێک لە نامەکاندا ناوى کەسانى پلە جیاواز هەندێجار بە نەگونجاو و نەشیاو هاتووە، بەندە ئەو مافەم بەخۆم داوە ئەو ناوانە لەسەر نامە و بروسکەکان لابدەم بە جۆرێک هیچ کاریگەریەک نەکاتە سەر ناوەڕۆک و مانا و وردەکارى نامەکە.

• بە دڵنییایەوە نووسراوەکانى نێو ئەم کتێبە، مێژووی ڕاستەوخۆی دوێنێیە و لە دەستی یەکەمەوە بڵاوبۆتەوە، پێویستە خوێنەر بە ڕۆحیەتی بێلایەنی و دوور لە دەمارگیرى حزبییەوە، بڕوانێتە ناوەڕۆکەکەى.

هیچ لایەن و هێز و بەڕێزێک بەدەر نیە لە هەڵوێستی باش و جوامێری و ئازایەتی و قوربانیدان. ئەو کاکانە نوێنەری چەندەها هێزی سیاسی بوون و هەموو هەوڵێکیان داوە کە هێزەکەیان باڵادەست بێت و سەرکەوتوبێت، بۆ ئەمەش زۆر ڕێگایان گرتۆتەبەر کە بەشێکیان ڕێگای نیشتیمانینان پێناوترێت و ناچنە خزمەتى بەرژەوەندی خەڵکی کوردستانەوە، بەڵکو تەنها و تەنها لە بەرژەوەندی تەسکی حیزبەکانی خۆیاندا بووە. ئەمە تەنها هێزێکی سیاسی ناگرێتەوە، بەڵکو بەپێی پێگە و کاریگەریان هەموو حزبەکان تێوەگلاون کە هەندێکیان لە هەندێ قۆناغدا هەموو سنوورێکی نیشتیمانییان تێپەراندوە بۆ بەرژوەندی حیزبی تەسک و هەندێکی تریان کەمێک خەمی نیشتمان و بەرژوەندیی گشتیان رەچاوکردوە..