پەیامێک لە مستەفا کازمییەوە: ڕێگریمان لە ڕشتنی خوێن کرد

ناس کورد- 

مستەفا کازمی، سەرۆک وەزیرانی پێشووی عێراق لە پەیامی ماڵئاوایی خۆیدا، ڕایگەیاند، توانیان متمانەی خەڵک بە حکومەت بگەڕێننەوە و ڕێگرییان لە ڕشتنی خوێنی خۆپیشاندەران کرد. 

کەناڵی ناس کورد لە تێلیگرام جۆین بکە   

مستەفا کازمی لە وتارێکدا (پێنجشەممە 27-10-2022) ڕایگەیاند، "ئێمە دۆخێکی ئەمنیی باش ڕادەستی حکومەتی نوێ دەکەین، سەرجەم گروپە تیرۆریستییەکان لەناوبراون، سوپا و هێزە سەربازییەکانمان ڕێکخستووەتەوە و بە‌‌هێزمان کردوون." 

وتیشی، "هەموو هەوڵێکمان دا لەپێناو گێڕانەوەی متمانەی خەڵک بە حکومەتەکەیان و هەروەها هێزەکانمان ڕاهێنا کە بەشێوەی مەدەنی مامەڵە لەگەڵ خەڵک و خۆپیشاندەران بکەن و بەرزکردنەوەی چەکمان بەڕووی خۆپیشاندەران قەدەغە کرد." 

مستەفا کازمی ئاماژەی بەوەشکرد، "حکومەتەکەمان ئەرکەکانی بەجێگەیاند بە ئەنجامدانی هەڵبژاردنێکی پاک و بێگەرد و دواتر هەموو لایەنەکانمان هاندا بۆ پێکهێنانی حکومەت، بەڵام هەموو تۆمەتەکانیان خستە پاڵ ئێمە و دەستکەوتەکانی ئەم حکومەتەیان کردە ئامانج." 

ئەوەشی خستەڕوو، "پێویستە پەرە بەو هەوڵانە بدرێت کە داومانە بۆ پەرەپێدانی پەیوەندییانی عێراق لەگەڵ وڵاتانی دراوسێ و بنیادنانی پەیوەندییەکی ئاشتیانە."