گه‌ڕان

Shadow Shadow
سیاسه‌تی

سەرۆککۆمار و حکومەتی نوێ

پارتى ئەنجامى دانوستانەکانى لەبەغدا رادەگەیەنێت

2022.09.24 - 23:44
App store icon Play store icon Play store icon
پارتى ئەنجامى دانوستانەکانى لەبەغدا رادەگەیەنێت

ناس کورد-

 

پەرلەمانتارێکی پارتى رایگەیاند، شاندی دانوستانی حزبەکەى لە بەغدا خەریکی دانوستانە بۆ گەیشتن بە ڕێککەوتن، لێک نزیکبوونەوە ھەیە و بڕیارە پەرلەمان لە ئایندەیەکی نزیکدا کۆبێتەوە.

کەناڵی ناس کورد لە تێلیگرام جۆین بکە   

 

شیروان جەمال، پەرلەمانتاری پارتی لە بەغدا (٢٤ی ئەیلوولی ٢٠٢٢) بە پێگەى فەرمى حزبەکەى ڕاگەیاند "هەوڵەکان بۆ ئەنجامدانی کۆبوونەوەی پەرلەمانی عێراق بەردەوامن و کۆبوونەوەی یەکەم بۆ دیاریکردنی جێگری یەکەمی سەرۆکی پەرلەمانە، دواتر بۆ ھەڵبژاردنی سەرۆککۆمار".

 

وتیشى "بەڵام تا ئەمڕۆ ڕۆژی بەڕێوەچوونی کۆبوونەوەکە دیاری نەکراوە، بڕیار بوو ئەم هەفتەیە پەرلەمان کۆ ببێتەوە، ھێشتا پشتڕاست نەکراوەتەوە، لەگەڵ ئەوەشدا دانوستانەکان لە نێوان لایەنە عێراقییەکاندا بەردەوامن."

 

بەوتەى پەرلەمانتارەکەى پارتی "لێک تێگەیشتن ھەیە لە نێوان لایەنەکاندا، شاندی پارتییش لە بەغدایە و بەردەوام لەگەڵ ھەموو لایەنە سیاسییەکان دانوستان دەکات بۆ گەیشتن بە ئەنجامێک لە بەرژەوەندیی گەلانی عێراق و کوردستان، دانوستانەکانی پارتی لەگەل ھەموو لایەنەکانە بەبێ جیاوازی."

 

شیروان جەمال ئاماژەی بەوەشکرد "پارتی دەیەوێ لایەنەکان بگەنە خاڵی ھاوبەش بۆ ئەوەی عێراق لەو قەیرانەی تێیدایە دەربازی ببێت، چونکە ئەگەر پەرلەمان کۆ نەبێتەوە و حکوومەتی نوێ پێک نەیەت ئەوە ناتوانن ھەنگاو بەرەو ھەڵبژاردنی پێشوەختە بنێن، لەبەر ئەوەی حکوومەتی کاربەڕێکەر ناتوانێت ئامادەکاری بۆ ھەڵبژاردنی داھاتوو بکات، بەپێچەوانەوە ئەگەر لایەنە عێراقییەکان دەیانەوێ ھەڵبژاردنی پێشوەختیش بەڕێوە بچێت، دەبێت سەرۆککۆمار و حکوومەتی نوێ دەستبەکار بن."

 

پێشتر هاوپەیمانی فەتح بەسەرۆکایەتى هادى عامرى، نیازى ناردنى شاندى بۆ حەنانە بەئامانجى کۆبوونەوە لەگەڵ موقتەدا سەدر رەتکردەوە و دەڵێت، نزیکبوونەوە هەیە لەنێوان چوارچێوەى شیعى و سوننەکان و پارتى کە رەنگە هاوپەیمانى نێوانیانى لێبکەوێتەوە.  

  

عائید ئەلهیلالی پەرلەمانتارى هاوپەیمانێتییەکە (٢٤ی ئەیلوولی ٢٠٢٢) بە تەلەفزیۆنى فەرمى عیراقى وت "لە نێوان چوارچێوە و هاوپەیمانى سەروەری و پارتیدا بۆچونى هاوبەش هەیە، ئەم نزیکبوونەوەیە ڕەنگە ببێتە هۆی هاوپەیمانی یان کردنەوەی دەرگا بەڕووی بنبەسى سیاسیدا".  

  

وتیشى "هەندێک هێزى چوارچێوە پێیانوایە کە بەدەرکردنى سەدرییەکان مەترسیدارە، بە لەبەرچاوگرتنی ئەوەی کە نوێنەرایەتی بەشێکى گەورە و فەزای سیاسی فراوان دەکات".  

  

ئەلهیلالی ئەوەشی خستەڕوو، "ماڵی كورد نەگەیشتووەتە ئاستی دەستپێشخەری. تائێستاش تەنها گفتوگۆی نێوانیانە كە هیچی لێنەكەوتۆتەوە، هەروەها لەسەر دیدێكی سیاسی هاوبەش و یەک کاندید رێكنەكەوتوون".  

  

جەختیشیکردەوە "چوارچێوە هیچ هەوڵێکی نەداوە بۆ لێدانی دەرگای حەنانە، بانگهێشتنامەش بۆ سەدر نێردراوە، بەڵام ئەو رەتیدەکاتەوە لەگەڵ هیچ شاندێک کۆببێتەوە، چوارچێوە هیچ بیرۆکەیەکی بۆ ناردنی شاند نییە لانیکەم لە ئێستادا."