کەناڵی ناس کورد لە تێلیگرام جۆین بکە
ناس کورد- پەرلەمانتارێکی عێراق، رایگەیاند "لە بازگەکانی هەولێر بڕی 10 هەزار دینار لەهەر گەشتیارێکی عەرەب وەردەگیرێت" و داوا لە سەرۆک وەزیران و سەرۆک کۆمارى عێراق دەکات رێگرى لەو پارە وەرگرتنە بکات. . ئەمڕۆ (دووشەممە، 12ى ئابى 2019) جەواد موسەوی، پەرلەمانتاری عێراق لە فراکسیۆنی سائیرون، راگەیەندراوێکى بڵاوکردەوە و ئاماژەى بەوە کرد، بەرپرسانی حکومەتی هەرێمی کوردستان پێشێلکاری دەستور دەکەن و پارە لە هەر گەشتیارێکی عەرەب وەردەگرن کە سەردانی شارەکانی هەرێم دەکات. . جەواد موسەوی، لە راگەیەندراوەکەیدا روونیدەکاتەوە، کاتێک هەر گەشتیارێکی عەرەب لە شارەکانی باشور و ناوەڕاستەوە بیەوێت بەمەبەستی گەشتکردن بچێتە هەرێم لە بازگەی هەولێر بڕی 10 هەزار دینار وەکو پارەی چونە ژورەوە لێوەردەگیرێت و هەروەها مۆڵەتنامەیەکی بۆ دەکەن کە بۆی نییە ماوەی 30 رۆژ زیاتر لە هەرێم بمێنێتەوە. . موسەوى ئەو کارە بە "پێشێلکاریى" دەستورى عێراق ناودەبات و داوا لە سەرۆک وەزیرانی عێراق و سەرۆک کۆمار دەکات رێگرى لەو کارە بکەن. . پەرلەمانتارەکەى سائیرون هۆشدارى ئەوەش دەدات " ئەگەر ئەو بڕیارە رانەگیرێت ئەوا دەبێت هەمان مامەڵە لەگەڵ هاوڵاتیانی هەرێم بکرێت کە دەچنە شارەکانی ناوەڕاست و باشورى عێراق". . لەو بارەیەوە، ناس کورد پەیوەندیکرد بە نەبەز عەبدولحەمید، قایمقامی هەولێر و نادر رۆستی، وتەبێژی دەستەی گشتى گەشتوگوزارى هەرێمی کوردستان و لە پەیوەندییەکەدا هیچ کامیان ئەو بابەتەیان رەت نەکردەوە و تەنها بێئاگایى خۆیان لەو کارە نیشاندا. . لە بەدواداچوونەکانى ناس کورد، وێنەی یەکێک لەو پسوڵانە دەستکەوت کە لەبازگەی هەولێر بۆ گەشتیارێکی عەرەب کراوە و تیایدا دەردەکەوێت کە بڕی 10 هەزار دیناری لێ وەرگیراوە، بەڵام لەسەر پسوڵەکە ناوی هیچ فەرمانگە و بەڕێوبەرایەتییەکی تایبەتی لەسەر نەنوسراوە و کەس نازانێت کە پارەی ئەو پسوڵەیە بۆ کوێ دەگەڕێتەوە؟.
.
وەرگرتنى پارە لە بازگەکانى هەولێر و دهۆک لە گەشتیارانى عەرەب، بابەتى گەرمى ئەمڕۆى تۆڕە کۆمەڵایەتییەکان بووە و زۆرێک لە گەشتیارەکان باسیان لەوە کردووە لەکاتی گەشتکردنیان بۆ هەولێر و دهۆک بڕی 10 هەزار دیناریان لێ وەرگیراوە، بەڵام ئەو دیاردەیە لە بازگەکانی سلێمانی نەبووە.
.
پێشتریش لەکاتی پشووەکانی جەژنی نەورۆزدا کە ژمارەیەکی زۆر گەشتیاری عێراقی دەهاتنە شارەکانی هەرێم، لە بازگەی چونە ژورەوەی سلێمانی بڕی 10 هەزار دینار لە گەشتیاران وەردەگیرا بەڵام دوای بەدواداچونێکی ناس کورد، بەفەرمی ئەو دیاردەیە لەلایەن سەرۆک کۆماری عێراقەوە بڕیاری قەدەغەکردنی بۆ دەرکرا.
.
لەرۆژانى جەژندا دەیان هەزار گەشتیار لە شارەکانی باشور و ناوەڕاستی عێراقەوە بە مەبەستی بەسەربردنی کاتێکى خۆش ڕوو لە ناوچە گەشتیارییەکانى شارەکانی هەرێمی کوردستان دەکەن.
.
