ناس کورد-
کارگێڕێکی مەکتەبی سیاسیی یەکێتینی نیشتمانیی کوردستان ڕایگەیاند، بڕیاری یەکێتیی و بافڵ تاڵەبانی ئەوەیە کە بەبێ بەدەستھێنانەوەی پۆستی پارێزگاری کەرکوک، یەکێتیی ناچێتە ھیچ دانوستانێکەوە.
کەناڵی ناس کورد لە تێلیگرام جۆین بکە
ئاسۆ مامەند، کارگێڕی مەکتەبی سیاسی یەکێتیی نیشتمانیی کوردستان (دووشەممە 19-9-2022) لە شاری کەرکوک، سەردانی چەند دام و دەزگایەکی حزبی و حکومی کرد.
لە میانی سەردانەکەیدا ئاسۆ مامەند، ڕایگەیاند، "بەھۆی لێکتێنەگەیشتی لایەنەکان، تا دێت پرسی پێکھێنانی حکومەتی عیراق ئاڵۆزتر دەبێت و بارودۆخی وڵاتیش ناسەقامگیر تر دەبێت، ئەوەش زیان بە ھەموو لایەکمان دەگەیەنێت، ئەگەر ئێمە لە ناو خۆماندا رێک و تەبا بین، دەتوانین بەشێکی زۆری مافە دەستووری و یاساییەکان لە بەغدا بەدەست بھێنین، لە ئێستایشدا ئەو نییەتە لەناو حزب و لایەنە کوردستانییەکان بەدیی دەکرێت."
هاوکات لە بارەی پۆستی پارێزگاری کەرکوکیشەوە، ئاماژەی بەوەکردووە، "بڕیاری یەکێتیی و سەرۆک بافڵ ئەوەیە کە بەبێ بەدەستھێنانەوەی پۆستی پارێزگاری کەرکوک، یەکێتی ناچێتە ھیچ دانووستانێکەوە، ئەوەشمان بە روونی بە سەرجەم لایەنەکان راگەیاندووە."
جەختیشیکردووەتەوە، " ئاسایی بوونەوەی بارودۆخی کەرکوک و ناوچە جێناکۆکەکان بە لای یەکێتییەوە پرسێکی نەتەوەیی و نیشتمانییە و بە ھیچ جۆرێک سازشیان لەسەر ناکات."
