ناس کورد-
عەلی حەمەساڵح، ئەندامی پەرلەمانی کوردستان وەڵامی قوباد تاڵەبانی دایەوە و ڕایگەیاند، ئێستا 26 بە 74 بەركارە نەك 43 بە 57.
کەناڵی ناس کورد لە تێلیگرام جۆین بکە
قوباد تاڵەبانی جێگری سەرۆکی ئەنجومەنی وەزیرانی ھەرێمی کوردستان لە کۆڕبەندی وەبەرھێنان و ئابووری لە سلێمانی (شەممە 17-9-2022) دانی بەوەدا نا کە لەئێستادا سیستمی دابەشکردنی داهات بەشێوەی 43% بۆ سلێمانی و 57% بۆ هەولێر و دهۆک جێبەجێ دەکرێت، بۆیە لە سلێمانی کێشەی دابەشکردنی مووچە هەیە.
لەوبارەیەوە عەلی حەمەساڵ، ئەندامی پەرلەمانی کوردستان ڕایگەیاند، "ئەسڵی دوو ئیدارەیەکە 43 بە 57 نییە، بەڵکو هەرکێ و بۆ خۆیەتی، تاوەکو 2014 ە، ئەو 43 بە 57 کێشەیەکی ئەوتۆی نەبوو، پارەکە لە بەغداوە دەهات و بەم ڕێژەیە دابەش دەکرا، کێشەکە دوای 2014 دەستی پێکرد کە پارەی بەغدا نەما."
ئاماژەی بەوەشکردووە، "ئەو داهاتەی نەوت کە دێتەوە دابەش دەکرێت بەنزیکەی 57% بۆ هەولێر و دهۆک، 43% بۆ سلێمانی، پاشان دەبێت هەرکەس لە داهاتی خۆی تەواوکەری موچە و پرۆژە و دەرمان و خەرجی هێزە سەربازییە حیزبیەکان و خەرجی هێزی ئەمنی و کڕینی دەرمان و خاشاک و هەموو شت دابین بکات."
عەلی حەمەساڵح باسی لەوەشکردووە، "سلێمانی ئێستا داهاتی نزیکەی 26% هەولێر و دهۆکیش 74%ـە، کەواتە، کاک قوباد شتێک نیە ناوی 43 بە 57، بەڵکو ئەوەی هەیە هەرکێ و بۆخۆیەتی."
