ناس کورد-
جێگری سەرۆکی ئەنجومەنی وەزیرانی ھەرێمی کوردستان جەختیکردەوە لە بوونی کەرتێکی تایبەتی بەھێز لە ھەرێمی کوردستان دەکاتەوە و ئاشکراشیکرد، ئەو رێکارانەی لە سلێمانی ئەنجامدران بۆ نەھێشتنی پشێوی بازاڕ و زیادەڕۆیی بووە و رێکارەکانی چاکسازی لە سلێمانی بەردەوام دەبێت و شارەکانی تریش دەگرێتەوە.
کەناڵی ناس کورد لە تێلیگرام جۆین بکە
قوباد تاڵەبانی جێگری سەرۆکی ئەنجومەنی وەزیرانی ھەرێمی کوردستان لە کۆڕبەندی وەبەرھێنان و ئابووری لە سلێمانی رایگەیاند، دەبێت حکومەت ئاسانکاری تەواو بکات بۆ کەرتی تایبەت و کەرتێکی تایبەتی بەھێزمان ھەبێت بۆئەوەی ئابووری ھەرێمی کوردستان گەشە بکات و دەتوانرێت بەشێک لە کەموکورتییەکانی حکومەتیش لە رێگەی کەرتی تایبەتەوە پڕبکرێنەوە.
لەبارەی ئەو رێکارانەی لە ماوە پێشوودا لە سلێمانی گیراونەتەبەر ئاشکرایکرد، ئەو رێکارانەی لە سلێمانی ئەنجامدران بۆ نەھێشتنی پشێوی بازاڕ و زیادەڕۆیی بووە و رێکارەکانی چاکسازی لە سلێمانی بەردەوام دەبێت و شارەکانی تریش دەگرێتەوە.
وتیشی، رۆتین ئاستەنگی گەورەی بۆ وەبەرھێنان دروستکردووە و رون نییە بۆچی رێگری لە وەبەرھێنان کراوە، بەڵام دەبێت تەواوی دامەزراوەکانی حکومەت کارابکرێنەوە بۆ خزمەتی خەڵک و کاری لە پێشینەش بۆ ئەو پڕۆژانە دەبێت، کە زۆرترین ھەلی کار دەڕەخسێنێت.
