گه‌ڕان

Shadow Shadow
چیرۆكه‌كانمان

شەوانە لەگەڵ ماسكێك رۆژ دەكەمەوە

پیاوێكی كورد 31 ساڵە بە بێ‌ ئامێری ئۆكسجین هەڵناکات

2019.03.15 - 15:41
پیاوێكی كورد 31 ساڵە بە بێ‌ ئامێری ئۆكسجین هەڵناکات

 

 

ناس كورد- شۆڕش محەمەد

یەكێك لەبەركەوتوانی چەكی كیمیایی لە گرتەیەكی ڤیدیۆیدا باس لەو ئازار و ناڕەحەتیانەی دەكات كە لەدوای بۆردومانكردنی شاری هەڵەبجە لەلایەن رژێمی بەعسەوە دووچاری بۆتەوە، لەڕێگەی ماسكێكەوە 31 ساڵە هەناسە دەدات.

كامیل عەبدولقادر  یەكێك لەبەركەوتوانی چەكی كیمیایی لە گرتە ڤیدیۆییەكەدا لەبارەی دۆخی تەندروستی خۆیەوە، دەڵێت: "ئەمە حاڵی براتانە، كە شەوگار بەم جۆرە بەڕێ‌ دەكەم و ئەم ماسكە دەبێت هەمیشە بەسەرمەوە بێت و دەبێت تابەیانی لەگەڵ ئەم ماسكەدا رۆژ بكەمەوە و بەملمەوە بێت".

پرسیاری ئەوەش دەكات كە داخۆ چۆن ئەوانەی كە ئەو كارەساتەیان خوڵقاند و ئەویان تووشی ئەو دۆخە نالەبارە كردووە "خەویان لێ‌ دەكەوێت؟"

كامیل عەبدولقادر ئاماژە بەوە دەكات كە 31 ساڵە بەو جۆرە ژیان بەسەر دەبات و ناتوانێت یەك هەنگاو بەبێ‌ ئۆكسجین بڕوات.

 

كامیل عەبدولقادر ماوەی زیاتر لە ساڵێكە لەشاری ئیسنی ئەڵمانیایە و لە چاوەڕوانی نەشتەرگەری چاندنی سییەكانیدا‌یە.

 

ئەو قوربانیەی هەڵەبجە لەگەڵ ئەوەی چەند جارێك بۆ وەرگرتنی چارەسەر سەردانی وڵاتی ئەڵمانیای كردووە، بەڵام مانەوەی ئەمجارەی بێ خێزان و منداڵەكانییەتی، لەلایەكی دیكەشەوە داوای مافی پەنابەرێتی كردووە و یەكێك لە ڕێگرییەكانی بەردەم نەشتەرگەریەكەی نەبوونی ئیقامەیە.

كامیل عەبدولقادر لە كیمیابارانی شاری هەڵەبجە بە سەختی بریندابووە و مەترسی لەسەر ژیانییەتی، كامیل دایك و باوك شەش خوشك و برا و خۆشكەزایەكی لەهەمان كارەساتدا گیانیان لەدەست داوە.

 

31 ساڵە كامیل بەهۆی چەكە كیمیاییەكەوە ئازار دەچێژێت و لەم ساڵانەی دواتریشدا تەندروستی بەردەوام خراپتر دەبێت، جگە لەوەی كە چاوێكی بەهۆی گازی خەردەلەوە لەدەستداوە، كێشەی هەناسەدانیشی هەیە، بەجۆریك كە بەپێی نوێترین ڕاپۆرتی پزیشكی بەڕێژەی 90% سییەكانی لەكاركەوتووە.

 

ئەو هاوڵاتییە هەڵەبجەییە وەك یەكێك لەو قوربانیانەی كە ژیانی مەترسی لەسەربووە 14 مانگ لەمەوبەر بۆ چارەسەركردن خۆی گەیاندە ئەڵمانیا و تائێستا بەشێوەیەكی بەردەوام لە ژێر چاودێری پزیشكدایە، یەكێك لە كێشە گەورەكانی ئەوەیە كە لەژوورێكدا لەنێوان چەند ئامێرێكی ئۆكسجیندا یارمەتی وەردەگرێت بۆ هەناسەدان و لەباری جەستەییشەوە بەعەرەبانە هاتوچۆی پێدەكرێت، هەرچەندە چەند جارێك داوای كردووە هاوژین و منداڵەكانی بێنە لای، بەڵام فیزایان پێ نادرێت.

 

https://www.facebook.com/kamilweiss/videos/10213869259551795/