ناس کورد-
دادگای سەربازی دۆسییەی تەواوی ئەو ئەفسەر و پۆلیسە كوردانەی كەركوكی داخست، كە بە تۆمەتی بەشداریكردن لە ریفراندۆمی هەرێمی كوردستان و ناوچەكانی جێناكۆك درابونە دادگا و ژمارەیان 48 ئەفسەر و پۆلیسە.
کەناڵی ناس کورد لە تێلیگرام جۆین بکە
دانیشتنەكەی دادگا، پێشنیوەڕۆی ئەمڕۆ پێنجشەممە 4ی ئاب، لە بنكەی پۆلیسی رەحیماوا لە كەركوك بەڕێوەچوو، ئەوەش بەپێی پێگەى (كەركوك ناو).
موقەدەم عامر نوری شوانی، وتەبێژی فەرماندەیی پۆلیسی پارێزگای كەركوك، وتى "ئەمڕۆ دواین پرۆسەی دادگایكردنی ئەفسەر و پۆلیسە كوردەكانی سەر بە وەزارەتی ناوخۆی عیراق بوو لە كەركوك، كە ژمارەیان 48 ئەفسەر و پۆلیس بوو... پرۆسەكە بە ئامادەبونی دادوەرانی دادگای سەربازی موسڵ بەڕێوەچوو، تیایدا پاش وەرگرتنی وتە و زانیاریی و وردبینی دۆسیەی ئەو 48 ئەفسەر و پۆلیسە، دادوەرەكان بڕیاریاندا بە یەكجاریی دۆسییەكە دابخەن، ئەوەش دوای خستنەڕوی بەڵگەی پێویستی ئەو ئەفسەر و پۆلیسانە سەبارەت بەوەی بەشدارییان لە ریفراندۆمەكەدا نەكردووە و لەو رۆژەدا بێلایەن بون".
جەختیشیكردەوە "هیچ ئەفسەر و پۆلیسێكی كورد سزانەدران و دەگەڕێنەوە سەر ئەركی خۆیان".
مێژووی کردنەوەی دۆسێیەکە لەسەر ئەفسەرانی کورد لە کەرکوک بۆ 26ی تشرینی یەکەمی 2017 (مانگێک دوای ریفراندۆم) دەگەڕێتەوە، بەڵام دۆسییەکە بە بڕیاری سیاسیی و بەشێوەی کاتی راگیرابوو، تا لە 17ی ئاداری 2021 جارێکی تر بە رەزامەندی وەزیری ناوخۆی عیراق دۆسییەکە جوڵێنرایەوە.
شاخەوان عەبدوڵا جێگرى سەرۆکى پەرلەمانى عێراق لە راگەیەنراوێکدا وتى "بۆ ئەوەی کێشەی ئەو ئەفسەرو کارمەندانەی بەشداری ریفراندۆمیان کردبو بەیەکجاری کۆتایی پێبێت لیژنەیەکمان رەوانەی کەرکوک کرد و بەیەکجاری دۆسیەکانیان داخراو بێتاوان لەقەلەم دران، هەر ئەفسەرێک ماوەو کیشەی هەیە تا سێ کاتژمێری تر دەتوانن سەردانی ئەو لیژنەیە بکەن".
وتیشى "رێگە نادەین هیچ ئەفسەرێک سزا بدریت لەسەر کێشەی سیاسی یان نەتەوەیی، بەپێچەوانەوە ئەوەی تێوەگلابێت لەبابەتی گەندەڵی و تاوانی تر هیچ پشت گیرییەکی ناکەین و رێگە دەدەین دادگا رێکاری یاساییان بەرامبەر بگریتە بەر".
ریفراندۆمی هەرێمی کوردستان و ناوچەکانی جێناکۆک لە 25ی ئەیلولی 2017، لەسەدای 92ی دەنگی بەڵێی بەدەستهێنا؛ بەڵام دوای 21 رۆژ و لە 16ی ئۆکتۆبەری هەمان ساڵ، هێزە عیراقییەکان بۆ کەرکوک و تەواوی ناوچەکانی جێناکۆک گەڕانەوە و هێزەکانی سەر بە حکومەتی هەرێمی کوردستان دوای سێ ساڵ لەو ناوچانە کشانەوە، ئەنجامی ریفراندۆم-یش لەژێر فشاری بەغدادا سڕکرا.
