گه‌ڕان

Shadow Shadow
سیاسه‌تی

بەپەلە

پەیامێکی بەپەلە لە مستەفا کازمییەوە: لە دۆخێکی هەستیارداین

2022.07.30 - 16:28
App store icon Play store icon Play store icon
پەیامێکی بەپەلە لە مستەفا کازمییەوە: لە دۆخێکی هەستیارداین

ناس کورد- 

مستەفا کازمی، سەرۆک وەزیرانی عێراق پەیامێکی لەبارەی خۆپیشاندانەکانی عیراق بڵاوکردەوە و ڕایگەیاند، "بە دۆخێکی هەستیاردا تێدەپەڕین و زمانی دیالۆگ و لێکتەگەیشتن چارەسەرە." کازمی داوای گفتوگۆ و دیالۆگیش لە لایەنەکان دەکات دوور لە پەراوێزخستنی هیچ لایەنێک.

کەناڵی ناس کورد لە تێلیگرام جۆین بکە   

 

ئەمڕۆ شەممە 30-7-2022، خۆپیشاندانی فراوانی لایەنگرانی سەدر لە بەغدا بەڕێوەچوو و خۆپیشاندەران بەربەستەکانی ناوچەی سەوزیان لابرد و چوونە نێو هۆڵی پەرلەمانی عێراق و بەهۆی دروستبوونی گرژی ئاڵۆزیش دەیان کەس برینداربوون. 

 

لەوبارەیەوە، مستەفا کازمی، سەرۆک وەزیرانی عێراق پەیامێکی بڵاوکردەوە و ڕایگەیاند، "وڵات بە دۆخێکی هەستیاردا تێدەپەڕێت، و زمانی دیالۆگ و لێکتێگەیشتنیش چارەسەری دۆخەکە دەکات." 

 

سەرۆک وەزیرانی عێراق داوای دان بەخۆداگرتن و ئارامگرتن لە سەرجەم لایەنەکان دەکات و دەشڵێت، "هەزار ڕۆژ دیالۆگ و گفتوگۆ باشترە لە ساتێک خوێن ڕشتن." 

 

لە پەیامەکەیدا کازمی داواش لە لایەنە سیاسییەکان دەکات، دیالۆگ و گفتوگۆ بکەن بۆ گەیشتن بە ڕێککەوتن و دووربکەونەوە لە زمانی زبر و پەراوێزخسنن. 

 

سەرۆک وەزیرانی عێراق داوای هاوکاریشی کرد بۆ ڕاگرتنی ئەو کەسانەی فیتنە لە عێراقدا بڵاودەکەنەوە و ئارامی وڵات دەشێوێنن.

 

دەقی پەیامەکەی مستەفا کازمی: 

 

بسم اللە الرحمن الرحیم

گەلی مەزنی عێراق

خوشک و برا و ڕۆڵەکانمان

کەس و کاری ئەزیزمان

سڵاوی خوداتان لێ بێت

 

لەم دۆخە زۆر هەستیارەدا، لەم مانگە پیرۆزە قەدەخەکراوەدا کە موحەڕڕەمە، بەو پەڕی خۆشەویستی و ڕاستگۆییەوە لەگەڵتان دەدوێین، ئێمەش گەلێکین بەوە ناسراوین ڕێز لە بەها باڵا جوانەکان دەگرین، لە پێناو برایەتیدا لێبوردەین و خاوەن ئامانجی باڵای مرۆڤ دۆستانەین.

 

ئەم گەلە ئارامگرە قوربانیدەرە هیچ کات درێغی نەکردووە لە پێناو عێراق، لەو پەڕی باکوورەوە تا ئەوپەڕی باشوور، لە ڕۆژهەڵاتەوە بۆ ڕۆژئاوا، ئێستاش شایستەی وەڵامێکە هاوتای ئەو قوربانیدانە بێت...

 

گەلی ئێمە ژیاندۆستە و حەزی لە ئاژاوە و تۆڵە و گرژی و بەریەککەوتن نییە، بەدوای ڕق و قینەوە نییە، چاوی لە ئایندەیەکە لە ئاست قوربانی و خەم و ژانەکانی ڕابردووی بێت.

 

لەبەر ڕۆشنایی ئەمەش پێویستە فراکسیۆنە سیاسییەکان دابنیشن بۆ دیالۆگ و لێکگەیشتن لە پێناو عێراق و عێراقییەکان، پێویستە خۆیان بە دوور بگرن لە زمانی یەکتر پەراوێزخستن و یەکتر تەخوین کردن، پێویستی گیانێکی نیشتمانی باڵای کۆکەرەوە بەسەریاندا زاڵ ببێت، هەزاران ڕۆژ لە دیالۆگ باشترە لە ساتێک کە دڵۆپێک خوێنی کەسێکی عێراقی تێدا بڕژێت.

 

بانگهێشتی هەموو لایەک دەکەم بۆ دان بە خۆدا گرتن، بۆ ئارامگرتن و بۆ عەقڵانییەت و نەخزان بەرەو پێکدادان، داوا لە هاووڵاتییان دەکەم لەگەڵ هێزە ئەمنییەکاندا بەر یەک نەکەون و ڕێز لە دامەزراوەکانی دەوڵەت بگرن.

 

پێویستە پێکەوە هاوکارین بۆ ڕاگرتنی ئەوەی دووبەرەکی و ئاژاوە دروست دەکات، هەموو لایەکیش دەزانین ئاگری ئاژاوە هەمووی وەک یەک دەسووتێنێت.

 

دۆخەکە زۆر سەختە، ئەمەش ڕاستییەکی تاڵە زۆر بەداخەوە، لەسەرمانە هەموومان هاریکار و پشتیوان بین بۆ ئەوەی بەرەو داڕمان نەچین، پێویستە ژیری و ویژدانمان بخەینە گەڕ و هەموو لە دەوری عێراق و عێراقییەکان کۆ ببینەوە، نەک لە دەوری بەرژەوەندییە تەسکەکان.

 

هەموو لایەک بەرپرسیارێتی دەکەوێتە سەرشانیان.. حیزبەکان و چینە سیاسییەکە و هێزە کۆمەڵایەتییەکان و سەرجەم لایەنە کاریگەرەکان.. پێویستە بڵێین لەسەر هەموو لایەک پێویستە بەپێی ڕێساکانی دانایی و بەرچاوڕوونی کار بکات لە پێناو عێراقدا بۆ ئەوەی جارێکی دیکە لەدەستی نەدەین.

 

عێراق سپاردەیە بۆ ئەوەی ئەم سپاردەیە لە دەست نەدەین..

 

ئەمە گوتەیەکە بە ڕاستگۆیی و ئەمانەوە دەیڵێم و ئەوەش دەبیستم کە لە پشت پەردە و ئاشکرادا دەگوترێت، ئێمە ڕاستگۆین، بە هیواین خەڵکی تریش ڕاستگۆ بن ئەم جارەیان لە پێناوی عێراق و عێراقییەکان..

 

ئێمە بەرپرسیارێتی هەڵدەگرین و ئامادەین هەر شت پێویست بێت بۆ عێراق بەبێ دوودڵی بیکەین.. ئاڵۆزی و گرێكە سیاسییە، چارەسەرەکەشی هەر سیاسییە، چارەسەریش بە دیالۆگی ڕاستەقینە دەکرێت و بە سازشکردن لەپێناو عێراق و عێراقییەکان.

 

لە عێراقدا ئەوەندە خەڵکی ژیر هەن، هوشیاربین بەرامبەر گرژی سیاسی، بۆ ئەوەی ئەو مینانە نەتەقنەوە کە دوو ساڵە بە هێمنی خەریکی پووچەڵکردنەوەیانین.

 

هەر بژین

 

بژی عێراق وەک نیشتمانێک بۆ ڕۆڵەکانی

والسلامُ علیکم ورحمةُ اللە وبرکاتُهُ