پەیامێک لە پارتییەوە بۆ گۆڕان لەبارەى هاوپەیمانێتى نێوانیان

ناس کورد-

پارتى دیموکراتى کوردستان جەختدەکاتەوە لەسەر هاوپەیمانێتى لەگەڵ بزوتنەوەى گۆڕان، ئەوەش لەپەیامێکدا بۆ ئەو بزوتنەوەیە لە (١٣)یەمین ساڵیادی دامەزراندنیدا.

کەناڵی ناس کورد لە تێلیگرام جۆین بکە   

لەپەیامەکەدا (25-7-2022) کە دەست "ناس کورد" کەوتووە، مەکتەبی سیاسی پارتى رایگەیاندووە "گۆڕان رۆڵی گرنگی ئێوە لە ئەزموونی حوکمڕانی هەرێم و پرۆسەی سیاسی بەرز دەنرخێنین".

دەقى پەیامەکە:

دەقی پەیامی پیرۆزبایی مەکتەبی سیاسی پارتی دیموکراتی کوردستان بۆ (١٣)یەمین ساڵیادی دامەزراندنی بزووتنەوەی گۆڕان:

بەڕێزان/ رێکخەری گشتی و ئەندامانی جڤاتی گشتی و نیشتیمانی لە بزووتنەوەی گۆڕان..

بە بۆنەی (١٣)یەمین ساڵیادی دامەزراندنی بزووتنەوەی گۆڕان پیرۆزباییەکی گەرم لە ئێوەی بەڕێز و ئەندامان و لایەنگرانی حزبەکەتان دەکەین و، هیوای سەرکەوتن و بەردەوامیتان بۆ دەخوازین لە خزمەتگەیاندن بە دۆزی رەوای گەلەکەمان.

ئێمە لە کاتێکدا ئەویادەتان پیرۆز دەکەین، رۆڵی گرنگی ئێوە لە ئەزموونی حوکمڕانی هەرێم و پرۆسەی سیاسی بەرز دەنرخێنین، هەروەها جەخت دەکەینەوە سەر هاوپەیمانێتی و هەماهەنگی نێوانمان و سەرجەم هێز و لایەنە سیاسییەکانی کوردستان بۆ داکۆکیکردن لە دەستکەوتەکانمان و پاراستن و بەهێزکردنی قەوارەی سیاسی و یاسایی هەرێمی کوردستان و بەدیهێنانی گشت مافەکانمان. 

لەو دەرفەتەدا هیوادارین بە هەموو لایەک دڵسۆزانە و بەرپرسانەتر هەوڵ بدەین بۆ چارەسەرکردنی کێشە و گیروگرفتەکان و پتەوترکردنی بنەماکانی پێکەوەژیانی سیاسی و دیموکراسی و دەستەبەرکردنی ئایندەیەکی رۆشن و فەراهەمکردنی گوزەرانێکی شایستەتر بۆ هاووڵاتیان و گەلە خۆڕاگرەکەمان.

دووبارە یادی دامەزراندنی بزووتنەوەکەتان پیرۆز بێت و، هەر سەکەوتوو بن..

مەکتەبی سیاسی پارتی دیموكراتى كوردستان

٢٥ـی٧ـی٢٠٢٢