گه‌ڕان

Shadow Shadow
چیرۆكه‌كانمان

ژنێك سوتا و منداڵێكیش خۆى خنكاند

وردەکاری هەردوو ڕوداوەکەی ڕاپەڕین لە زاری پۆلیسەوە

2019.03.15 - 10:35
وردەکاری هەردوو ڕوداوەکەی ڕاپەڕین لە زاری پۆلیسەوە

ناس كورد-

له‌ ڕاپه‌ڕین مێردمنداڵێك به‌په‌ت خۆى ده‌خنكێنێت، ژنێكیش به‌ سوتاوی له‌لایه‌ن هاوسه‌ر و كه‌سوكاره‌كه‌ییەوە گه‌یه‌ندراوه‌ته‌ نه‌خۆشخانه‌ی گشتی قه‌ڵادزێ، ئه‌ویش به‌ وته‌ى وته‌بێژى پۆلیسى ڕاپه‌ڕین بۆ ناس كورد.

 

شۆڕش ئیسماعیل وته‌بێژى پۆلیسى ڕاپه‌ڕین به‌ ناس كورد-ى ڕاگەیاند: "شه‌وى ڕابردوو ته‌رمی گه‌نجێك به‌ناوی (ڕ و ی) ته‌مه‌ن 15 ساڵ، كه‌ پیشه‌ی خوێندكاره‌ و به‌ ڕه‌گه‌ز نێره‌ و دانیشتووی قه‌زاى ڕانیه‌یه‌ گه‌یه‌ندرایه‌ نه‌خۆشخانه‌ی گشتی شاره‌كه"‌.

وتیشى: "له‌ئه‌نجامى لێكوڵینه‌وه‌كان ده‌ركه‌وتووه‌ مێرمنداڵه‌كه‌، له‌ ماڵی مامی  به‌ په‌ت خۆی هه‌ڵواسیوه‌ و به‌وهۆیه‌شه‌وه‌ گیانی له‌ده‌ستداوه‌، پاش توێكاری بۆ تەرمەکەی ئاسه‌واری برین به‌ ملیه‌وه‌ هه‌بووه‌ و له‌ ئێستاشدا هۆكاری ڕووداوه‌كه‌ نادیاره‌، دوای گرتنه‌به‌ری ڕێوشوێنی یاسایی و ته‌ندروستی، ته‌رمه‌كه‌ی ڕاده‌ستی كه‌سوكاری كراوه‌ته‌وه"‌.

 

هەر لە ڕوداوێکی تردا شەوی ڕابردوو "ژنێك به‌ناوی (ن  ئـ ع) كه‌ له‌دایكبووی ساڵی 2000و پیشه‌ی ژنی ماڵه‌وه‌ بووه، دانیشتووی ناحیه‌ی هه‌ڵشۆى سه‌ر به‌ قه‌زای پشده‌ره‌، به‌ سوتاوی له‌لایه‌ن هاوسه‌ر و كه‌سوكاره‌كه‌ی گه‌یه‌ندراوه‌ته‌ نه‌خۆشخانه‌ی گشتی قه‌ڵادزێ".

 وته‌بێژى پۆلیسى ڕاپه‌ڕین لەوبارەیەوە وتی :"به‌ وته‌ی خۆی له‌كاتێكدا سووتاوه‌ ویستویه‌تی (په‌ره‌مێز)ی نه‌وت هه‌ڵكبات و دواتر په‌ره‌مێزه‌كه‌ گڕی گرتووه‌ و به‌مه‌ش ئاگر له‌ ده‌ست و ده‌مووچاوی به‌ربووه‌"

پاش گەیشتنى به‌ نه‌خۆشنانه‌ و مانه‌وه‌ى بۆ چه‌ند كاتژمێرێك ژنه‌كه‌ گیانى له‌ده‌ستداوه‌ "په‌ڕاوى لێكۆڵینه‌وه‌ش بۆ ڕووداوه‌كه‌ كراوه‌ته‌وه‌".