سلێمانی؛ هاووڵاتیان لە بڵاوبوونەوەی پەتایەک ئاگادار دەکرێنەوە

 

ناس کورد- 

 

بەڕێوەبەری نەخۆشخانەی منداڵان هۆشداری لە بڵاوبوونەوەی سکچوون و ڕشانەوە لەنێو منداڵاندا دەدات و رێنمایی هاووڵاتیانیش دەکات، لە خۆیانەوە دەرمان بەکارنەهێنن.

کەناڵی ناس کورد لە تێلیگرام جۆین بکە   

 

لە ڕاگەیەنراوێکدا د. پشدەر عەبدوڵا، بەڕێوەبەری نەخۆشخانەی منداڵان لە سلێمانی (شەممە 11-6-2022) ڕایگەیاند، "لە ئێستادا شەپۆلێکی سکچوون و ڕشانەوە بڵاوبۆوەتەوە لە منداڵاندا و زیاتر لە ٧٠٪ نەخۆشەکان بەو هۆیەوە داخڵی نەخۆشخانە دەکرێن." 

 

ئاماژەی بەوەشکردووە، " لەماوەی ١٢ کاتژمێردا ٧٠ نەخۆش داخڵی بەشی فریاکەوتنی نەخۆشخانەی منداڵانی فێرکاری دکتۆر جەمال ئەحمەد ڕەشیدی منداڵانی فێرکاری کراون کە ٥٠ نەخۆشیان تووشبووی سکچوون و ڕشانەوەن." 

 

ئەوەشی خستووەتەڕوو، " هەموو ساڵێک لەگەڵ هاتنی وەرزی گەرمادا سکچوون و ڕشانەوە زۆر زیاد دەکات لەناو منداڵاندا ئەویش بەهۆی کاریگەری بەرزی پلەی گەرمایە کە لەوانەیە بەهۆی پیسبوونی سەرچاوەی ئاو و خراپ هەڵگرتنی خۆراک لەناو پلەی گەرمی بەرزداو گەشەکردنی هەندێک بەکتریا لەو پلە گەرمیەدا لەگەڵ ووشک بوونەوەی منداڵ لە پلەی گەرمی بەرزداو کەمتر بەرگەگرتنی سکچوون و ڕشانەوە." 

 

ڕێنمایی هاووڵاتیانیش دەکات و دەڵێت، "هۆکارەکانی سکچوون و ڕشانەوە زۆرن کەواتە لەخۆتەوە چارەسەر بەکارمەهێنە چونکە چارەسەرەکانیشیان جیاوازن، لەوانەیە هۆکارەکە ڤایرۆس یان بەکتریا یان پاڕاسایت یان خواردنی شیرینی یان هەستیاری بە پڕۆتین،یان نەخۆشی گەنم و جۆ یان ژەهراوی بوون یان هەستیاری بەجۆرە خواردنێک یان کۆڕۆنا یان چەندین هۆکاری تر بێت." 

 

ئاماژەی بەوەشکردووە، بۆ ڕێگەگرتن لە تووشبوون بە سکچوون و ڕشانەوە باشترە ئەم هەنگاوانە بنێیت:

 

١-هەموو ئاوێک بکوڵێنە انجا ساردی بکەرەو بۆ خواردنەوە بەکاری بهێنە.

 

٢-خواردن لەناو سەلاجە هەڵبگرە.

 

٣-سەورزە میوە پێش خواردنی جوان بشۆرەوە.

 

٤-زوو زوو دەستی منداڵەکەت بشۆ بەتایبەت دوای تەوالێت کردن.

 

٥-پاک و خاوێنی تەوالێت و حەمام زۆر گرنگە.

 

٦-بەکارنەهێنانی خاولی و پەرداخ و کەوچکی یەکتر.

 

٧-دوورکەوتنەوە لەخواردنی دەرەوە بەتایبەت ئەوانەی سەر عەرەبانەکان.

 

٨-باش کوڵاندنی گۆشت و خواردنەکان.