گه‌ڕان

Shadow Shadow
سیاسه‌تی

زیاتر بزانە

عەلی تەتەر: پەکەکە باوەڕی بە کورد و کوردستان نەماوە

2022.06.05 - 12:13
App store icon Play store icon Play store icon
عەلی تەتەر: پەکەکە باوەڕی بە کورد و کوردستان نەماوە

ناس کورد-

پارێزگاری دهۆک ڕایگەیاند، پەکەکە باوەڕی بە کورد و کوردستان نەماوە، "بۆ ئێمە زۆر دژوارە بە ناوی کوردایەتی دوژمنایەتی کوردایەتی دەکەن".

کەناڵی ناس کورد لە تێلیگرام جۆین بکە   

 

عەلی تەتەر، پارێزگاری دهۆک لە ڕێوەڕسمی ساڵیادی کوژرانی پێنج پێشمەرگە لە چیای مەتینا لەلایەن چەکدارانی پەکەکە (5ی حوزەیرانی 2022) ڕایگەیاند: "زۆر کەس لە ئێمە تێناگەن، نازانن چ زوڵمێک لە هەرێمی کوردستان و پێشمەرگە دەکرێت، ئەوەی هەرگیز بیرمان لێنەدەکردەوە ئەوە بوو کوردێک بتوانێت لولەی تفەنگی روو لە پێشمەرگە بکات، چۆن هێزێکی سیاسی کە خۆی بە کورد دەزانێت چۆن رووی چەک و مووشەکەکانی دەخاتە پێشمەرگە، رژێمی بەعس و رێکخراوی داعش دوژمنی کورد بوون و دیار بوون، بەڵام بەناوی کوردایەتی دوژمنایەتی کورد بکەیت ئەوە بۆ ئێمە زۆر دژوارە و پڕ ژانە، ئەو لایەنە سیاسییەی ئەو پێشمەرگانەی شەهید کردن باوەڕیان بە کوردایەتی و کوردستان نەماوە".

 

گوتیشی: "ئەو شتانەی لە مێژوو هەموومان لەسەری کۆک بووین وەک ئاڵا و ناوی پێشمەرگە و چەندین شتی تر پەکەکە هەوڵدەدا بیگۆڕێت، ئەوان مادام باوەڕیان بە کوردستان نییە بە چ مافێکەوە دێنە کوردستان، مادام ئێوە بۆ سووریای دیموکرات تێدەکۆشن بۆچی خەڵکی سووریا دێنن لێرە بە کوشتنیان دەدەن؟ ئەگەر بۆ دیموکراتیزەکردنی تورکیا کار دەکەن بۆچی شەڕی خۆیان دێننە ناو هەرێمی کوردستان؟ ئێوەی هاووڵاتی تورکین فەرموو بڕۆن بۆ تورکیا، مادام دەتانەوێت سنووری سایکس بیکۆ بمێنێت فەرموو رێزی لێبگرن و ئێوە هاووڵاتینامەی ( جنسیەی) وڵاتێکی دیکەتان هەیە بڕۆن لەوێ داوای مافی خۆتان بکەن".

 

عەلی تەتەر روو دەکاتە خەڵکی باکووری کوردستان و دەڵێ: "ئەرێ رەوایە کوڕ و کچەکانی ئێوە ناوچەکانی خۆیان جێبهێڵن و بێن لێرە کچ و کوڕی خەڵک شەهید بکەن؟ بێن رەوشی کوردستانی ئازادکراو تێکبدەن و شەڕی ناو ماڵی خۆتان بگوازنەوە ناو ماڵی دراوسێ؟ کەی رەوایە خەڵک لە رۆژئاوای کوردستان بێنی و رۆڵەکانی کوردی لێرە پێ شەهید بکەن؟. ئەوان دەڵێن کوردستان هەموو بۆ ئێمە وەک یەکە، ئەگەر راست دەکەن بۆچی پێشمەرگەی رۆژ ناتوانێت بچێتەوە رۆژئاوا، بۆچی بۆ ئەوان کە خەڵکی رۆژئاوان قەدەغەیە بچنەوە بەرگری لە خاک و کەسوکاری خۆیان بکەن، ئەگەر دەتانەوێت خەبات بکەن، فەرموون ئەوە عەفرین و سەرێکانی رزگاری بکەن، بۆچی تائێستا تەقەتان لەو شوێنانە نەکردووە".

 

ڕاشیگەیاند، "ئێمە باوەڕمان بە شەڕی نییە، بەڵام ئەوان دێن پێشمەرگە و گەنج و منداڵانی ئێمە لێرە شەهید دەکەن، بۆمب لەسەر رێگای خەڵک دادەنێنەوە، رێگری لە ژیان و گوزەرانی خەڵک دەکەن".