ئەنجامى لێکۆڵینەوە لە تەقینەوەى کافتریاکەى سلێمانى راگەیەنرا

ناس کورد-

بەرگرى شارستانى سلێمانى رایگەیاند، هۆکارى تەقینەوەى کافتریاکەى سلێمانى لێچوون و کۆبوونەوەى غاز بووە و دادگا لایەنى کەمتەرخەم دیاریدەکات.

کەناڵی ناس کورد لە تێلیگرام جۆین بکە   

رێکان عەزیز وتەبێژى بەرگرى شارستانى بە رۆژنامەنوسانى راگەیاند، دواى 14 کاتژمێر کارکردن کارەکانى بەرگرى شارستانى کۆتایی هات و دەرکەوت 14 کەس برینداربوون و بەشى زۆریان نەخۆشخانەیان جێهێشتووە.

وتیشى هۆکارى تەقینەوەکە لێچوون و کۆبوونەوەى غاز بووە، لێچونێک هەبووە لەبەشى پشتەوەى کافتریاکە کە خەڵوزى نێرگەلەى لێ گەشێنراوەتەوە، بۆیە غازە پەنگخواردووەکە تەقیوەتەوە.

وتەبێژى بەرگرى شارستانى باسى لەوەشکرد، تانکى و سیستەمى غازەکە وەکو خۆى ماوەتەوە و نەتەقیوە، تەنیا کێشەکە لێچوونەکە بووە، سیستەمەکە لەلایەن کۆمپانیایەکى تایبەتەوە دانراوە.

جەختیشیکردەوە، کەیسەکە لە بنکەى پۆلیسى رزگارییە و دادگا لایەنى کەمتەرخەم یەکلایی دەکاتەوە. بەهۆى تەقینەوەکەوە دوو بیناى پشتى کافتریاکەش زیانیان پێگەیشتووە.