گه‌ڕان

Shadow Shadow
سیاسه‌تی

ئەو كەسەی لە كەركوك توشی تای خوێنبەربوون بوو گیانی لەدەست دا

2022.05.06 - 15:10
App store icon Play store icon Play store icon
ئەو كەسەی لە كەركوك توشی تای خوێنبەربوون بوو گیانی لەدەست دا

ناس کورد-

ئەو كەسەی چەند ڕۆژێک لەمەوبەر لە شاری كەركوك توشی تای خوێنبەربوون بوو، نیوەڕۆی ئەمڕۆ هەینی 6ی ئایاری 2022 گیانی لەدەست دا.

کەناڵی ناس کورد لە تێلیگرام جۆین بکە   

 

 

سەرچاوەیەک لە ڕاگەیاندنی فەرمانگەی تەندروستیی کەرکوک بە كەركوك ناوی وت، "بەداخەوە ئەو کەسەی چەند رۆژێك لەمەوبەر توشی تای خوێنبەربون بوو، نیوەڕۆی ئەمڕۆ گیانیلەدەستدا".

 

جەختیشیكردەوە "ماوەی چەند رۆژێک بوو باری تەندروستی ناجێگیر بوو و بەهۆیەوە لە ژێر چاودێری وردی پزیشکیدا بوو".

 

ئەو سەرچاوەیە ئاماژەی بەوەشدا كە تەرمی توشبووەكە شۆردراوە و لە چاوەڕوانی تیمی پزیشكی داد-دان بۆ هەڵگرتنەوە و دواتر ناشتنی تەرمەكە.

 

ئەو هاوڵاتییەی بە تای خوێنبەربون مردووە، تەمەنی 47 ساڵە و قەسابی گەڕۆك بووە. پێنج رۆژ بوو لە نەخۆشخانەی ئازادی لەژێر چاودێری تەندروستیدا مابۆوە.

 

ئەوەش یەكەم حاڵەتی مردن و توشبون بوو بە تای خوێنبەربون لە پارێزگای كەركوك.

 

لە چەند هەفتەی رابردودا وەزارەتی تەندروستی عیراق بەڕەسمی بڵاوبونەوەی تای خوێنبەربونی لە عیراق راگەیاند.

 

تای خوێنبەربون، پەتایەكی ڤایرۆسییە، بەهۆی تێكەڵاوبون و لەڕێی ئاژەڵ و مێش و مەگەزەوە بۆ مرۆڤ دەگوازرێتەوە، هەروەها لە مرۆڤەوە بۆ مرۆڤیش دەگوازرێتەوە.

 

دیارترین نیشانەكانی

دڵ تێكهەڵاتن و رشانەوە، لەگەڵ ئازاری جومگەكان، سكچون، تا، هیلاكی و لاوازی لە نیشانە دیارەكانی تای خوێنبەربونن.

 

هەروەها چەند نیشانەیەكی نەخۆشییەكە دەریدەخات كە مەترسی لەسەر ژیانی توشبوەكە هەیە، لەوانە خوێنبەربونی ژێر پێست، دروستبونی كێشە لە دەماغ، بێهۆشبون، لەكاركەوتنی گورچیلە، دروستبونی كێشەی هەناسەدان و لەكاركەوتنی جگەر، ئەوەش بەپێی وەزارەتی تەدروستیی عیراق و رێكخراوی تەندروستیی جیهانی.

 

چۆن دەگوازرێتەوە؟

كاركردن یان تێكەڵبون لەگەڵ كەسانی توشبوو، سەربڕین و خواردنی ئاژەڵی توشبوو، بەكارهێنانی دەرزیی و ئامێری بەكارهاتوی توشبوو، لە هۆكارەكانی گواستنەوەی نەخۆشییەكەن، لەگەڵ سێكسكردن لەگەڵ كەسانی توشبوو بەبێ خۆپارێزی.

 

مێش و مەگەز، جرج و مشك، شەمشەمەكوێرە و گەنە هۆكاری سەرەكی بڵاوبونەوەی تای خوێنبەربونن، هەروەها مرۆڤی توشبوش.

 

چۆن خۆت دەپارێزیت؟

بەپێی رێنماییەكانی رێكخراوی تەندروستی جیهانی و وەزارەتی تەندروستی عیراق، بۆ خۆپارێزی، پێویستە گۆشت بە باشی دابپۆشیت و بیپارێزی لە مێش و مەگەز، دوركەوتنەوە و خۆپارێزی لە كەسانی توشبوو، بە باشی پاككردنەوەی سەتڵی خۆڵ و خاشاك و داپۆشینی، لەگەڵ دانانی تەلمێش بۆ دەرگا و پەنجەرە.

 

وەزارەتی تەدروستیی عیراق و رێكخراوی تەندروستیی جیهانی، رێنمایی هاوڵاتیان دەكەن چیمەنی ماڵەكانیان ببڕن، لە پێناو رێگریی لە مێش و مەگەز و بڵاوبونەوەیان.