ناس کورد-
وەزارەتی پێشمەرگەی هەرێمی کوردستان ڕەتیدەکاتەوە، هیچ لیستێکی جیاکاری شەهیدان و لایەنی سیاسیان بڵاو کردبێتەوە و دەڵێت، بەهیچ جۆرێک پۆلبەندی و ریزبەندی شەهیدانی سەربەرزی دژ بە داعش نەکراوە و ئەوەی بڵاوکراوەتەوە ساختەیە.
کەناڵی ناس کورد لە تێلیگرام جۆین بکە
لە ڕوونکردنەوەیەکدا وەزارەتی پێشمەرگەی هەرێم (هەینی 29-4-2022) ڕایگەیاند، "بەرای گشتی و پێشمەرگە قارەمانەکان و میدیاکاران رادەگەیەنین، وەزارەتی پێشمەرگە هیچ لیستێکی جیاکاری شەهیدان و لایەنی سیاسیان بڵاو نەکردووەتەوە و بەهیچ جۆرێک پۆلبەندی و ریزبەندی شەهیدانی سەربەرزی دژ بە داعش بەرەسمی نەکراوە و نە لەرابردوو نە لەئێستا و داهاتوو نەبووەو نابێت."
ئاماژەی بەوەشکردووە، " هەر لیست و جیاکارییەک لەوبارەیەوە بەناوی ئەمینداری گشتیی و وەزارەتی پێشمەرگە بڵاوکراوەتەوە ساختەیە و ناحەقیشە بەرامبەر بەخوێنی شەهیدانمان. "
ئەوەشی خستووەتەڕوو، "لەوبارەیەشەوە چەواشەکاران و ساختەکاران دەدەین بە یاسا و روبەڕووی دادگایان دەکەینەوە."
وەزارەتی پێشمەرگە جەختیشیکردووەتەوە، "ئێمە لەوەزارەتی پێشمەرگە دووپاتیدەکەینەوە، شەهیدانمان بە یەکەوە لە سەنگەری بەرگری خاکی کوردستان و کەرامەتی تاک بەتاکی گەلەکەمان و پاراستنی ئەزموونی هەرێم و ئاشتی بۆ جیهان گیانیان بەخشیوە، بۆیە لە لای ئێمە شەهیدان شەهیدی ئاڵاو خاکی پیرۆزی کوردستانن."
