30 دۆنم زەوی بۆ دروستکردنی پڕۆژەیەکی تایبەت دراوە بە سەرمایەدارێکی نزیک لە یەکێتی

کەناڵی ناس کورد لە تێلیگرام جۆین بکە   

ناس کورد- شەهرام عەزیز کەسێکی دەستڕۆیشتووی شاری سلێمانی لەسەر زەوییەکی 30 دۆنمی، بەناوی وەبەرهێنانەوە بەشێوەیەکی "نایاسایی" سەرقاڵی دروستکردنی پێشانگایەکی ئۆتۆمبێلە، هەرچەندە داواکاری گشتی بڕیاری ڕاگرتنی داوە بەڵام پڕۆژەکە بەردەوامە. . لەگەڵ ئەوەی پڕۆژەکە پڕۆژەیەکی بازرگانی تایبەتە، بەڵام زەوییەکە موڵکی گشتییە و ئەندامێکی ئەنجومەنی پارێزگای سلێمانی دەڵێت، ئەو کەسەی پڕۆژەکە ئەنجام دەدات داگیری کردووە، بەوتەی سەرۆکی شارەوانی سلێمانیش هیچ بەڵگەیەک نییە کە ئەو زەوییە بۆ وەبەرهێنان درابێت بەو کەسە. . لە چەند ڕۆژی ڕابردوودا ئەندامێکی ئەنجومەنی سلێمانی دەچێتەسەر پڕۆژەکە و لەوکاتەدا دەبینێت چەند چەکدارێک لەوێن و چەندین داری زەیتونیان بڕیوەتەوە، لە ئەنجامدا چەکدارەکان هێرش دەکەنەسەر ئەندامەکەی ئەنجومەنی پارێزگا و دواتر سکاڵاش لە دژی تۆمار دەکەن. . محەمەد شێخ وەهاب، بڕیاردەری لیژنەی شارەوانییەکان لە ئەنجومەنی پارێزگای سلێمانی بە ناس کوردی ڕاگەیاند: " ئاگاداربووم لەوەی کۆمپانیایەک پڕۆژەیەکی نایاسایی لە شاری سلێمانی بەرامبەر هێزەکانی 70 ئەنجامدەدات و شەوی 21ی ئەم مانگە چوومە نزیک پڕۆژەکە بۆ بەدوداداچوون، کاتێک نزیکبوومەوە بینیم چەند کەسێک لەوێن و چەندین داری زەیتوونیان بڕیوەتەوە و شکاندووە، بۆ کارکردن لە پڕۆژەکەدا، داوام لێکردن کارەکانیان ڕابگرن، بەڵام ئەوان ویستیان هێرشبکەنە سەرم". . وتیشی، دواتر پەرلەمانی کوردستانی لەوە ئاگادارکردووەتەوە لەوێشەوە، ئەنجومەنی دادوەری ئاگادارکراوەتەوە، چونکە ناکرێت زەوییەکی موڵکی گشتی کە نزیکی فڕۆکەخانەی سلێمانییە بدرێت بە کەسێک بۆ ئەنجامدانی پڕۆژەی بازرگانی تایبەت. . ئەو ئەندامەی لیژنەی شارەوانییەکان لە ئەنجومەنی پارێزگای سلێمانی ئاماژەی بەوەشکرد، بڕینەوەی ئەو دارانە و تێکدانی سەوزاییش بە هەموو شێوەیەک پێچەوانەی یاسایە و ئەوان باخێکیان کردووە بە بیابان. . ناس کورد زانیویەتی ئەو کەسە ناوی (و، ڕ)ەو خاوەنی کۆمپانیا و سەرمایەدارێکی ناسراوی شاری سلێمانییە و کەسێکی نزیکە لە یەکێتی نیشتیمانی کوردستانەوە. . ئەگەرچی ئەو ئەندامەی ئەنجومەنی پارێزگای سلێمانی بە ئەرکی شارەوانی دەزانێت پڕۆژەکە ڕابگرێت، بەڵام شارەوانی سلێمانی ئاماژە بەوەدەکات ئەوان هێزییان نییە و وەک پێویست ناتوانن ڕێگری بکەن. . توانا کەمال، سەرۆکی شارەوانی سلێمانی بە ناس کوردی ڕاگەیاند: "ئەو پڕۆژەیە پێشتر ڕەزامەندی دەستەی وەبەرهێنانی بۆ وەرگیراوە و ڕووبەڕی زەوییەکەش 30 دۆنمە، ساڵی 2018ش ڕەزامەندی شارەوانی هەبووە، بەڵام داوامان کردووە نوسراوێكی فەرمی بێنن کە ئەو زەوییەیان پێدرابێت و تائێستا هیچیان نەهێناوە، بۆیە پڕۆژەکەمان ڕاگرت." . پێچەوانەی سەرۆکی شارەوانی، محەمەد شێخ وەهاب ئاماژەی بەوەکرد، کە ئەوەی جێگای سەرنجە دوای ئاشكراکردنی دۆسییەکە و ئاگادارکردنەوەی لایەنە پەیوەندیدارەکان، بەڵام هێشتا کارکردن لە پڕۆژەکە بەردەوامە و نەوەستاوە. . لەوبارەیەوە سەرۆکی شارەوانی سلێمانی باسی لەوەکرد: "ئێمە سێ جار ئاگادارمان کردووتەنەوە کە پڕۆژەکە ڕابگرن، بەڵام کاتێک دەڕۆین، دەستدەکەنەوە بە کارکردن، ئێمەش هێزمان نییە تا وەک پێویست بتوانین ئەو پڕۆژانە ڕابگرین". . هەر لەوبارەیەوە هەڤاڵ ئەبوبەکر، پارێزگاری سلێمانی بێ ئاگایی خۆی لە بابەتەکە نیشاندا و بە ناس کوردی ڕاگەیاند: "تائێستا بە فەرمی ئاگادار نەکراوینەتەوە لە کەیسێکی لەو جۆرە". . پارێزگاری سلێمانی ئاماژەی بەوەشكرد، هەرکات نوسراویان پێگەیشت لە کارێکی نایاسایی لەو شێوەیە هەیە، ئەوکات بەدواداچوون دەکەن، تا بزانن کارەکە لە دەستەی وەبەرهێنان بووە یاخود شارەوانییەوە کراوە و پڕۆژەکەش دەوەستێنن. . هاوکات ڕەمەزان نامیق کە ئەندامێکی دیکەی ئەنجومەنی پارێزگای سلێمانییە و بەدواداچوونی بۆ دۆسییەکە کردووە بۆ ناس کوردی ڕوونیکردەوەیی، هیچ فەرمانگەیەکی حکومی جورئەتی ئەوەی نییە خۆی بکات بە خاوەنی دۆسیەکە و پڕۆژەکە بوەستێنێت. . ئاماژەی بەوەشكرد: " ئەگەر بەم شێوەیە بڕوات چەند ساڵێکی تر مافیاکانی شار شۆڕش دەکەن و گەورەیی خۆیان دەسەلمێنن بەسەر دام ودەزگاکانی حکومەت،با هاوڵاتی هەژاریش هەر دەست بەکڵاوی خۆیەوە بگرێت."