ناس کورد-
سه‌رۆكایه‌تی كۆماری عێراق راگه‌یه‌ندراوێكی له‌باره‌ی هێرشه‌كانی سوپای توركیا بۆسه‌ر ناوچه سنورییه‌كانی هه‌رێمی كوردستان بڵاوكرده‌وه و دەڵێی، ئەوەی تورکیا دەیکات قبوڵکراو نییە، دەشڵێت، نابێت لە خاكی عێراقیشه‌وه هێرش بكرێته سه‌ر وڵاتانی دراوسێ.
کەناڵی ناس کورد لە تێلیگرام جۆین بکە
لە ڕاگەیەنراوێکدا سه‌رۆكایه‌تی كۆماری عێراق (سێشەممە 19-4-2022) ڕایگەیاند، " به نیگه‌رانیه‌كی زۆره‌وه له ئۆپراسیۆنه سه‌ربازیه‌كانی توركیا له‌ناو سنوری عێراق و هه‌رێمی كوردستان ده‌ڕوانین كه پێشێلكردنی سه‌روه‌ری و هه‌ڕه‌شه‌یه بۆسه‌ر ئاسایشی نیشتمانیی عێراق."
ئاماژەی بەوەشکردووە، "دوباره‌كردنه‌وه‌ی ئۆپه‌راسیۆنه سه‌ربازییه‌كانی توركیا له سنوری عێراق له هه‌رێمی كوردستان به‌بێ هه‌ماهه‌نگی له‌گه‌ڵ حكومه‌تی عێراق سه‌ره‌ڕای ئه‌وه‌ی پێشتر داوای راگرتن و ئه‌نجامدانی گفتوگۆ و هه‌ماهه‌نگی كراوه، جێگەی قبوڵ نییە."
سەرۆکایەتی کۆماری عێراق لەگەڵ ئەوەی جەختیکردووەتەوە له پته‌وكردنی په‌یوه‌ندییه‌كی باش له‌گه‌ڵ توركیا له‌سه‌ر بنه‌مای به‌رژه‌وه‌ندیی هاوبه‌ش و چاره‌سه‌ركردنی كێشه ئه‌منییه‌كان له‌ڕێگه‌ی هه‌ماهه‌نگی هاوبه‌ش و گفتوگۆی پێشوه‌خته‌وه، هۆشداریش دەدات، " ڕێوشوێنی ئه‌منی تاكلایه‌نه له‌دۆسیه‌ی ئه‌منی قبوڵكراو نییه و پێویسته رێز له‌سه‌روه‌ری خاكی عێراق بگیرێت".
لە ڕاگەیەنراوەکەدا ئەوەش هاتووە، ئەو هەنگاوانە ڕەتدەکەینەوە كه عێراقه بكرێته گۆڕه‌پانی یه‌كلاكردنه‌وه‌ی ململانێكان و سه‌روه‌رییه‌كه‌ی پێشێل بكرێت و هه‌ڕه‌شه له‌سه‌ر ئاسایش و سه‌قامگیری دروست بكرێت، هەروەها ڕەتیشیدەکەینەوە بكرێته گۆڕه‌پانێك بۆ ده‌ستدرێژی و هه‌ڕه‌شه بۆسه‌ر هیچ وڵاتێكی دراوسێ."
