ناس کورد-
وەزیری ئاوەدانکردنەوە و ئەندامی تیمی گۆڕان لە حکومەت رایگەیاند، تا ئێستا ئاوات شێخ جەناب، وەزیری دارایی دەستلەکارکێشانەوەی پێشکەشی حکومەت و گۆڕان نەکردووە، تەنیا نیگەرانییەکانی بە جڤاتی نیشتمانی گەیاندووە.
کەناڵی ناس کورد لە تێلیگرام جۆین بکە
دانا عەبدولکەریم (7-4-2022) لە چاوپێکەوتنێکى تەلەفزیۆنیدا لەگەڵ کەناڵى "رووداو" وتى لە کۆبوونەوەى تیمى گۆڕان و پارتى لە حکومەت باسی هەڵسەنگاندنی رێککەوتنی نێوان پارتی و گۆڕان و نیگەرانییەکانی ئاوات شێخ جەناب، وەزیری داراییان کردووە.
وتیشی، رێککەوتنی گۆڕان و پارتی نیوەی جێبەجێکراوە.
لەبارەی نیگەرانییەکانی وەزیری دارایی، دانا عەبدولکەریم وتی، "ئاوات شێخ جەناب، وەزیری دارایی لە ململانێی نێوان پارتی و یەکێتی نیگەرانە کە کاریگەریی خراپی هەبووە لەسەر وەزارەتی دارایی."
دانا عەبدولکەریم رەتیکردەوە مەسرور بارزانى سەرۆکى حکومەت مەرجى دانابێت بۆ پێدانەوەى پۆستى دارایی بە گۆڕان ئەگەر ئاوات شێخ جەناب دەستلەکاربکیشێتەوە.
