گه‌ڕان

Shadow Shadow
سیاسه‌تی

وردەکاریی

لە هەولێر منداڵێک ماوەی 20 ڕۆژە جێهێڵدراوە و کەسوکاری دیار نین

2022.03.27 - 15:54
App store icon Play store icon Play store icon
لە هەولێر منداڵێک ماوەی 20 ڕۆژە جێهێڵدراوە و کەسوکاری دیار نین

ناس کورد- 

بەڕێوەبەرایەتی بەرەنگاربوونەوەی توندوتیژی دژی ئافرەتان و خێزان/هەولێر ڕایگەیاند، منداڵێکی تەمەن چوار ساڵان بەناوی هەناسە ماوەی 20 ڕۆژە جێهێڵدراوە و کەسوکاری دیارنییە، داواش دەکات هەرکەس زانیاریی دەربارەی کەسوکاری هەیە ئاگاداریان بکاتەوە.

کەناڵی ناس کورد لە تێلیگرام جۆین بکە   

 

لە ڕاگەیەنراوێکدا بەڕێوەبەرایەتی بەرەنگاربوونەوەی توندوتیژی دژی ئافرەتان و خێزان/هەولێر (یەکشەممە 27-3-2022) ڕایگەیاند، "20 ڕۆژ لەمەوبەر و رێکەوتی 7-3-2022، لەلایەن هەواڵدەرێکەوە ئاگادار کراینەوە کە منداڵێک لەلای نەخۆشخانەی مەلافەندی لە گەڕەکی باداوەی شاری هەولێر جێهێڵدراوە و کەسوکاری دیار نیە." 

 

ئاماژەی بەوەشکردووە، "دوای بەدواداچوون و لێکۆڵینەوە دەرکەوت کەوا منداڵەکە لەهەمان شوێن جێهێڵدراوە و تەمەنی لە نێوان (سێ بۆ چوار) ساڵە و بە وتەی خۆی ناوی ( هەناسە رێباز)ە." 

 

ئەوەشی خستووەتەڕوو، "لە ئێستادا کەیسەکەی لەژێر لێکۆڵینەوەیە لە نوسینگەی قەڵای سەر بە بەڕێوەبەرایەتیمان و ماوەی (20) ڕۆژە (هەناسە رێباز) لە خانەی نەوجەوانانی هەولێرە  و کەسوکاری دیارنیە و کەسیش بەدواداچوونی نەکردووە." 

 

لە ڕاگەیەنراوەکەدا ئەوەش هاتووە، "بۆیە لەسەر فەرمانی دادوەر بڕیاردرا بە بڵاوکردنەوەی ناو و وێنەی لە کەناڵ و پەیجە فەرمیەکانی سەر بە حکومەت، بۆیە ئێمە لێرەوە بڵاوی دەکەینەوە و داوا دەکەین هەرکەسێک زانیاری هەیە دەربارەی ناونیشانی کەسوکاری (هەناسە) پەیوەندیمان پێوە بکات لە رێگای هێڵی گەرمی ژمارە ( ١١٩)ی بەڕێوەبەرایەتیمان بۆ ئەوەی بتوانین بە کەسوکاری شاد بکەینەوە یاخود چارەسەرێکی یاسایی بۆ کێشەکەی بکرێت."