گه‌ڕان

Shadow Shadow
سیاسه‌تی

یەكگرتوو لەبارەی دانیشتنی سبەینێی پەرلەمان خوی یەكلایی كردەوە

2022.03.25 - 22:31
App store icon Play store icon Play store icon
یەكگرتوو لەبارەی دانیشتنی سبەینێی پەرلەمان خوی یەكلایی كردەوە

ناس كورد-
فراكسیۆنی یەكگرتووی ئیسلامی كە خاوەنی چوار پەرلەمانتارە لە پەرلەمانی بەغدا بڕیاری دا بەشداری دانیشتنەكەی سبەینێی پەرلەمان نەكات كە تایبەتە لە هەڵبژاردنی سەرۆككۆماری عێراق.

کەناڵی ناس کورد لە تێلیگرام جۆین بکە   

 

ئەنجومەنی جێبەجێکردنی یەکگرتووی ئیسلامیی کوردستان لە ڕاگەیەنراوێکدا (25-3-2022) دەڵێت، "بۆ پاراستنی یەکریزی نیشتمانی و تەوافقی سیاسی و پاراستنی دەستکەوتەکان و دورخستنەوەی مەترسییەکان و چارەسەرکردنی ئاڵۆزییەکان، بریاریدا کە فراکسیۆنی یەکگرتوو لە کۆبونەوەی ڕۆژی 26ی ئازاری ئەنجومەنی نوێنەرانی عێراق بەشداری نەکات و دەنگ نەدات بە هیچ کام لە پاڵێوراوانی پۆستی سەرۆک کۆماری عێراق کە پشکی کوردە".

 

دەشڵێت، "بەداخەوە نەتوانرا وەک کورد لەسەر پاڵێوراوێکی هاوبەش ڕێکبکەوین، لەجیاتی ئەوه هەرلایەک بە پاڵێوراوی حیزبی چوونە کێبەرکێکەوە، بەمەش بەرژەوەندی حیزبی زاڵکرا بەسەر بەرژەوەندی گشتیدا."

 

دەقی ڕاگەیەنراوەکە:

بەناوی خوای گەورە و میهرەبان
بەیاننامەی کۆبونەوەی ئەنجومەنی جێبەجێکردنی یەکگرتووی ئیسلامیی کوردستان .
هاوڵاتیانی هەرێمی کوردستان ..
گەلانی خۆشەویستی عێراق ..
ئاشکرایە کە ئەمڕۆ عێراق بە قۆناغێکی یەکجار هەستیار و ئاڵۆزدا تێپەر دەبێت ، قۆناغێک پێویستە بەوپەڕی هەستکردن بە بەرپرسیاریەتی و دڵسۆزی و خەمخۆرییەوە مامەڵەی بکەین ئەگەرنا چارەنوسێکی نادیار و پڕمەترسی چاوەڕێی دەکات ، بێگومان هەرێمی کوردستانیش بەدەرنابێت لەو چارەنوس و مەترسیانە .
لەو ڕوانگەوە ، ئەنجومەنی جێبەجێکردنی یەکگرتووی ئیسلامیی کوردستان لە کۆبونەوەیەکی تایبەتدا ، دوای ڕاوێژکردن لەگەڵ فراکسیۆنی یەکگرتوو لە ئەنجومەنی نوێنەرانی عێراق ، پرسی هەڵبژاردنی سەرۆک کۆمار و دەستنیشانکردنی سەرۆک وەزیرانی نوێی عێراقی تاوتوێکرد کە بریارە لە کۆبوونەوەی ڕۆژی 26/3/2022 ی ئەنجومەنی نوێنەرانی عێراق یەکلایی بکرێتەوە .
ئەنجومەنی جێبەجێکردن دوای گفتوگۆیەکی تێروتەسەل و ڕاڤەکردنی پێشبینی و گۆرانکاری و پێشهاتە ناوخۆیی و ئیقلیمی و نێودەوڵەتیەکان ، بۆ پاراستنی یەکریزی نیشتمانی و تەوافقی سیاسی و پاراستنی دەستکەوتەکان و دورخستنەوەی مەترسییەکان و چارەسەرکردنی ئاڵۆزییەکان و ڕێزگرتن لە خیاری پێکهاتەکانی عێراق ، هەروەها بۆ هاوتەریببوون لەگەڵ هەڵوێستی ئۆپۆزسیۆن بوونمان لە کوردستان و لە عێراق بریاریدا کە فراکسیۆنی یەکگرتوو لە کۆبونەوەی ڕۆژی 26/3 ی ئەنجومەنی نوێنەرانی عێراق بەشداری نەکات و دەنگ نەدات بە هیچ کام لە پاڵێوراوانی پۆستی سەرۆک کۆماری عێراق کە پشکی کوردە ، کە بەداخەوە نەتوانرا وەک کورد لەسەر پاڵێوراوێکی هاوبەش رێکبکەوین ، لەجیاتی ئەوه هەرلایەک بە پاڵێوراوی حیزبی چوونە کێبەرکێکەوە ، بەمەش بەرژەوەندی حیزبی زاڵکرا بەسەر بەرژەوەندی گشتیدا .
ئەنجومەنی جێبەجێکردنی
یەکگرتووی ئیسلامیی کوردستان
25/3/2022