گه‌ڕان

Shadow Shadow
سیاسه‌تی

زانیاریی زیاتر

نوێترین زانیاری لەبارەی کوژرانی ماریا

2022.03.08 - 11:02
App store icon Play store icon Play store icon
نوێترین زانیاری لەبارەی کوژرانی ماریا

ناس کورد- 

وتەبێژی پۆلیسی هەولێر ڕایگەیاند، لەدوای دەستگیرکردنی مامی لەئێستادا فەرمانی دەستگیرکردن بۆ برایەکی ئیمان سامی (ماریا) دەرچووە کە تۆمەتباری سەرەکیی ڕووداوەکەیە.

کەناڵی ناس کورد لە تێلیگرام جۆین بکە   

 

هۆگر عەزیز، وتەبێژی پۆلیسی هەولێر (سێشەممە 8-3-2022) بە "ناس کورد"ی ڕاگەیاند، "لەدوای دەستگیرکردنی مامی ئیمان سامی ناسراو بە (ماریا) لەئێستادا فەرمانی دەستگیرکردن بۆ برایەکی دەرچووە." 

 

وتیشی، "ئیمان لەلایەن مامییەوە نەکوژراوە، تۆمەتباری سەرەکیی ڕووداوەکە براکەیەتی و گەڕان بەشوێنیدا بەردەوامە."

 

ئیمان سامی مەغدیدی تەمەن 20 ساڵ کە لە تۆڕە کۆمەڵایەتییەکاندا بە ماریا ناسراوە، کاتژمێر 23:00ی شەوی یەکشەممە لە شەقامی 100 مەتری لە نزیک چوارڕێیانی فڕۆکەخانەی نێودەوڵەتیی هەولێر کوژرا، پۆلیسیش مامێکی ئەو ئافرەتەی دەستگیرکردووە.  

  

ماریا ئاینی خۆی گۆریوە؟  

هەژان یاسین کە هاوڕێی نزیکی ماریا تایبەت بە "ناس کورد"ی ڕاگەیاند، ئەوەی دەوترێت ماریا ئاینی خۆی گۆڕیوە دورە لە ڕاستییەوە و دەڵێت، "ئەو ملوانەکە خاچەی ماریا لە ملی بوو لەلایەن ژنێکی پیر و نابینای مەسیحییەوە وەک خەڵات پێی درا کاتێک دەستیگرت و لە شەقامێکی عەنکاوە پەڕاندییەوە".  

  

وتیشی، "ماریا دوو ساڵ و 13 ڕۆژە لە هاوسەرەکەی جیابووەتەوە بەهۆی ئەوەی منداڵیان نەدەبوو، ئەوان زۆر یەکتریان خۆشدەویست و هیچ کێشەیەکیان نەبووە، بەڵام بە زۆری خزمە نزیکەکانیان لەیەکتر جیابوونەوە." 

 

هەژان کە لە ساڵی 2020دا لە ماڵەکەی خۆیدا داڵدەی ماریای داوە و چەند مانگێک لای ماوەتەوە بە توندی ڕەتیکردەوە کە ماریا ئاینی خۆی گۆڕی بێت و دەڵێت، "هەندێک جاریش نوێژی کردووە، بەڵام بەهۆی بارودۆخی خراپی خۆیەوە زۆرجار گلەیی لە خوا دەکرد".  

  

باوکی و دایکی ماریا لە یەکتر جیابوونەتەوە و بەجیا هاوسەرگیرییان کردووەتەوە، بە قسەی هەژان کە دوێنێ نزیکەى سێ کاتژمێر پێکەوە لەگەڵ ماریا بە تەلەفۆن قسەیان کردووە، ماریا زۆر حەزی کردووە بچێتەوە ماڵی باوکی، بەڵام باوکی ڕازی نەدەبوو.  

  

دەشڵێت، "مامێکی ماریا بە بەردەوامی هەڕەشەی کوشتنی لێ دەکرد، دوێنێ کە قسەم کرد لەگەڵی وتی دیسان هەڕەشەی کوشتنیان لێ کردوومەتەوە."  

  

ماریا هاوڕەگەزخواز بوو؟  

لەبارەى هاوڕەگەزخوازی ماریا، هەژان یاسین وتی "ڕاستە ماریا تێکەڵاوی چالاکی و ڕێکخراوەکانی هاوڕەگەزخوازی بوو، بەڵام خۆی بە هیچ شێوەیەک هاوڕەگەزخواز نەبوو، هەمیشە دەیوت من بۆیە دەچمە ڕێکخراوەکانی هاوڕەگەزخوازی تاوەکو بتوانم بە تەنها خانوو بگرم و بەو بڕە پارە کەمەی کەم دەیدەنێ بژی."  

  

"ماریا دەیویست وا خۆی نیشان بدات کە هاوڕەگەزخوازە بۆئەوەی هیچ بەرپرس و کەسێک لە ڕێکخراوەکاندا هەراسانی نەکەن."  

  

هەژان یاسین زیاتری بۆ ناس کورد ئاشکرای کرد و وتی، "ماریا بەمدواییە چووبووە سلێمانی تاوەکو لای هاوڕێیەکی بمێنێتەوە، بەڵام دوێنێ پێی وتم کە حەزی لە مانەوە نەبووە لای ئەو هاوڕێیەی و بۆیە هاتووەتەوە بۆ هەولێر."  

  

ماریا دوای ئەوەی لە هاوسەرەکەی جیابووەتەوە لە کافتریایەک کاری کردووە، هەندێک جاریش لە دایەنگایەک کاری کردووە، ماریا پاسپۆرت و پێناسی باری شارستانی نەبووە.  

  

هەراسانکردن و دەستدرێژی لە شێڵتەرەکانی سلێمانی  

هەژان باسی لەوەشکرد، ماوەیەک ماریا لە سلێمانی دەستگیرکراوە و دواتر چووەتە شێڵتەرەکانی پاراستنی ژنان، بەڵام لەوێ هەوڵی هەراسانکردن و دەستدرێژی سێکسی کراوەتەسەر، "بۆیە دەماری دەستی خۆی بڕیوە تاوەکو ڕێگری لەوە بکات و لەوێ ڕزگاری بێت."  

  

"ماریا دوێنێ لە تەلەفۆن وتی لە ڕۆژی 8ی مارسدا و لە چالاکییەکاندا باسی ئەو شێڵتەرانە دەکەم کە بەناوی بەرگریی لە ئافرەتەوە دروستکراون کەچی ئافرەتان هەراسان دەکرێن."  

  

کۆتا داوای ماریا لە هەژان  

لەبارەى دواین داوای ماریا لە هەژان لە پەیوەندییە تەلەفۆنییەکەدا، هەژان وتی، "ماریا پێی وتم کە بە کەسێکی هاوڕێی بڵێم، من نامەوێت ناوی ببەم، کە ئەگەر کوژرا ئەو ڤیدیۆیەی لایەتی بڵاوی بکاتەوە کە تێیدا ماریا باس لە توندوتیژی مامی و خێزانەکەی دەکات بۆسەری."