گه‌ڕان

Shadow Shadow
سیاسه‌تی

’’دەستپاکی بێتاوانی ئێمەی دەرکردووە’’

هۆشیار زێباری هێرش دەکاتە سەر دادوەرەکانی دادگای فیدراڵی

2022.02.20 - 11:17
App store icon Play store icon Play store icon
هۆشیار زێباری هێرش دەکاتە سەر دادوەرەکانی دادگای فیدراڵی

ناس كورد-

هۆشیار زێباری، ئەندامی مەکتەبی سیاسیی پارتی و دورخراوە لە پێشبڕکێی سەرۆکایەتی کۆمار بە بڕیاری دادگای فیدراڵی لە وتارێکدا هێرش دەکاتە سەر دادوەرانی دادگاکە و تۆمەتباریان دەکات بەوەی "کەوتنەتە ناو مەنجەڵی سیاسەت" و دەڵێت، "بابەتەکان لەسەر ڕاسپاردەی گەورەکان یەکلایی دەکەنەوە."

کەناڵی ناس کورد لە تێلیگرام جۆین بکە   

 

زێباری لە وتارێکدا کە لە ڕۆژنامەی "الشرق الأوسط" بڵاویکردووەتەوە و "ناس کورد" خوێندوویەتییەوە (20-2-2022) دەڵێت، "ئەو بڕیارە مێژوویەی دادگای فیدڕاڵی مانای ئەوەیە کە هاوڵاتی تاوانبارە تەنانەت ئەگەر بێتاوانیشی سەلمێنرابێت، هەروەها ئەوەشی سەلماند کە ئەو بڕیارە سیاسیانەی کە دەسەڵاتی دادوەری و لێکۆڵینەوەکان بە هەڵە سەلماندویانە، بەسە بۆ بێبەشکردنی هاوڵاتی لە بەکارهێنانی مافە سیاسییەکانی".

 

 

هۆشیار زێباری باسی لەوەشکردووە کە کارکردنی دادگای فیدڕاڵی بە دەقەکانی دەستور تەنها بۆ فریودانی ناوخۆ و دووڕوویی نێودەوڵەتییە، بۆیە چیتر کەسێکی ستەملێکراو و مافخوراو ناتوانێت حەقی خۆی وەربگرێتەوە.

 

دەشڵێت، "ئەوە حاشاهەڵنەگرە کە بڕیاری پەرلەمانی عێراق بۆ سەندنەوەی متمانە لێم بڕیارێکی سیاسی بوو، بەو بەڵگەیەی کە دەستەی دەستپاکی سەرجەم من بێتاوان دەرکرد لە سەرجەم ئەو تۆمەتانەی درابوونە پاڵم."

 

ڕۆژی 13ی شوباتی 2022، دادگای فیدڕاڵی بڕیاری دا بە دەستورینەبوونی کاندیدبوونی هۆشیار زێباری بۆ پۆستی سەرۆککۆمار، هەر ئەو ڕۆژە ناوبراو لە کۆنگرەیەکی ڕۆژنامەوانیدا وتی، "شۆک بوین لە بڕیاری دورخستنەوەمان بەڵام ڕێز لە دادگا دەگرین".

 

هۆشیار زێباری لە کۆنگرەیەکی ڕۆژنامەوانیدا (13-2-2022) وتی، "ئەمڕۆ ڕۆژێکی ناخۆشە بۆ عێراقییەکان بەڵام ژیان بەردەوام دەبێت" و جەختیکردەوە کە "تاوەکو ئێستا پارتی هیچ کاندیدێکی تری دیاری نەکردووە، ئەو تەنها کاندیدی پارتییە بۆ پۆستەکە".

 

وتیشی، "بڕیاری دورخستنەوەم لە خۆکاندیدکردن بۆ سەرۆکایەتی کۆمار بڕیارێکی هەڕەمەکییە و ڕووبەڕووی ستەم بووینەوە."

 

جەختیکردەوە کە "ئێمە هەموو مەرجەکانمان تێدا بوو بۆ کاندیدبوون بۆ سەرۆکایەتی کۆمار."

 

هۆشیار زێباری باسی لەوەشکرد کە "ئەوان نایانەوێت عێراق سەرۆکێکی بەهێزی هەبێت و بەرپرسیاریشیم لە قسەی خۆم."